Creative Commons 3.0 RSS CSS 2.1 XHTML 1.0
Entrar  
Rexistru
El sótanu del paraísu... 
Escrito por Sumiciu el martes, 3 marzu de 2009

¿Suañasti dacuando con llograr lo imposible? ¿Con creyer que una sola persona ye quien a da-y una vuelta de tuerca al mundiu, o a lo menos, vese que ye quien pa con ello?

Yo davezu suaño. Suaño con tornar a falar otra vuelta con quien sé que yá nun puedo, sentir el so alendar forzáu abrime los güeyos y el so calor costante faceme sentir abellugáu. Esa sensación tan prestosa de nun tar solu. Con escaecer aquella piel frío que me decía alón mientres dambos descansabemos yá con un xestu más aseláu. Caún a la so manera, tú decisme que trabayare, que lluchare y siempre alantre; mientres yo guardaba la to presencia en caúna les pallabres que me dexasti emprestaes pa siempre. Agora yo teo un tesoru, lo mesmo que Asturies, como decía'l cantar. Quixera cuidalu como homenaxe caberu.

Y nun canso de suañar. Suaño que puen les ganes, que paso una nueche entera na fábrica de suaños. Ente pantasmes. Que baltiamos muries pergrandes, que somos invencibles. Suaño que baillamos n'éstasis serenu. Ensin creyelo. Coles manes tan cansaes como caldia la tiesta y asoleyando una sorrisa que manca nos llabios pola so fuercia.
Que con una hostia, desanicio l'escaezu. Sé que equí nun tien na que facer porque esi fueu que mos prendió la sangre escribirá con lletres eternes el tastu euforizante que saborguiemos esi día. Cola meyor sensación del mundo, la de sentite realmente llibre.

Suaño col páxaru al que canciaba Laboa, con ales, siempre con ales. Pa que nun dexe d'esnalar p'enriba nos y mos recuerde de contino que nel cielu ye él el que abre los caminos.

Suaño con ganar l'amarraza, bueno val, a lo menos una batalla. Con que lo absurdo nun trunfe per un día. Con que podamos rimos a la cara de los perros ensin que, por esta vegada, mos mueye la baba rabioso. Con ver a la xente nos chigres y non nes fueyes. Suaño con xusticia, pero d'esa que nun se viende nin s'imparte, esa de la que bebemos por necesidá pa sentimos humanos.

Suaño col to país. Con comida onde hai escombru. Con que la sangre seya ketchup y la polvora nun fale más que de españíos de folixa. Suaño con vete vivir, esta vegada ensin el sobre delantre.

Suaño con desaloxar d'equí a toa esta xente que fai d'estra a costa nós. Facer del cuartu d'esclavos el nuestru requexu, da-y color. Con desenguedeyar los duviellos y topate a tí, namás a tí a la fin del filu. Y pasar nueches enteres escribiendo cantares esperando a que duermas.

Suaño con ver funcionar la fábrica de suaños, la que delles veces m'apurre dalguna sorpresa; que yo sé que de nueche, callandina, trabaya y mirame fixa a los güeyos pa que, pase se lo que pase, yo nun me duerma.