Creative Commons 3.0 RSS CSS 2.1 XHTML 1.0
Entrar  
Rexistru
El sótanu del paraísu... 
Escrito por Sumiciu el llunes, 13 setiembre de 2010

A la hora de quedar quietos son l'avanzada, les vanguardies de la xustificación. Los mesmos qu'escuendíen la voz cuando la tormenta, l'orpín y l'orbayu; aquella corriente que diba pa onde-y apretare'l vientu. Agora falen de derechos y faense los fuertes na posición más fácil. Y yo mientres tanto, reduciendo a la tercera persona masificada mientres resuena nel ambiente "¿con nós o con ellos?".

Paezme que la cuestión ta mal puesta sobre la mesa, amás con interés. Lo curioso ye que esta vez esti interés nun remanez namás de los interesaos sinon que tamién de los desinteresaos, lo que puede ser lo que-y dea especial gracia al asuntu. Y ye que ye simpático que detrás de palabres que falen de derechos, llibertá, pensamientu y la madre que lo parió impongan na eleición dos únicos caminos. Esta ye l'alegoría cotidiano na que se presenta quiciás el mayor problema que tenemos: la creación d'un escenariu bien adornáu con arumes de llibertaes nel que namás se pueden tastiar platos precocinaos en númberu llimitáu y con una tendencia absorbente y ablucante al empar. Nun debe tar lloñe ello de l'ideal del control, la soberaníu reducía al Pong (la cuenta pa enmarcalo nuna pantalla).

Y l'arume cafiante nesti casu ye'l de la margarita que te llanten delantre les ñarices y t'obliguen a esfoyar (en total llibertá siempre, nun mos llevemos a engañu, que equí namás piensen mal los que tienen daqué qu'escuender y nós nun queremos ser puxarrona d'eso -onde andará la heroína cuando fai falta...): ¿voi?, ¿nun voi?. El casu ye que ta un entrugandose si ye a la fuelga, a la mierda, al aru más próximu o a los tres a la vez. Porque al final too consiste neso, conmigo o contra min (ping) contra él o con él (pong) y babayu l'últimu. Pa otra falaremos de si preferimos que mos cague enriba la gaviota o mos esgatuñe l'escayu la rosa, que al final siempre ye'l fondu la cuestión.

Amás, lo mesmo que cai cafiante la flor ye aborrecible'l ruxe-ruxe que faen caún de los pétalos que se-y van arrancando de la que, casualmente, va posicionándose cada bandu. Ún sientese como apuntáu pol tiu Sam col índiz mirando directu a la cara mientres repite de contino "quiérote a tí", siña infalible de que yá tas tomando abondo tiempu en pensalo n'opinión de los xueces de la contienda (caún colos sos pompones, too seya por sofitar esi bizarrismu que tantu mos presta).

El casu ye que tal paez que val tou esti circu pa que malgastemos cuatro párrafos enguedeyando por temes que nun son los qu'importen, pa que tomemos una actitú personal ya intransferible que tamos condenaos a asoleyar a diario y l'arroxemos a un escuru segundu planu, mientres mos engardiamos con nós y col restu pa ver en que grada s'alluga caún. En menuda inercia inerte mos metió l'avanzada y que mal afayadizo ye ser la pelota nesti xuegu.

Escrito por Sumiciu el martes, 7 setiembre de 2010

...l'únicu arguyu que queda ye'l comprobar qu'un añu más, y pesie a too, seguimos siendo y que güei ye tan bon día como otru pa asoleyalo. Anque namás seya l'escusa de pensar nello, quiciás yá seya amañoso aparar venticuatru hores a recordalo.

Namás el día que mos agospie la tierra podrán dicir que nun somos, namás podrán mentir pa decir que nunca foemos.

¡Puxa!

Escrito por Sumiciu el llunes, 2 agostu de 2010

Nun primer momentu foi resultáu de l'esclavitú baxo la propiedá privada, esi afán alministrativu y xestor d'apañar y organizar l'escedente. Entós diose-y nome al poder, y personalidá propio. Foi daquella cuando la xente empecipió a vese atrayío por esa seducción: institucionar los sos necesidaes, alministrar los sos suaños, burocratizar les sos necesidaes... ello que'l medio tornose'l fin y la vida humano namás nuna nayenación mental permanente. Asina nació l'Estáu de les coses. Asina se trazó la primer llínia nel suelu más allá de les que dibuxaben los ríos, el mar y les montañes; l'única llende conocía naquel momentu.

El casu ye que nomada seducción namás funcionaba'n dalgunos círculos. N'otros, bien por idealismu, bien porque nun yera afayadiza esa situación pa ellos l'atracción camudaba'n repulsión, refuga, escentricidá. Y ellos en repulsa, refugaya, escéntricos; elles amás en complementu circunstancial (depués de tener sío la base l'aprovisionamientu enantes que les coses garraren un orde, que'l tiempu ye de too menos agradecíu).

Primeramente impúsose La Fuerza. Baxu'l combayar pa colos dioses, mitos y cualquier artículu que valiera pa rellenar los furacos que dexaba'l conocimientu, La Fuerza campaba al so presto, nun s'esmolecía más que de la cantidá a aplicar en cada momentu. Yera aquella una represión a cara perru d'una sincera contundencia a la que-y valia cola lexitimidá que-y apurría l'Inorancia.

Col tiempu l'equidistancia de los dioses paso-yos factura y hebo topar rempuestes no mortal. Si la paciencia ye divino, l'impaciencia ye humano; y na tierra la relatividá facía que'l pasu del tiempu ficiera estragos acelerando'l procesu. Ello ye que l'Inorancia, a lo menos no tocante al conocimientu, dexó de tener un papel importante pa dexar pasu al Por qué. Lo que fexo que dios perdiera la gracia y ficiera falta escarbar pa topar los mitos na razón. Y l'Estáu les coses entamó a meter nel so discursu a les persones, volvió a apañar los mieos básicos (potenciaos agora col buen trabayu de La Fuerza) y los dioses tornaron d'espíritus a benefactores universales. El negociu yera esti: el Benefactor facía xirar la ruleta y concedía-y a les fiches la seguridá de poder seguir en xuegu. Lo círculos fixéronse concéntricos según cual taba más averáu a l'exe y les fiches (negres, roxes y otros colores que nun facíen más qu'aportar mayor variedá cromático) espardiéronse pel tableru. Elles teníen la seguridá de que nun mal xiru de ruleta, cuando pola inercia golpearen los bordes del tableru, el Benefactor pondría a la so disposición tolos medios al so alcance (o a lo menos los estrictamente necesarios, en función de ciertes necesidaes) pa emburrialos y seguir alantre, amás taben protexíes del restu de fichdes d'otros colores que namás queríen apropiase del cachu mayor de tableru que fueran quien y asina facer medrar les ganancies del so Benfactor. A cambiu, el Benefactor yera llibre de colocar les fiches n'onde más-y conviniera cola fin de facer ganancia col xuegu y seguir xugando. Nesi sen, el xuegu en sí mesmu yera l'ultimu círculu concéntricu.

Al cabu del tiempu l'inercia del xuegu fexo que los Benefactores s'emborracharen d'él, que perdieren el finu balance ente l'utilización de les fiches y la inversión n'elles de la so ganancia y el xuegu entamó a asoceder como una carrera de númberos que se retroalimentaba col propiu movimientu de les cifres. La ruleta xiraba cada vez con más fuerza y la fuerza centrífuga facía estragos nes fiches, los Benefactores esta vez nun se podíen permitir parar el xuegu porque'l mesmu yera esclavu del so propiu movimientu. Nesti momentu les fiches taben soles, la lexitimidá de la seguridá yá nun funcionaba y garrábense tolo fuerte que podíen unes a otres sin tiempu pa ver de qué color yera cada una, bastante ye con tenese'n pie'n medio d'esta esfueya; alón a la lexitimidá del control. La lexitimidá baltaba, dalguna entrúgabase si dalguna vez tuviera per ende, si realmente namás existía na so estructura, non na vida de los elementos agonizantes nel tableru.

Un día d'estos, dicía una d'elles mientres suañaba cuentos, escribiremos tamién el final del Estáu de les coses. Y maldiciremos nesi precisu instante, que durante un momentu mos viemos reflexaos nuna ficha al débalu nun tableru. O quiciás sigamos suañando hasta l'eternidá si ye qu'esiste, el casu ye que lo madiciremos igualmente...tamos condenaos.

Escrito por Sumiciu el sábadu, 31 xunetu de 2010

Así corrió la suerte de este espectáculo, más o menos asistido o celebrado según su aparato, y también según el gusto y genio de las provincias que le adoptaron, sin que los mayores aplausos bastasen a librarle de alguna censura eclesiástica, y menos de aquella con que la razón y la humanidad se reunieron para condenarle. Pero el clamor de sus censores, lejos de templar, irritó la afición de sus apasionados, y parecía empeñarlos más y más en sostenerle, cuando el celo ilustrado del piadoso Carlos III lo proscribió generalmente, con tanto consuelo de los buenos espíritus como sentimiento de los que juzgan las cosas por meras apariencias.

Es por cierto muy digno de admiración que este punto se haya presentado a la discusión como un problema difícil de resolver. La lucha de toros no ha sido jamás una diversión, ni cotidiana, ni muy frecuentada, ni de todos los pueblos de España, ni generalmente buscada y aplaudida. En muchas provincias no se conoció jamás; en otras se circunscribió a las capitales, y dondequiera que fueron celebrados lo fue solamente a largos periodos y concurriendo a verla el pueblo de las capitales y tal cual aldea circunvecina. Se puede, por tanto, calcular que de todo el pueblo de España, apenas la centésima parte habrá visto alguna vez este espectáculo. ¿Cómo, pues, se ha pretendido darle el título de diversión nacional?

Pero si tal quiere llamarse porque se conoce entre nosotros desde muy antiguo, porque siempre se ha concurrido a ella y celebrado con grande aplauso, porque ya no se conserva en otro país alguno de la culta Europa, ¿quién podrá negar esta gloria a los españoles que la apetezcan? Sin embargo, creer que el arrojo y destreza de una docena de hombres, criados desde su niñez en este oficio, familiarizados con sus riesgos y que al cabo perecen o salen estropeados de él, se puede presentar a la misma Europa como un argumento de valor y bizarría española, es un absurdo. Y sostener que en la proscripción de estas fiestas, que por otra parte puede producir grandes bienes políticos, hay el riesgo de que la nación sufra alguna pérdida real, ni en el orden moral ni en el civil, es ciertamente una ilusión, un delirio de la preocupación. Es, pues, claro que el Gobierno ha prohibido justamente este espectáculo y que cuando acabe de perfeccionar tan saludable designio, aboliendo las excepciones que aún se toleran, será muy acreedor a la estimación y a los elogios de los buenos y sensatos patricios.

Gaspar Melchor de Jovellanos, 1796.

Escrito por Sumiciu el xueves, 29 xunetu de 2010

Non, a mi tampoco me presta que se tengan que prohibir los toros en Catalunya. Lo mesmo que tampoco me presta l'alderique interesáu que se entamó alredor (y que se siga permitiendo en La Terra el maltratu a los animales namás por damos el presto). Nun voi entrar nesa comparanza de penes patrióticos porque nun m'aporta nada entrar nesi alderique d'intenciones que se llevantó en cada llau. La verdá ye que una de les primeres coses que deprendes poles males siguiendo ciertu camín ye que, falándo d'identidaes -ello ye, de quien yes- tienes un grave problema cuando tienes daqué que demostrar.

En fin, a lo que diba, que a mi tampoco me presta el tema de la prohibición. En xeneral, como llevo viendo a dellos argumentar, nun me presta un res el tema les prohibiciones. Asina ye que vivo con mieu de que haya xente que tenga intención de matame y non lo faga pol solu fechu de que nun ta permitío, ye duro saber que l'única fonte de respetu a la que te pues acoyer ye'l mieu a la represalia del enemigu na solombra y non un ciertu respetu o valoración de l'otra parte. Pero en fin, toos sabemos que les lleis nun tan feches pa llegar a entendemos, sinon pa conseguir soportamos nun estáu (¿mayúscula?) de cierta represión que dura intervalos variables. ¿Nun ye llacerioso que l'únicu puntu de xuntura tocante a otra persona seya esi? "ye lo que hai" me contestará daquién darréu, como davezu. Y caún a lo suyo que hai que llevantar el país (anque nun tengamos mui claru cual y hasta que altura), namás mos queda rezar pa que un día nun mos topemos con esa persona nuna baxada de guardia llegal que mos dexe ensin la nomada defensa (por suerte o por desgracia, l'Estáu ye como Dios: diz tar en tolos llaos pero siempre encuentres requexos que escapen a lo misericordia, lo que atruya l'enfotu a la fe).

Por ello ye que quixiera que nun prohibieran el maltratu animal, namas que nun se prauticare y nun ficiera falta too esto, que fuera otru capote'l que mos sacare los colores...y prestábame que esa negativa pa coles prohibiciones guañara nun alderique nel que seyamos completamente coheretentes y (¿por qué non?) valientes. ¿Realmente necesitamos que daquién mos apunte pa facer lo que sabemos que hai que facer (o mos convien facer en bien de veces)? ¿realmente queremos ser llibres? pues vamos selo. Daquién dicía que la llibertá o ye completa o nun ye nada. Asina que ¿por qué non prohibido prohibir? llevemos el razonamientu hasta les últimes consecuencies, ye lo que hai nesa llínia argumental que comparto dafechu (más que los que l'asoleyen, supongo)...mientres tantu, vamos da-yos un respiru a los animales que nun podríen tener d'otramiente. Anque seya a costa de miramos nel espeyu y entrugamos quien coime somos.
Ver Comentarios (17) Temes relacionaos: Política 

Escrito por Sumiciu el llunes, 12 xunetu de 2010

Na llende, nesi pequeñu espaciu que per un llau mos dexen y al que, pel otru, mos presta retirar. Ellí onde nestos díes cásique nun cuerre l'aire y hai un alendar afogadizu que mos da lo xusto pa pasar el día. Dalgún diría que nós lo busquemos, que nós escoyimos esi camín y que ye de xusticia apechugar con tolos escayos que mos toque pisar n'andando per él. Lo cierto ye que la trampa taba na propia eleición, na necesidá (más visible o menos visible; meyor o peor llevada) de tomar parte nel baille de mazcaritos y bocines al altu la lleva o facete monxu de clausura o una especia consentía d'esllava social.

Ye namás un xuegu, mos dicíen, como queriendo envizcamos. Mientres ún s'entrugaba a qué venía tantu interés en que toos tomáremos parte en daqué que, según los mesmos promotores, nun tenía mayor relevancia. Naide da duros a cuatro pesetes, nin identidaes de baldre. La identidá, lo mesmo que la muerte nun western cualquiera, tamién tenía un preciu; lo mesmo que cualquier otru oxetu que se pueda acaparar en propiedá, pa vendelu o arrendalu darréu.

El poder ofrez la mercancia, engalánala d'arumes, colores encesos y (como buena puñalada publicitaria) axunta-y valor añadíu al portaor y una plusvalía que sabiamente reserva'l vendedor. Ello ye, como buen propietariu de la patria, la marca rexistrada y forma del plural institucional que remanez del pueblu por real decretu cortesanu. Y pa completar un cuadru bizarru dafechu, pedimos-y opinión a un cefalópodu (nun digan que nun somos integradores, non como esos relixosos y nacionalistes fundamentalistes que s'aconceyen p'adorar los sos ídolos y dorar dalguna píldora -cosa que nós nunca fadremos); yá mos reiremos de los paletos que intenten predicir la primavera según l'enfotu d'un esquil más alantre en quitando les payes del güeyu. Que a estes altures de l'orxía eyaculatoria, nin estremamos cual ye'l frutu de la nuestra semiente...

Lo dicho, naide cuenta cola Inquisión Española, tovía siendo'l cuadru más surrealista que un sketch de los Python. Anque a estes altures nun se puede echar la culpa a otros. Tampoco se puede acusar a naide, quiciabes a lo más que podamos aspirar a curtiu plazu ye a pidir que mos dean un respiru...

Escrito por Sumiciu el xueves, 25 febreru de 2010

Toi acabante de lleer esti artículu (en castellán) que me llamo muncho l'atención. Anque nun pudi lleer l'articulu orixinal de Nature, y probablemente nun seya'l únicu resultáu tocante a esti tema. Sicasí paezme bien representativu de la dirección na que apunta'l nuevu conocimientu que tamos garrando en campos como la neurociencia que tien implicaciones fonderes en cuestiones morales y filosófiques. Ello ye que nel artículu afírmase que:
Investigadores del Institutu de Tecnoloxía de California (Estaos Xuníos) y del Trinity College de Dublín (Irlanda) toparon la primer prueba fisiolóxica de que'l celebru respuende énte la desigualdá como un auténticu Robin Hood.

Los resultaos de la investigación, publicaos na revista Nature, asoleyen que los centros venceyaos a la recompensa nel cerlebru humanu respuenden con más fuerza cuando una persona "probe" recibe una recompensa económica que cuando lo fai una persona "rico". Incluso si'l celebru que s'observa ye'l de la persona "rica".


Esto nun creo que seya interpretable nel totalitarismu de si'l ser humanu ye buenu o malu por natura, realmente nun me parez cosa d'otru mundu pensar qu'un animal tan social como ye'l ser humanu tenga desarrollao capacidaes pa empatizar con otros "collacios" de forma tala que "condergue" les desigualdaes daes nun grupu cola fin de da-y fuerza al bientar coleutivu que-y apurra'l meyor abellugu a él mesmu dientro d'esi grupu. Ye una posibilidá, ye almito que ye una posibilidá tan guapa que curre ún el peligru de dexase arrastrar per ella...esperemos que nun seya asina.

Ir a página 1 2 3 4 5 6 ... 23 24 25