Creative Commons 3.0 RSS CSS 2.1 XHTML 1.0
Entrar  
Rexistru
La actualidá llaboral asturiana 
Escrito por ObservatoriuLlaboral el miércoles, 22 abril de 2009

Según Asturies.com:
ArcelorMittal ta acabante d'anunciar a los sindicatos la so propuesta d'Espediente de Regulación d'Empléu (ERE), qu'afectaría en principiu a los 12.000 trabayadores de les instalaciones que la multinacional tien nel Estáu español, incluyíes les plantes asturianes d'Avilés y Xixón. Ye intención de la empresa que'l plazu máximu de duración del espediente sía d'un añu y afectaría a un máximu del 40% de les hores llaborales.

La propuesta d'ERE d'ArcelorMittal foi comunicada públicamente polos representantes de los sindicatos UGT, CC.OO y USO, que la calificaron como una "mala noticia" y "desproporcionada dafechu". Esti miércoles ta prevista una nueva reunión en Madrid ente la multinacional y los representantes de los trabayadores na que va analizase l'estáu de cada planta y en qué medida va afectar a caúna d'elles esti ERE.

Sicasí, de momento namás ta confirmao, segun fontes sindicales, que l'espediente va afectar a la totalidá de los trabayadores de les instalaciones de Madrid y Galdakano.

Escrito por ObservatoriuLlaboral el xueves, 9 abril de 2009

Un trabayador d'ArcelorMittal mancose ayeri de forma leve al raspiar la llocomotora que conducía con unos vagones que taben aparcaos cerca d'ella alredor de l'una de la mañana.

Escrito por ObservatoriuLlaboral el miércoles, 8 abril de 2009

Según informa Europa Press:
La multinacional ArcelorMittal anunció güei a los sindicatos la so decisión de parar la producción d'ún de los altos fornos de les instalaciones de Veriña, en Xixón. Asina lo comunicó nel conceyu del Comité restrinxíu que se celebró güei en Luxemburgo.

ArcelorMittal yá anunciare a los sindicatos qu'esta parada podía tener llugar nel segundu semestre del añu si la demanda nun evolucionaba de manera positiva. Agora, la direición confirmó qu'esta parada va facese sobre'l 14 o'l 15 de mayu, según confirmó a Europa Press el coordinador de los sindicatos d'ArcelorMittal n'Europa y diputáu socialista nel Parlamentu asturianu, Luis Ángel Colunga.

La multinacional plantega la parada del Fornu Altu B de Veriña, Xixón "demientres unos meses" y caltener amás paralizada la llinia de Galvanizáu II y la llinia de pintura. "De primeres planteguen parar el fornu hasta setiembre, pero va depender siempre de la evolución de la demanda", dixo Colunga.

Colunga esplicó que la direición presentó güei los planes pa Planos y Llargos de toa Europa, qu'atraviesen una situación "realmente complexa", dao que de los cerca de 25 fornos altos sólo permencen en funcionamientu "unos diez o once".

Asina, ente esos planes tán tamién la "suspensión temporal" de dos fábriques, la de Liexa en Bélxica y la de Florence en Francia, que cuenten "con instalaciones mui asemeyaes a les asturianes, anque con menos plantiya", según Colunga, qu'añadió que se planteguen amás "un altu númberu de paraes y suspensiones d'actividá de munches otres instalaciones del grupu".

CONSECUENCIES N'ASTURIES

Les consecuencies d'esa parada del formu altu n'Asturies tán tovía por determinar. Los sindicatos esperen que de magar la próxima selmana se puea concretar dalgo más sobre lo que va suponer la mesma. Asina, de mommentu, les organizaciones sindicales desconocen si van suponer o non l'aplicación d'un Espediente de Regulación d'Emplegu, ERE.

"Esto ya va ser una cuestión que deberán discutir los comités d'empresa de les diferentes instalaciones cola direición de la compañía", dixo Colunga, qu'indicó que "hai instalaciones como la de Liexa que tán nuna situación realmente dramática".