Creative Commons 3.0 RSS CSS 2.1 XHTML 1.0
Entrar  
Rexistru
La actualidá llaboral asturiana 
Escrito por ObservatoriuLlaboral el miércoles, 29 abril de 2009

Según informa Infoasturies:
Cuasique 10.000 persones desempleaes más se rexistraron nos trés primeros meses del añu. Hai previsiones que falen de 18.000 paraos y paraes más en 2009. La tasa de parui n'Asturies ye del 12,1%.
El paru xubió esautamete en 9.600 personas, lo que supón un 19,57% en rellación col trimestre anterior, colo que'l número total de desempleaos asitióse en 58.500 persones con una tasa de paru del 12,1%, según los datos de la Encuesta de Población Activa que fizo pública l'Institutu estatal d'estadísica. Tocántenes la tasa d'actividá asturiana llegó al 52,11%, ochu puntos per debaxo de la media estatal, que ye de 60,15%.
Va pocu les previsiones falaben de que no que queda de 2009 podría medrar el paru nunes 18.000 persones qu'averaríen la cifra total a les 80.000 persones. Les previsiones nun suelen ser fiables y, viendo la progresión del primer trimestre, de caltenese'l crecimientu de más de 9.000 persones al trimestre podría llegar a xubir en más de 27.000 pesones nos3 trimestres caberos.

Escrito por ObservatoriuLlaboral el miércoles, 22 abril de 2009

Según informa Europa Press:
Cuatro de los principales sindicatos asturianos (CC.OO, UXT, USO Y CXT) cree que l'añu pasáu pudieron morrer n'Asturies unes 380 persones por enfermedaes llaborales, dolencies que nun se rexistren a nun ser que seya por resolución xudicial. Les centrales denunciaron tamién que los empresarios nun inclúin ente les sos prioridaes la prevención tanto de la siniestralidá llaboral como d'estos problemes de salú, y alvirtieron que son cola situación de crisis esti problema se ta agravando.

Jesús Alonso (CC.OO), Pedro García (UXT), Jorge Gallego (USO) y Jorge Muñiz (CXT) ofrecieron güei una rueda prensa p'anunciar la manifestación que, nel marcu de la xornada mundial pola seguridá y la salú nel trabayu, va celebrase n'Uviéu, convocada por estes organizaciones. Va salir a les 12.30 hores de la Plaza d'América y va acabar na Plaza d'España, ante la Delegación de Gobiernu. Movilizaciones d'esti tipu van tener llugar en tol Estáu y diferentes ciudaes d'Europa y del mundu.

Nel trescursu de la rueda prensa, Jesús Alonso esplicó que se calcula que les muertes por enfermedaes profesionales son diez veces superiores a los casoas por accidentes nel trabayu, según estudios que considera autorizaos y solventes. Poro, si n'Asturies nel 2008 hubo 38 muertes por accidentes, los sindicatos estimen que les muertes por enfermedaes puen rondar les 380, si bien Pedro García recordó que "son estimaciones sindicales, porque nun existe nenguna estadística al respeutu".

De fechu, Alonso esplicó que casi "nun hai rexistru d'enfermedaes llaborales", y les que se rexistren descienden añu tres añu. Punxo l'exemplu d'Asturies, onde nel 2007 se confirmaron 606 casos, y nel 2008, 524. "Tamos asistiendo a un descensu de la reconocencia d'enfermeades llaborales, y un aumentu de la xudialización d'estos casos, lo cual quier dicir que los trabayadores se ven obligaos a recurrir a los tribunales pa exercer los sos derechos", matizó García.

Poro, ún de los "puntos principales" de la movilización, según el representante de CC.OO, va se la "tapecedura d'enfermedaes llaborales", y el "papel que xueguen les mutues nesti sen". Criticó nesti puntu la propuesta de la patronal de que seyan estes compañíes les que xestionen les enfermeades y recordó qu'un reciente informe del Tribunal de Cuentes "les acusa de falta de tresparencia, contrataciones arbitraries, incumplimientu de compatibilidaes, fraude o falsedá documental". "¿Pa qué ampliar les inxusticies?", protestó, en referencia a les organizaciones empresariales.

Según los datos de los sindicatos, ente les princpales dolencies, figuren les enfermedaes músculo-esquelétiques, les de la piel, les sorderes y les respiratories. Señalaron tamién riesgos psicosociales, como'l 'estrés' o l'ansiedá.

El representante d'USO acusó a los empresarios de nun dar prioridá a la seguridá, a la qu'anteponen "el beneficiu", y aseguró que tán aprovechando los tiempos de crisis "pa calcar nuna mayor precariedá" y recordó que los trabayadores "siguen en manes de veraderos pirates, que roben dineru a costa de los trabayadores", en referencia a los empresarios.

Escrito por ObservatoriuLlaboral el llunes, 20 abril de 2009

Según informa Asturnews:
La cifra de negocios nel sector servicios baxó un 16,9% en febreru n'Asturies, meyorando la cifra estatal del 20,5%, la mayor de los seis últimos años.

Según los datos espardíos pol Institutu Nacional d'Estadística (INE), l'actividá nel sector tuvo un comportamientu negativu en toles comunidaes autónomes, siendo Asturies, xunto con Cantabria, la tercera con una menor cayida, per detrás de Galicia (-14,2%) y Aragón (-16,3%).

Escrito por ObservatoriuLlaboral el miércoles, 15 abril de 2009

Según informa Europa Press:
La compañia Daorje, auxiliar d'ArcelorMittal, va retirar l'Espediente de Regulación d'Emplegu, ERE, que contemplaba la estinción de 103 puestos de trabayu a cambiu de negociar col comité d'empresa un ERE temporal que diba afeutar a la totalidá de la plantiya, que supera los 500 trabayadores y que se va aplicar el 1 de mayu al 31 d'avientu.

Según esplicó a Europa Press el secretariu de política Industrial de CC.OO d'Asturies, Nicomedes Sánchez, Daorje yá tien en marcha un ERE temporal pa 161 trabayadores nel que, la vez que más trabayadores tuvieron regulares fueron 34. Dende l'entamu de la so aplicación, nel mes de xineru.

La compañía tomó esta decisión tres cerca d'ocho hores de negociación colos sindicatos y el comité d'empresa nel Serviciu Asturianu de Solución Estraxudicial de Conflictos, Sasec, lo qu'evita la fuelga indefinida que convocaren los trabayadores de magar esta madrugada.

La decisión llegó tres una negociación "mui dura", na que los mediadores del Sasec y el propiu director xeneral de Trabayu del Principáu, Antonio González, foi fundamental. "Entamamos el conceyu a les diez de la mañana y a les 13.00 hores nun había nengún tipu d'acordies", dixo Sánchez.

Sánchez afirmó que los sindicatos esperen que, nun siendo que la situación "empeore muncho cola parada d'un de los fornos altos de Veriña per parte d'ArcelorMittal", la empresa aplique l'ERE con asemeyaos criterios colos que tán aplicando l'actual, unviando a los emplegaos a casa sólo en momentos nos nun haya trabayu. Dixo amás qu'existe una comisión de siguimientu que "vino funcionando bien" y que va siguir faciéndolo.

Escrito por ObservatoriuLlaboral el llunes, 13 abril de 2009

Según datos del Inem sobre movilidá xeográfico en 2008, un total de 31.179 trabayadores asturianos abandonaron Asturies pa trabayar n'otros llugares de L'estáu, mientres 19.282 trabayadores de L'estáu vinieron a trabayar a Asturies con un saldu negativu de 11.897 persones.

Anque'l saldu negativu ye un 14% menos que'n 2007 los datos siguen colocando a Asturies como ún de los llugares con mayor tasa negativa.

Ver documentu

Escrito por ObservatoriuLlaboral el miércoles, 8 abril de 2009

Según informa Europa Press:
La multinacional ArcelorMittal anunció güei a los sindicatos la so decisión de parar la producción d'ún de los altos fornos de les instalaciones de Veriña, en Xixón. Asina lo comunicó nel conceyu del Comité restrinxíu que se celebró güei en Luxemburgo.

ArcelorMittal yá anunciare a los sindicatos qu'esta parada podía tener llugar nel segundu semestre del añu si la demanda nun evolucionaba de manera positiva. Agora, la direición confirmó qu'esta parada va facese sobre'l 14 o'l 15 de mayu, según confirmó a Europa Press el coordinador de los sindicatos d'ArcelorMittal n'Europa y diputáu socialista nel Parlamentu asturianu, Luis Ángel Colunga.

La multinacional plantega la parada del Fornu Altu B de Veriña, Xixón "demientres unos meses" y caltener amás paralizada la llinia de Galvanizáu II y la llinia de pintura. "De primeres planteguen parar el fornu hasta setiembre, pero va depender siempre de la evolución de la demanda", dixo Colunga.

Colunga esplicó que la direición presentó güei los planes pa Planos y Llargos de toa Europa, qu'atraviesen una situación "realmente complexa", dao que de los cerca de 25 fornos altos sólo permencen en funcionamientu "unos diez o once".

Asina, ente esos planes tán tamién la "suspensión temporal" de dos fábriques, la de Liexa en Bélxica y la de Florence en Francia, que cuenten "con instalaciones mui asemeyaes a les asturianes, anque con menos plantiya", según Colunga, qu'añadió que se planteguen amás "un altu númberu de paraes y suspensiones d'actividá de munches otres instalaciones del grupu".

CONSECUENCIES N'ASTURIES

Les consecuencies d'esa parada del formu altu n'Asturies tán tovía por determinar. Los sindicatos esperen que de magar la próxima selmana se puea concretar dalgo más sobre lo que va suponer la mesma. Asina, de mommentu, les organizaciones sindicales desconocen si van suponer o non l'aplicación d'un Espediente de Regulación d'Emplegu, ERE.

"Esto ya va ser una cuestión que deberán discutir los comités d'empresa de les diferentes instalaciones cola direición de la compañía", dixo Colunga, qu'indicó que "hai instalaciones como la de Liexa que tán nuna situación realmente dramática".

Escrito por ObservatoriuLlaboral el martes, 7 abril de 2009

Según informa RTPA:
Los trabayadores de Diasa-Pharma ufrieron una rueda de prensa pa dar a concer la so dirección actual.

Darréu más de tres meses ensin cobrar foron obligados a tar de vacaciones hasta'l prósimu día 14 que volverán a incorporase a la empresa, anque ensin saber qué pasará entós.

Depués de la cabera reunión mantenida col accionista, SADIM , esti dixo que nun podía alquirir el 60% de la empresa.

Agora los empleaos esixen que dalguna institución pública tome cartes nel asuntu y dea una solución a les más de 84 families que tan afectaes por esta situación

Ir a página 1 2