Creative Commons 3.0 RSS CSS 2.1 XHTML 1.0
Entrar  
Rexistru
El sótanu del paraísu... 
Escrito por Sumiciu el llunes, 8 agostu de 2011

[En castellano en el primer comentario]

Cuando entames a conocer a daquién fonderamente, vas viendo que hai delles preocupaciones y "lluches personales" que acaben recordándotelu lo mesmo que la so silueta. Son cuestiones parciales que delaten dellos esmolecimientos, inquietúes o afinidaes. Según vas conociendo más xente, queriendo o ensin querer vas empapandote de dalgunes coses nes que nun pensaste nunca aparate a pensar nelles siquiera un momentu. El diálogu ye lo que tien, l'alderique ye lo que trai y según vas superando les torgues que vas topando, más entama a prestar y alimentar.

Ye la esencia de la horizontalidá, el que la to pequeña gotina chisque nun fontán al empar que se mueya con toles que hai acumulaes.

Casi por costume y ensin date cuenta, notes que hai una fuerza estraña que t'alloña de ciertos llaos. Nun falo del mieu o la desidia, que dacuando tamién apreten, sinon d'aquella que te fai sentir esa sensación de que daqué nun cuerre como debiera o como esperares que lo ficiere. El vezu al recursu racional despista un poco cuando se fala de sentir, pero garrando daqué perspectiva esclarien los pilancos ocultos.

Llevamos casi dende'l Mayu aquel a la gueta d'una nueva utopía que concentre too ello y asoleye un camín que podamos garrar uníos lo mesmo que ficieron los antepasaos. Pero los árboles nun dexen ver la viesca, que ye la suma de toes eses preocupaciones, de toa esa xente que mos arrodia y de toes eses esperiencies, esi movimientu que vamos faciendo al débalu y casi ensin conocimientu. Esi avance qu'evita tanxencialmente l'afán de lliderazgu y dominación que va surdiendo ente los pasos.

Dexái de buscar nuevos dogmes porque'l resultáu del pasáu y el reflexu del presente ta más cerca de lo que paez. Nun esperéis mesies nin escuchéis profetes porque nun vamos deprender más que de los errores y los aciertos qu'invadan la nuestra redolada.

Dedicao a tolos socialistes, llibertarios, ecoloxistes, feministes, asturianistes, animalistes, antihomófobos, antirracistes... por teneme ḥodíes tantes idees precocinaes. Porque nun hai xunidá evitando ningún contraste d'idees y nun se puede falar de nada prioritario al respetu a la pluraridá. Onde falte dalguna d'estes voces nun quiero tar, porque eso nun ye xunidá namás ye un rebañu.

Y el que quiera entender, que entienda...

Escrito por Sumiciu el xueves, 30 xunu de 2011

(En castellano en el primer comentario)

Una de les cuestiones que más ta en boca de toos nes cais (proclames, pancartes, asamblees, alderiques..) ye la cuestión de la representatividá. Nun yera difícil oyer a les puertes de cualquier edificiu parlamentariu, glayíos de "Nun mos representen" escontra la clas político de turnu. D'entamu, paecía della conciencia sobre la cuestión de la representación y lo que ello representaba (valga el xuegu de pallabres). Agora mesmo nun tengo esto tan claro mientres lleo, por exemplu, a xente diciendo que delles persones que quedaron acampaos na Plaça Catalunya nun representen a naide.

Esto ye un tema grave sobre'l que tendríemos que parar a pensar a lo menos un ratín. ¿Realmente nun representen a naide?, a nun ser que demos por fecho que lo faen baxo coacción d'un terceru, habrá qu'almitir a lo menos que tan representándose a sí mesmos. Puede ser que se tea o non d'acuerdes con ellos, pero ello nun-y quita representatividá (como mayoría o minoría, esa ye cuestión meramente matemática; anque nun dexa d'asoleyar la inesistencia de consensu, por definición) al actu. Lo mesmo que la xente que decidió llevantar el campamentu nun representa a naide más que a ellos mesmos. Realmente tuviera sío un problema si daquién entamara a falar nunos plurales que nun-y correspondieren.

Nesti puntu hai qu'entrugar ¿qué representación ye la que queremos?, ente pancartes de "democracia real", "asamblearismu", "horizontalidá" y "soberanía popular" lo esperable ye que se puxare porque naide representare a naide más sacante ún mesmu. O, dientro de lo posible, lo que se-y acercare más. Entós ye cuando topamos que xunto a la xente que realmente nagua y llucha por estes posiciones, interesadamente súmense otres persones que namás quieren repetir los mesmos esquemes, colos mesmos errores y problemes que siñalen güei pero onde ellos tengan les posiciones dominantes. Dexalo too igual pero d'otru color, de forma más resumida.

Estes posiciones tienden a ser el cáncanu de tou cambiu y un de los factores qu'acaba con él, enantes o darréu de llograr cambiar daqué. Y ye que nun olvidemos que, al final, caún ye caún...

Escrito por Sumiciu el martes, 21 xunu de 2011

Nun llugar de la infancia, del nome nun soi quien a alcordame allúgase la hestoria más grande xamás contada. Aquella que deprendimos dende'l primer momentu y que creyímos palabra por palabra. La mesma na que nós yéramos protagonista y espectaor pa dir faciéndomos, con suerte narraor según corría el tiempu.

Esta hestoria entama de nueche como toes les que vienen de lloñe nel tiempu, pero non nuna nueche cualquiera, non. Cada día tien la so hestoria, cada día la so nueche y la nuestra nueche ye la del solsticiu braniegu. La nueche de la foguera, la nueche de les hestories, lleendes y vezos.

Una superproducción que mos sigue atrayendo. Nun ye estraño, nun hai meyor efectu especial qu'aquel qu'asocede delantre la to vista, que pues palpar, tastiar, oyer y goler tovía cuando acaba'l tiempu de les llames y les brases cuenten una hestoria asemeyada en pasáu imperfectu.

¿Y ye que hai hestoria más grande que un cuentu que fai participe a un país enteru? ¿Más grande que'l cuentu que se dexa mezclar cola realidá hasta llegar a confundite?. Con seres tan reales que nin el pasu del tiempu los mata anque nun aparezan en nengún fotograma. ¿Acasu a estes altures puedes dicime que'l "Sumiciu" nun esiste si ye quien a resistir meyor el tiempu que la mesma máquina de vapor? ¿qué ye más real, una mala imaxen o un reflexu adornáu de la esperiencia?

Y lo meyor ye que nun hai una hestoria, nin dos, nin tres; cada país tien la suya y caúna fai cada país. Y a medida que les oyes pregúnteste si al final nun sedrán toes la mesma. ¡Claro!, ¡si siempre ye lo mesmo lo que contar!, namás cambia el paisaxe que apurre la escena a les esperiencies. Asina, cuando caún pinta el so paisaxe dexa'l restu del mundu reflexase nel.

Milenta escenarios, milenta voces, milenta personaxes, milenta esperiencies, milenta sensaciones... lo dicho, la hestoria más grande xamás contada. Y lo meyor de todo ye que mos pertenez dende siempre. Pero nun mos equivoquemos, nun ye vivir nun mundu de fantasía, la realidá sigue consciente y esti ye'l llazu que mos xunta a les que enantes tuvieron sobre esti mesmu suelu.

Mỹthos, dēmos, historía...

Escrito por Sumiciu el llunes, 6 xunu de 2011

Munches veces lo fácil ye criticar o arrimase al árbol que meyor sombra da. Munches veces hai xente interesao en que la vida seya como un partíu de fútbol y haya unos con unos colores a un llau y otros con otros colores nel d'otru.

Lo dificil, les más de veces ye desplicase; ello ye que voi intentar facer un trabayu d'aportación dende la mio postura con ánimu d'enriquecer y asoleyar daqué pluraridá pa intentar sentime más comprendíu nestos cauces. Nun voi falar de les formes, porque ye daqué del momentu y nel momentu lo dexo; voi entral al fondu y, anque'l fondu ye bien ampliu voi usar el puntu de partida como ferramienta de debate. Y estes son les propuestes apautaes na Asamblea de Sol y que adoptaron les más d'asamblees de tol Estáu. Vamos puntu por puntu darréu.

1. ELIMINACIÓN DE LOS PRIVILEXOS DE LA CLAS POLÍTICA:
- Control estrictu del absentismu de los cargos electos nos sos respectivos puestos. Sanciones específiques por dexación de funciones.
- Supresión de los privilexos nel pagu d'impuestos, los años de cotización y el montu de les pensiones. Equiparación del salariu de los representantes electos al salariu mediu español más les dietes necesaries indispensables pa'l exerciciu les funciones.
- Eliminación de la inmunidá venceyada'l cargu. Imprescriptibilidá de los delitos de corrupción.
- Publicación obligatoria del patrimoniu de tolos cargos públicos.
- Reducción de los cargos de llibre desinación.

Poques duldes nesti puntu. Quiciás habría que plantear l'esistencia d'unos xestores verdaderamente profesionales que respondan directamente énte'l poder popular, que na democracia parlamentaria ye'l parlamentu, pero tampoco vamos quedamos ehí ¿non? A medida que la socieda vaya deprendiendo a organizase y a decidir, lo que hai que cuestionar ye la necesidá de la representación, tamién hai que pensar na capacidá de revocación de cargu. La clas política, dende un puntu de vista popular dafechu, ye una clas antagónica. Pero nun mos equivoquemos, nun la identifico equí con aquellos qu'exercen l'actividá política, sinon colos profesionales de la mesma. Y dicha clas ye una clas a desaniciar.

2. ESCONTRA EL DESEMPLEGU:
- Repartu del trabayu fomentando les reducciones de xornada y la conciliación llaboral hasta acabar col desemplegu estructural (ello ye, hasta que'l desemplegu quede per baxo'l 5%).
- Xubilación a los 65 ensin espurrir la edá de xubilación hasta acabar col desempléu de la mocedá.
- Bonificaciones pa aquelles empreses con menos d' un 10% de contratación temporal.
- Seguridá nel emplegu: imposibilidá de despidos colectivos o por causes oxetives nes grandes empreses en teniendo beneficios, fiscalización a les grandes empreses pa asegurar que nun cubren con trabayadores temporales emplegos que podíen ser fixos.
- Restablecimientu del subsidiu de 426€ pa tolos paraos de llarga duración.

Acepto (y talanto que munchos aceptamos d'esta forma) esto como parche pa la realidá más inmediata, anque nun puedo dexar de mencionar la cuestión de la propiedá de los medios de producción y la xestión popular de los mesmos. Magar que falamos d'educamos pa ser quien a xestionar la nuestra vida dende'l puntu de vista políticu, nun hai qu'olvidase de que, anque xestionemos l'esfera pública, esta ta enforma sometía a l'esfera del negociu priváu anguaño. Soi consciente que garrando esti camín yá me pongo escontra l'espectru lliberalista que "mos acompaña", pero hai d'evitar una corporativización de la sociedá, esto ye, mermar el poder de lo público (inda entregándola a un poder colectivu) a favor d'un mayor poder corporativu.

Nesi sen, los trabayadores y desemplegaos son la moneda de cambiu d'esi términu mediu. Y ye una cuestión delicada. L'interés ta claro que ta en mantener l'empleu, facer que seya compatible cola vida (horarios, duración...) y que reduzca lo más posible l'alienación que va esistir mientras seya por cuenta ayeno (mayor participación nes negociaciones y decisiones, accesu al repartu de dividendos...).

Tampoco creo que seya concebible aceptar cualquier allargamientu de la edá de xubilación, precisamente polo establecío nel primer puntu d'esta estaya.

3. DERECHU A LA VIVIENDA:
- Espropiación pol Estáu de les viviendes construíes en stock que nun se vendiesen pa colocales nel mercáu en réxime d'arriendamientu protexíu.
- Ayudes al arriendamientu pa mozos y toes aquelles persones de pocos recursos.
- Que se permita la dación en pagu de les viviendes pa finar les hipoteques.

Esta cuestión, al igual que l'anterior, ye un terminu mediu ente l'estáu actual de les coses y la nacionalización de la vivienda. Y ye una parte na que, anque comparto les midíes de mediu plazu tengo duldes práutiques ¿como conviviría esti sistema cola iniciativa privada que tovía cabe nel? ta claro que influiría na oferta y por estensión na demanda, faciendo fluctuar el mercáu y quiciás dando-y mayor control a lo público/colectivo; pero ¿sedremos quien a aguantar esta tensión en paz colo privao? Una vez más, esiste un antagonismu que se ve forzáu a convivir. Supongo qu'esi movimientu namás se pueda ver andando.

4. SERVICIOS PÚBLICOS DE CALIDÁ:
- Supresión de gastos inútiles nes Alministraciones Públiques y establecimientu d'un control independiente de presupuestos y gastos.
- Contratación de personal sanitariu hasta acabar coles llistes d'espera.
- Contratación de profesoráu pa garantizar la ratio d'alumnos per clas, los grupos de desdoble y los grupos d'apoyu.
- Reducción del coste de matrícula en tola educación universitaria, equiparando'l preciu de los posgraos al de los graos.
- Financiación pública de la investigación pa garantizar la so independencia.
- Tresporte públicu baratu, de calidá y ecolóxicamente sostenible: restablecimientu de los trenes que se tan sustituyendo pol AVE colos precios d'enantes, abaratamientu de los abonos de tresporte, restricción del tráficu rodáu priváu nel centru les ciudaes, construcción de carriles bici.
- Recursos sociales llocales: aplicación efectiva de la Llei de Dependencia, redes de cuidadores llocales municipales, servicios llocales de mediación y tutelamientu.

Realmente esti puntu paezme redundante. Esplícome, nun ye que nun entienda como un fechu estes necesidaes sinon que camiento que tan subordinaes al exerciciu de la función pública. Amás mezcla unes cuantes coses ente les que creo que la Educación merez capítulu aparte. Ye la base de cualquier futuru a mediu o llargu plazu. Ta claro que tien que ser d'accesu universal, cubrir les necesidaes básiques de toles persones y amás apurrir les ferramientes afayadices pa que caún pueda dir tolo lloñe que-y pete/pueda. Y tamién la investigación, potenciando la parte educadora pa que nun se vea amenorgada pola empresarial.

Lo mesmo la salú, el tresporte y el restu de servicios públicos. En definitiva ye fomentar la so universalidá y poner los medios que fagan falta pa que lleguen a tol mundu en tiempu y forma. de xuru que cada profesional puede apurrir medíes más concretes. Hai que almitir tamién, que en dellos sitios dalgunes medíes (sobretoo lo rellacionao cola dependencia) tan llevandose a cabu engarrándose col problema de la financiación. Que al final ye la mayor muria que hay que superar.

Pal tresporte nun creo que seya correcto dar una solución global, ye una cuestión de la comunidá como puede resolver meyor les sos necesidaes. Ta claro que hai que fomentar les maneres sostenibles y accesibles en preciu, que ganar 10 minutos de viaxe pa que pueda llegar menos xente o se faga una güelga ecoloxica 10 veces mayor nun ye de recibu. Pero nin toos vivimos en ciudaes, nin toos a la mesma distancia.

En cuantes a los gastos inútiles nes Alministraciones Públiques, de xuru que toos tamos d'alcuerdu que hai d'eliminalos. No que probablmente nun teamos toos d'alcuerdu ye en cualos son inútiles, equí pécase un poco de xeneralismu llegando al estremu de ser lo mesmo que nun decir nada.

5. CONTROL DE LES ENTIDAES BANCARIES:
- Prohibición de cualquier tipu de rescate o inyección de capital a entidaes bancaries: aquelles entidaes en dificultades han quebrar o ser nacionalizaes para constituir una banca pública baxo control social.
- Subida de los impuestos a la banca de manera directamente proporcional al gastu social ocasionáu pola crisis xenerada pola so mala xestión.
- Devolución a las arcas públicas por parte de los bancos de todo capital público aportado.
- Prohibición d'inversión de bancos españoles en paraísos fiscales.
- Regulación de sanciones a los movimientos especulativos y a la mala praxis bancaria.

Básicamente estes son cuestiones que mos faen falta dende tiempu. Namás apuntar que nun se fai referencia a la recuperación d'entidades financieres baxo control públicu como yeren les caxes. Realmente dalgunes d'estes cuestiones nun se daríen coles caxes tal y como se conocíen fae unos años. Evitar la concentración de capitales, asegurar l'aforru popular escontra la especulación de les entidaes financieres y un control sobre onde se gasten los beneficios obteníos (armes, blanqueu, compra de poder...) son cuestiones que tampoco podemos pasar por altu.

6. FISCALIDÁ:
- Aumentu del tipu impositivu a les grandes fortunes y entidaes bancaries.
- Eliminación de les SICAV.
- Recuperación del Impuestu sobre el Patrimoniu.
- Control real y efectivu del fraude fiscal y de la fuga de capitales a paraísos fiscales.
- Promoción a nivel internacional de l'adopción d'una tasa a les transacciones internacionales (tasa Tobin).

Otru puntu de transición. Mientres mos toque esperar a la plena igualdá ente les persones, ta claro que lo que queda son medíes d'esti tipu dedicaes a iguar la desigualdá esistente. Y una vez más ta en contradicción col lliberalismu más puxante y puede llevamos a una situación d'estremos. Por ello lo de nun olvidar hacia onde queremos dir realmente.

7. LLIBERTAES CIUDADANES Y DEMOCRACIA PARTICIPATIVA:
- Non al control d'Internet. Abolición de la Llei Sinde.
- Protección de la llibertá d'información y del periodismu d'investigación.
- Referéndums obligatorios y vinculantes pa les cuestiones de gran caláu que modifiquen les condiciones de vida de los ciudadanos.
- Referéndums obligatorios pa toa introducción de medíes dictaes dende la Unión Europea.
- Modificación de la Llei Electoral pa garantizar un sistema auténticamente representativu y proporcional que nun discrimine a nenguna fuerza política ni voluntá social, onde'l votu'n blanco y el votu nulu tamién tengan la so representación nel lexislativu.
- Independencia del Poder Xudicial: reforma de la figura del Ministeriu Fiscal pa garantizar la so independencia, non al nombramientu de miembros del Tribunal Constitucional y del Conseyu Xeneral del Poder Xudicial por parte del Poder Executivu.
- Establecimientu de mecanismos efectivos que garanticen la democracia interna nos partíos políticos.

Quiciás equí hai unes vistes un poquiñín de coyunturales. Directamente hai que dicir non al control de les comunicaciones y de la vida privada (llamese Internet, carta o teléfonu). El cuentu del terrorismu global fizo que estos bienes fueren cada vez más escasos y se camudaren por seguridá bien de veces.

La cuestión de los referendums compártola (sin dexar de suañar nun control directu y constante ensin representantes, claro que sí). Pero hai que ser realistes, sobretoo nel tema européu. La permanencia na Unión supón una cesión de soberanía, nun se puede tar dientro y fuera al empar; o se acaten les resoluciones y dictaos del gobiernu común o se ta fuera. El puntu mediu ye imposible, como muncho fadría falta d'una revisión del tratáu europeu y un nuevu pactu transnacional. Nesti puntu hai que plantease tamién el marcu d'actuación, cuestión que se ta manexando dacuando de forma mui ambigua yá que mientres per un llau se trabaya en clave d'Estáu (marcu español) bien de medíes nun pueden dase más que nun marcu más llocal lo que n'ocasiones entra en contradicción d'intereses. Supongo que esto se planteare pola estratexa de suma, pero ye un puntu básicu d'apoyu (aunque la cuestión de l'autodeterminación de los pueblos tien vida en asamblees como la de Barcelona, siguiendo el camín asimétricu de lliberación nacional que se ta tomando nel conxuntu del Estáu). Les asamblees namás pueden llegar a cierta entidá de población a través la confederación, lo cual cuestionaría el centralismu de dalgunos ámbitos.

Y sobre'l sistema representativu hai tamién una dixebra ente les necesidaes de dalgunos partíos "cercanos" a la causa que pondría enriba la mesa les desigualdaes demográfiques (circunscripción única) y un verdaderu sentimientu de representatividá (circunscripciones llocales). Fai falta un terminu mediu y siempre se va a sacrificar daqué. Personalmente tolo que seya baxar la importancia de les sigles (llistes abiertes, representantes por zona, votu tresferible) paezme importante. Y creo que tanto nesti puntu, como nel apuntáu anteriormente, el papel de los conceyos ye cabezaleru.

Tocante la democracia interna nos partíos, sinceramente paezme un tema que sobra, por ser ayenu. Si queremos seguir depositando confianza en organizaciones verticales, autoritaries ya incluso filofacistes habiendo alternatives nun se puede dir a llimpiar la casa d'otru descuidando la tuya propia. Mientres estes organizaciones tengan cabida y apoyu tenemos problemes más importante que tol control que se pueda tener sobre elles. Además estes cuestiones son susceptibles de llegar a estremos como la llei de partíos o absurdos como la llei de paridá electoral.

8. REDUCCIÓN DEL GASTU MILITAR

¿Qué más se puede decir? Ah, si, que munches de les coses que se proponen necesiten perres, y agora mesmo esti ye un furacu considerable. El negociu de la guerra ye la exa que tien pola probeza, la desigualda y les torgues n'avances sociales y d'investigación. Munches veces contitúi la verdadera rempuesta a la entruga "¿y eso cómo lo vas pagar?".


En fin, esta ye la mio aportación al debate que, más que crítica, quisiera entender como personal. ta claro qu'estes cuestiones al final resulten de ciertu consensu ente estremaes postures y creo que la discusión nun fai más que fortalecer cualquier vía que seya accesible. Ello ye que humildemente apurro la mio migayina a la construcción de marcu teóricu; anque hai puntos nos que nun me parara abondo por intentar ser fluíu (tovía asina quedo un tochu curiosu). De la práutica, seguimos falando na cai... pero p'enriba too nos barrios, nes parroquies y nos conceyos.

Escrito por Sumiciu el martes, 24 mayu de 2011

Una cuestión que ta saltando a debate públicu estos díes tres del movimientu del 15 de mayu ye la forma d'organizase. Magar qu'esti movimientu surdió de la Rede hubo una naturaleza intrínseca d'organización horizontal que lu orientó pa un sistema de tendencia asamblearia. Tampoco se puede olvidar que della xente participante nel movimientu vien de movimientos sociales nos que yá fai tiempu que s'organicen siguiendo estos patrones.

Agora apaecen voces crítiques coles asamblees. Los argumentos escontra son principalmente dellos problemes d'organización, de participación, de representación... que dalguno, efectivamente esiste pero paezme que otros deriven más bien d'una incomprensión de la práutica (o sinon de la práutica de los oxetivos de la mesma). Quiero apuntar dellos puntos dende la mio posición (de defensa del métodu asambleariu pa cualquier acción, nun lo escuendo) pa echar otru granín d'arena al debate y marcar tamién dalguna posición dende fuera.

Entamo per una frase que me fexo muncha gracia oyer, la de que "l'asamblea nun representa a naide". Y esto dame que pensar, porque o mui mal se tan faciendo les coses pa que la xente que collabora nun tenga voz nella o esperamos de l'asamblea coses que nun correspuenden a esti mou d'organización. Dando por fecho que nun se refuga nin favorez la intervención de naide (qu'en casu de facese ye un problema de fondu, non de forma a resolver poles persones implicaes y que dificilmente puede considerase entós como práutica asamblearia), hai que pensar que la representación nun asablea puede llograse bien por comunidá d'intereses (una especie de delegación de l'acción sobre daquién nel que ideolóxicamente hai enfotu) o pola mera presencia. Esto ye que nun se puede negar la representación nuna comunidá asamblearia na que nun se llega a participar activamente; la asamblea ye una forma de interacción ente persones a la que tienen qu'acudir les persones (valga la repetición...). Nun ye un arma utópica inventada por anarquistes que va traer la revolución yá fecha y perfumada a casa. Ye un martiellu pa clavar o sacar clavos, que lo mesmo que'l martiellu, necesita de xente que lu empuñe.

Tamién ye importante siñalar qu'un cimientu importante del asamblearismu ye la llibre asociación. Esta forma d'organización necesita de persones uníes por dalgún interés (y sobra, decilo, pero con voluntá d'algamalu) que bien puede tar nidiamente claru con antelación o puede dir definiéndose na práutica asamblearia (los oxetivos rellacionaos cola organización social suelen definise na práutica, por definición casi). Esto implica (atención, obviedá) que naide ta obligáu a permanecer nella pase lo que pase y decida lo que se decida. Nun quita que dalgunos movimientos asociativos tengan como misión simplemente axuntar fuerces, pero entós hai que ser realista y sacrificar la clarída d'oxetivos y soluciones propuestes, como nesti casu nel que ta comprobándose que siempre axunta más una negativa global que una propuesta concreta. Esi ye un consensu que tien que dase, tan fácil y tan difícil.

Pero en resumen, les asamblees tienen que surdir como métodu d'organización ente xente que ta d'alcuerdes en daqué y que l'asamblea nun ye dalgo total nel que tas o nun tas, puede haber estremaes asamblees qu'espresen distintos puntos de vista. Ye comprensible cierta murnia cuando alcuentres que nun compartes cuestiones medianamente básiques con un grupu de xente col que te tas rellacionando, ye una ferramienta emocional escontra la solitú a la que dacuando se tiende refalfiáu. Tampoco se puede esperar d'una asamblea más de lo qu'ún ta dispuestu a facer nella ya que la primer persona ye siempre l'actor principal del propiu naguar, el restu "namás" son compañeros nesi naguar.

L'ultimu tema sobre'l que me prestaba pasar ye la cuestión del lliderazgu. Esti ye un tema que vien de la mano con tolo que se tuvo falao enantes y pueden correr bien de ríos de tinta lletrónica sobre ello. ¿Fai falta un lliderazgu? ¿son necesarios los llíderes? Nun se puede negar que como excusa delegacionista la esistencia de llíderes ye bien amañosa. Y que estos tienden a surdir de forma natural pol dominíu del mediu utilizáu (con una dificultá distinta abondo ente'l mediu oral o l'escritu-dixital), pero a lo que me refiero equí ye a la so institucionalización. ¿Cuala ye la so necesidá? ¿pa dar visibilidá cuando la meyor visibilidá son los fechos? ¿pa ofrecer una oposición n'igualdá de condiciones al status quo?, ello ye, ponese a la so altura; o pensando maldaes ¿quiciás tendencia al dirixismu? Estes caberes entrugues paecenme importantes cuando tamos falando d'ofrecer una alternativa de soberanía popular y que diría más allá de la cuestión del reformismu reduciendo'l movimientu a otra bandera más nel mar del poder.

Como conclusión, namás repetir que les asamblees son ferramientes inútiles si nun son usaes poles persones. Y que la esixencia de participación popular, d'igualdá de poder real implica que nun seya otru sinon ún mesmu quien tenga d'echar al llombu la carga de la implicación na búsqueda de soluciones.

Escrito por Sumiciu el llunes, 16 mayu de 2011

Tamos en temporada electoral: preparáivos. Los medios de comunicación entamen a asoleyar propuestes, campañes y poses; nunos pocos díes les carreteres de tolos conceyos enllenense de cartelos con cares mirando pa ún mientres piden el votu. En dalgún chigre, en dalguna comida cola familia o colos collacios sal el tema y al final el colofón ye una decisión individual sobre qué facer esi día cola papeleta del degorriu.

Hai bien d'estudios sociolóxicos que esmolecíos por intentar desplicar el por qué de los resultaos y les tendencies de votu. Pero agora, vais permitime centrame na individualidá y nesi momentu nel que cada persona piensa qué facer nesti día.

La lóxica de la democracia (ensin apellidos...) implica que los procesos nos que toma parte cada individuu del colectivu tienen que ser claros de forma que nomada persona tenga la mayor facilidá pa escoyer ente les opciones disponibles en función de los sos intereses. Por llástima, esti nun ye'l casu nel que nos topamos; tenemos enfrente un conxuntu de regles y repartos matemáticos qu'escurecen el camín y l'oxetivu del votu (o'l non votu) y bien de veces incluso mos lleva a engaños al nun tener mui claro cómo va a contabilizasela nuestra elección. Ello ye que vamos intentar repasar les consecuencies que tien l'exerciciu de cada opción col oxetivu d'intentar esclariar el sistema electoral vixente nel Estáu español anguaño y echar un gabitu ehí onde haiga duldes.

Entamamos dando un repasu al sistema de distribución d'escaños, el conocíu como sistema D'Hont. A la hora de facer el repartu, lo primero ye establecer un corte que, según les elecciones, puede ser del 3% o del 5% (n'Asturies, según la llei electoral autonómica esti corte ye del 3%). A partir d'ehí, toles candidatures que nun lleguen a esi porcentaxe, yá nun cuenten. Ente les que pasen el corte faise una tabla na que se calculen los cocientes de los votos obteníos dende 1 hasta'l númberu total d'escaños (E) y gárrense los E valores más altos. Por exemplu pa dos candidatures con 30 y 96 votos sobre 126 pa 3 escaños:









123
candidatura 1: 964832
candidatura 2: 301510


Los tres escaños repartiríense 2 pa la candidatura 1 (96 y 48) y 1 pa la candidatura 2. En casu d'empate decidiríase pola candidatura que tuviere más votos totales y si tovía asina tuvieren empataos, por suertes; tocando-y a partir d'ehí alternativamente a caún.

Esti repartu faise por circunscripciones electorales. En cada circunscripción presentense delles candidatures y repártense dellos escaños na elección de turnu. Les circunscripciones nun siguen nengún patrón identificable. Por exemplu, pa les elecciones estatales, Asturies ye una única circunscripción; por contra nes autonómiques, Asturies dividese en tres circunscripciones (occidental, central y oriental) ¿que consecuencies tien esto? que por exemplu un partíu con 20.000 votos nuna sola circunscripción n'Asturies tenga más diputaos qu'otru con 30.000 o incluso 40.000 repartíos peles tres circunscripciones ensin llegar en nenguna al corte. Esto suel perxudicar mayormente a agrupaciones de tamañu medianu/pequeñu d'ambitu autonómicu mientres beneficia a agrupaciones llocales y a les mayoritaries.

De igual forma, nes elecciones estatales, otres comunidaes autónomes cola mesma población (más o menos) tienen una representatividá mayor al tener una circunscripción por provincia (Aragón cpmaprativamente con Asturies, por exemplu).

Dicho esto, repasemos más concretamente cómo contaríen toles opciones de votu:

- Abstención. Entamo pola más fácil y ye que l'abstención también ye una opción énte les elecciones. Nun inflúi nos partíos que pasen el corte pa'l repartu d'escaños, nun inflúi nel reparti mesmu y nun se decanta per nenguna opción.

- Votu'n blancu. El votu'n blanco cuenta como votu válidu que nun s'entrega a neguna candidatura, y esto tien consecuencies. La primera y más obvia que nun se decanta per nenguna opción, pero si que cuenta nel cálculu del corte pa'l repartu. Tal y como se dixo, establezse un corte del 3% o 5% según les elecciones y el sitiu, esto quier decir que tolos partíos que nun lleguen a esti porcentaxe de votos directamente nun entren al repartu d'escañu. Siguiendo col razonamientu, un votu'n blancu, que sí cuenta como votu válidu sumaríase al total de votos col que se calcula'l porcentaxe, contribuyendo a que esti seya más altu. Como consecuencia, el mínimu de votos pa poder optar pol escañu sube perxudicando a los partidos más pequeños qu'anden rondando esi corte y beneficiando a los mayoritarios, porque cuantos menos partíos entren al repartu, más escaños repartirán ente menos.

- Votu nulu. Cuando falamos de votu nulu, falamos de votos non válidos. Votos válidos son papeletes rotes, pintaes, papeletes non oficiales, candidatures non válides... ye por ello polo que'l votu nulu dacuando representa un error del votante al introducir la candidatura y otres veces ye una forma d'abstención activa. Esto ye porque al nun contar como votu válidu, tien consecuencies mui parecíes a les de l'abstención sacante l'exerciciu de votu, obviamente. Ni cuenta pa'l calculu del corte, nin nel repartu, nin cai a favor de nenguna opción.
Per estes implicaciones comentaes suel ser un tema mui discutíu nel recuentu mesa por mesa, intentando cada parte contabilizálu como más-y convenga; polo que nel casu d'usase como abstención activa, lo meyor dexar clara la intención escribiendo-y enriba y visible "NULU", por exemplu.

- Votu a candidatura. El votu a una candidatura tien unes consecuencies bastante obvies tamién y que creo que nun fai falta desplicar: cuenta pa'l cálculu del corte ya inflúi nel repartu decantándose per una opción.

Estes son les opciones de votu, en función de la opción seleccionada, participase d'una forma más activa nel procesu; pero realmente cada una ye una forma de tomar parte dao que cada opción tien consecuencies nel repartu de representantes. Al final esta decisión nun-y correspuende a naide más que a cada persona en defensa los sos intereses. Dicho esto y ensin ánimu de anticipame a resultaos predecibles..."disfruten" lo (non) votao.

Escrito por Sumiciu el miércoles, 4 mayu de 2011

There’s an inner thing in every man,
Do you know this thing my friend?
It has withstood the blows of a million years,
And will do so to the end.

It was born when time did not exist,
And it grew up out of life,
It cut down evil’s strangling vines,
Like a slashing searing knife.

It lit fires when fires were not,
And burnt the mind of man,
Tempering leadened hearts to steel,
From the time that time began.

It wept by the waters of Babylon,
And when all men were a loss,
It screeched in writhing agony,
And it hung bleeding from the Cross.

It died in Rome by lion and sword,
And in defiant cruel array,
When the deathly word was ‘Spartacus’
Along the Appian Way.

It marched with Wat the Tyler’s poor,
And frightened lord and king,
And it was emblazoned in their deathly stare,
As ever a living thing.

It smiled in holy innocence,
Before conquistadors of old,
So meek and tame and unaware,
Of the deathly power of gold.

It burst forth through pitiful Paris streets,
And stormed the old Bastille,
And marched upon the serpent’s head,
And crushed it ‘neath its heel.

It died in blood on Buffalo Plains,
And starved by moons of rain,
Its heart was buried in Wounded Knee,
But it will come to rise again.

It screamed aloud by Kerry lakes,
As it was knelt upon the ground,
And it died in great defiance,
As they coldly shot it down.

It is found in every light of hope,
It knows no bounds nor space
It has risen in red and black and white,
It is there in every race.

It lies in the hearts of heroes dead,
It screams in tyrants’ eyes,
It has reached the peak of mountains high,
It comes searing ‘cross the skies.

It lights the dark of this prison cell,
It thunders forth its might,
It is ‘the undauntable thought’, my friend,
That thought that says ‘I’m right!’

Bobby Sands

Ir a página 1 2 3 ... 23 24 25