Creative Commons 3.0 RSS CSS 2.1 XHTML 1.0
Entrar  
Rexistru
La primera rede social d'Asturies. Niciu de l'analisis políticu y el bilordiu. 
Escrito por Sumiciu el xueves, 10 avientu de 2015

Diba a escribir una rempuesta p'apurrir el mio granín depués de lleer esti post d'Iyán, pero fuéseme la cosa de les manes y voi facer otru post siguien col tema. Aconseyo lleer l'artículu nomáu enantes anque nun ye imprescindible, de fechu solapo dalguna cosa paezme.

Yo voi dar un pasu más y entrugar ¿por qué non un Plan Enerxéticu (integral) p'Asturies? Los planes enerxéticos o intentos d'ello que se faen a nivel estatal amás de condenar a Asturies al papel que descriten paez que traten los problemes derivaos de la producción enérxetico de forma aislada y paezme absurdo nun tratar el problema en conxuntu. De fecho, nun veo otra forma de facelo con unes garantíes mínimes y con unes vistes mínimes a la sostenibilidá.

Pero un llau y pa entamar, planes de reducción del consumu. Sí, equí vamos a chocar dafechu con delles empreses del sector, pero hai que ser conscientes que l'actual capacidá de xeneración nun se puede mantener nel tiempu. Y paezme qu'esti tema hai de tratalu más en clave enerxético qu'económico: va a abaratar costes obviamente, pero esto tien que ser una consecuencia.

Pa siguir, la producción enerxética asturiana debería cubrir les necesidaes enerxétiques d'Asturies; lo contrario nun ye de nenguna forma sostenible nin medioambiental nin económicamente. Sedría precioso vivir de xenerar escedente enerxéticu pero ello implicaría inorar les sos consecuencies. Como bien se dexó claro nel artículu, sirvir de xenerador de terceros nun beneficia en nada al país (na so acepción más amplia de territoriu, pola contaminación, y xente, pol trabayu)

La siguiente cuestión obvia ye reducir la dependencia enerxético y ye altamente cuestionable que beneficiu puede tener quemar carbón importao n'Asturies reduciendo'l país a una mera caldera en rellación colo comentao primero. El carbón namás tien interés como complementu y reserva estratéxico; ye un combustible llimitáu y contaminante, pero tamién necesariu. Tampoco se puede zarrar los güeyos y pretender que se puede prescindir del carbón tan allegremente, tien muncho pesu nel mix enerxéticu y ensin ello ye imposible xenerar la enerxía que se demanda, tovía cuntando con una reducción de la demanda. En llograr un compromisu ente la necesidá y los perxuicios ambientales paezme que ta la clave del asuntu. Creo qu'hai la suficiente capacidá pa nun tener qu'importar carbón pa usalo como complementu nesi mix y dame que'aumentaría la producción del mesmu si tenemos en cuenta l'actual polo qu'agora dalgunes empreses igual dexen de tar tan enfadaes colo que toi diciendo (anque van enfadase yá del too cuando falemos de que los sectores clave de la economía nun puedan tar en manes privaes...).

Pero como dixi, nun podemos enfotanos nel carbón, ye un recursu que tenemos y que'hai d'usar intelixentemente como reserva estratéxico y complementu: la base tien de tar nes renovables. Y en buscar una combinación de renovables que seya igualmente sostenible (la construcción de banzaos o aeroxeneradores tamién tien repercusiones nel mediu) y realista (n'Asturies podemos enfotanos lo xusto nel sol, anque nos pese). Pa ello hai de saber cuanto, cómo y n'onde fai falta y nun sé si daquién se dignó a facer esos estudios.

A la vista, paez que nos cuesta tantu pensar en global como actuar en llocal.

Escrito por Sumiciu el domingu, 28 xunu de 2015

Dalgunos entamaríen a contar esta historia dende'l 15M, nun momentu nel que manifestaciones en 50 ciudaes en tol Estáu punxeron fin al ermu de movilización social que reinaba daquella y daría niciu a una riestra de movimientos sociales estremaos qu'acabaríen por ocupar lo electoral en 2014. Pero voi evitar facelo porque paezme una forma peligrosa de simplificalo too y de poner nesta fecha artificialmente'l entamu de la Historia como pretenden dellos.

La vindicación del exerciciu del poder popular ye una reivindicación vieya, que s'intenta desarrollar dientro de corrientes distintes lo mesmo marxistes, como anarquistes, verdes... a lo llargo de la Historia. El “ciudadanismu” que surde a raíz del 15M nun ye más qu'una adautación de mínimos d'esos pensamientos onde puxa más la rabia del momentu qu'un verdaderu fondu ideolóxicu y, sobre too, d'una concienciación xeneral de la toma del poder o, a lo menos, de toma de la palabra.

Asina ye que, como resultáu de too ello, alcontrámonos anguaño con dinámiques enfrentaes ente los que busquen una mayor participación de la xente na topa de decisiones (y dientro d'estos, los que lo faen por enfotu nello per un llau y los que lo faen por oportunismu escontra unes decisiones que nun-yos gusten independientemente de la forma na que se llegare a eses resoluciones) y otros grupos que se ven amenazaos por esi posible avance al nun ser quien a adautase a les nueves condiciones político-sociales pa defender nelles los sos intereses (dacuando porque cualquier cambiu de dinámica-yos fadría perder en dalgún grau influencia na toma de decisiones).

El principal problema qu'atopamos nel exerciciu de la toma de decisiones popular ye que, frutu d'esa falta de base de conciencia qu'emburrió eses dinámiques, alcontrámonos con que tamos construyendo la casa pel teyáu. Esto ye, tamos intentando involucranos nuna toma de decisiones na que tovía nun sabemos usar les ferramientes que necesitamos pa decidir, pa discutir, pa consensuar, pa plasmar el nuestru naguar nes nuestres decisiones... Nun se confunda esto con insinuar un paternalista “nun sabemos lo que queremos” sinón más bien sedría un “nun sabemos como andar el camín hasta onde queremos llegar”, lo que ye normal y forma parte del procesu. El problema ye cuando s'obvia esta cuestión.

El fechu del trabayu más o menos asambleariu (munches veces dase-yos esti nome a procesos que nun merecen calificase como tal) nun se llogra d'un día pa otru nin ye frutu namás de la voluntá sinón de deprender y facer pedagoxía sobre la práutica mesma. Magar que nun tamos criaos nesa cultura social y lo pudimos adquirir de forma diario, ye preciso deprender d'otres formes esos vezos y ferramientes; y ye preciso qu'haya actores que puxen por esi procesu y apurran los preseos amañosos pa ello. Tradicionalmente ocupáronse d'esti llabor les organizaciones polítiques, pero güei estes organizaciones renuncien na so mayoría al so papel social pa centrase casi esclusivamente na cuestión electoral, col déficit que se crea asina nes rellaciones polítiques y el vacíu preocupante que dexen socialmente nesti puntu. Hai qu'insistir en que nun se puede construir nada sobre la base ensin facela primero sólida y que l'éxitu electoral tien que ser un frutu de la construcción social yá que ye nun ye vidable otramiente.

Mientres escribo estes llinies gobernantes de la UE llévense les manes a la cabeza y ponen el deu nel gatillu tres la decisión del gobiernu griegu de consultar a la so población sobre si aceptar o non un nuevu contratu cola Troika (nómese como se nome'l collar del perru). El restu, medio aturdíos, vemos como la trampa rescampla (anque tampoco ye que se descubriera agora, sí que ye curioso ver como s'escenifica de forma tan claro); cómo la Europa de la unión nun ye más qu'una construcción asocial na que los gobernantes traten y apuesten dando'l llombu a los ciudadanos y que cuando se-yos llama a estos a preguntar salten tolos resortes al ver que'l caballu escapa de la cabezada. Les construcciones institucionales que s'entamaron nos últimos años nun tienen otru fin que'l d'aislar a la xente de les decisiones que se tomen nel so nome. Casu paradigmáticu ye tamién el del TTIP onde roza yá'l ridículu non solo poles formes si non tamién pola aceptación de les mesmes. Al final, paez que la sociedá de la información (que non del conocimientu) más que trayemos la tresparencia va a trayemos el golor de les alcantarielles institucionales siendo nosotros, otra vez, testigos pasivos.

Tenemos exemplos tamién a más pequeña escala de problemátiques asociaes a les consultes, como pueden ser les que remanecen de los resultaos de les últimes elecciones municipales onde organizaciones baxo'l paragües de Podemos tomen decisiones sobre posibles pautos que pequen per un llau de la inxenuidá del a ver que pasa con errores como'l de nun ciñise a los simpatizantes nun censu claru sinón de dexar un votación abierta a xente non comprometío col proyectu qu'al final tienen qu'asumir los que realmente lo tan mientres qu'enfrente topen la lóxica monolítica de réxime vixente (al qu'aspiren xeneralmente a integrase) que refuga dafechu toa incursión d'actores que nun pueda controlar nel exerciciu de les rellaciones polítiques.

Asina ye que, si realmente queremos la palabra, tenemos que concienciamos pa exercela y concienciamos tamién en que va haber actores que s'opongan frontalmente a ella por desafiar unes rellaciones nes que se movíen en comodidá, yeren quien a predicir y ven cómo se-yos escapen de les manes, anque nun van quedar paraos mientres eso pasa. Nun ye una votación nin dos, ye pensar si realmente queremos construir unes rellaciones nes que tengamos la palabra y poner tolos medios posibles nello.

Escrito por Sumiciu el domingu, 14 xunu de 2015

Pasó la resaca plenaria y pos-electoral n'Asturies dexando, según quién y ónde, estremáu tastu. Una visión xeneral al mapa institucional del país reflexa, una vez más, un dominiu agobinante de la FSA que caltién baxo la so hexemonía un bon númberu de conceyos col añadíu previsible del gobiernu autonómicu. Nesi sen, l'añu del cambiu reflexa un continuismu de los vieyos poderes que sí qu'alcuentren a lo menos una oposición más bayurosa y unes mayoríes más febles. Por embargu, cola llei electoral na mano, la variedá y mayoritaria suma nes oposiciones nun garantiza que gobiernen sumes de llistes que, anque mayoríes, nun seyan absolutes.

El focu mediáticu lleváronlu les dos mayores ciudaes d'Asturies, amás de lo que yá nos tienen avezaos, esta vez xugóse nelles una partida ente les fuercies que surden y les que s'agarren al escañu. El vezu de siempre ye'l d'analizar too estos movimientos en clave partidista, lo mesmo autonómica qu'estatal; pero esta vez sí xugaron un papel prioritariu les particularidaes llocales de cada sitiu.

Empecipiando per Xixón, onde se pasó d'un posible pautu a tres bandes ente'l PSOE, Xixón Sí Puede ya Izquierda Xunida a una rotura provocada pol resultáu d'una consulta abierta a tola xente que se convocó depués de tener entamaes les conversaciones de pautu y onde la negativa punxo pates arriba les rellaciones ente delles formaciones y abrió otra amarraza n'Uviéu forzada pol revanchismu de la FSA al vese perder la cobiciada plaza xixonesa. Per un llau, Izquierda Xunida arroxábase rápidamente a los brazos del PSOE playu repitiendo les dinámiques que nun son estrañes nos últimos llustros mientres s'intentaba l'acercamientu ente'l conxuntu d'estes dos fuercies y Xixón Sí Puede, qu'allegábase y alloñábase al debalu. Darréu, tal y como prometieren primero de la campaña, entamóse una consulta sobre a quién tendríen de votar los sos conceyales nel plenu d'investidura; siendo'l resultáu d'esta consulta la negativa a votar al candidatu socialista y, por contra, tirar pol so propiu candidatu. Esta posición abriría la caxa de pandora nes files de la FSA qu'acabaría cargando con una campaña mediático de gustu duldosu escontra la formación política a la que-yos pruía allegar y, en xeneral, escontra too lo que se movía per Xixón que nun yera del so agradu.

Con estes blimes, Carmen Moriyón fízose col puestu d'alcaldesa non ensin movimientos de la FSA que tomaríen nota y represalia pola respuesta de la ciudadanía xixonesa na consulta y qu'obligaría a la marca Uviéina a romper un pautu que yá taba zarráu per parte los actores llocales nuna inxerencia perclara n'autonomía llocal de l'agrupación de la ciudá (que sicasí paeció acatar).

Enllazamos asina con Uviéu, onde los resultaos de les elecciones ofrecieron una posible xuntanza por parte de Somos, PSOE ya Izquierda Xunida (n'orde de mayoríes) pa sacar a Caunedo de l'alcaldía; esto algamaríase con un pautu firmáu poles trés fuercies y que allugaría a Taboada al frente del ayuntamientu uvieín. Esti pactu solmenaríase enforma tres la mencionada decisión d'alrodiu de 160 popes de la FSA tomada nuna cena en La Gruta qu'anunciaba asina la posibilidá de que Caunedo continuara n'alcaldía. Nun foi asina gracies a un xiru d'última hora nuna estrañísima sesión plenaria na que Ana Taboada se proponía como candidata pero onde Somos ya Izquierda Xunida votaríen pol candidatu “socialista” Wenceslao López (terceru en discordia) dando-y a esti l'alcaldía. Los conceyales de Somos pondrán el so cargu a disposición de l'Asamblea Ciudadana p'afirmalos y pa concretar los términos del mesmu. Y ye que nin los mesmos afiliaos a Izquierda Xunida o Somos tuvieron conocimientu y por estensión pudieron dar el parabién a esi cambiu de rumbu d'última hora.


Les cuestiones que queden abiertes a la vista d'estos movimientos son per un llau, la capacidá que pueden tener partíos como Somos o Izquierda Xunida pa que los sos cargos tomar decisiones con consecuencies de gobiernu ensin entruga previa a les bases y la validez de la tan repetida frase de “lo que diga la xente” una vez la suerte ta echada. Yá que, al tiempu que probablemente fuera l'acción deseada por les bases, nun tuvo'l consentimientu previu de les mesmes al tar supuestamente forciada polos estrechos tiempos que se manexaben (anque los dirixente autonómicos paecíen apuntar díes atrás a esti tipu soluciones ensin especificar).

Y per otru llau, la cuestión de contar cola FSA nun supuestu frente d'izquierdes o de cambiu. ¿Puede contase pa ello con un partíu qu'afitó la so hexemonía y dominación per más trenta años nel país? Anque a nivel autonómicu el consensu ye más claru y muncha xente na izquierda tea d'acuerdu que nun se puede tener en cuenta a la FSA como fuerza d'izquierdes, paez que nel ámbitu llocal la rempuesta sobre si se puede permitir o non collaborar con ellos va por barrios. Nesti casu concretu, ¿son les mesmes les situaciones d'Uviéu y Xixón tocante a la rellación de la izquierda col PSOE? La respuesta ehí sí ye clara y ye non. Nun olvidemos que'l pasu del PSOE pelos gobiernos xixoneses nun foi de baldre y que les sos ferides tovía escuecen lo mesmo na xente como na propia ciudá que se ve somorguiada n'investigaciones por irregularidaes en macroproyectos arecianos talos como El Muselón. Naide nun olvida en Xixón la represión y el tapecimientu de toa oposición popular exercida polos sucesivos gobiernos del PSOE. Especialmente ta'l recuerdu d'Areces y Felgueroso. Nun hai que recordar que Xixón y Les Cuenques suponen exemplos paradigmáticos n'Asturies de soberbia “socialista”, clientelismu y represión. Mientres tantu, n'Uviéu, queda muncho más lloñe los años 80 y principios de los 90 d'Antonio Masip contrastando col dominiu y hexemonía popular del PP dende 1991. Esto nun fai a la marca llocal de la FSA ayerna a los pecaos de la so estructura, pero sí paez que fai olvidar nel conxuntu de la ciudadanía'l so collaboracionismu a la gueta de lo que se puede entender como una prioridá de relevar al PP del ayuntamientu. Y ye que nun creo qu'una opinión como l'asoleyada en Xixón se diera n'Uviéu por parte del conxuntu de la xente. Básome en suposiciones personales porque, obviamente nel casu d'Uviéu, esta consulta nun se dio y el clima políticu que puede palpar ún suxetivamente en comparación col de Xixón asina invita a pensar. Un pautu paecíu, anque ensin tantes vueltes, dióse en Llanera colos mesmos actores y, esta vez sí, mayoría socialista. La cuestión ye si con estos paréntesis llocales se puede facer frente a esi dominiu de FSA col fin de dir espulsándolos de les instituciones.

Con menos animación pasó'l día nel restu de conceyos asturianos: en Les Cuenques, Izquierda Xunida féxose colos ayuntamientos de Riosa, Mieres (onde diba con Izquierda Asturiana), Ḷḷena (onde resiste na oposición el conceyal de Compromisu por Asturies) y Llangréu (tres un pactu con Somos Llangréu qu'entrará, según la consulta popular, nel gobiernu municipal). Gobernará'l PSOE nel restu (Ayer, Morcín, Samartín del Rei Aurelio, Llaviana, Sobrescobiu y Casu), anque Izquierda Xunida tuvo cerca en Morcín y Samartín pero nun tuvo los apoyos afayadizos (esta vez el PP de Samartín nun consideró a bien ofrce-y l'alcaldía como fai cuatro años tando teniendo más conceyales qu'ellos incluso).

En Bimenes féxose'l PAS cola alcaldía sacando d'ella al PSOE que tuviera la mayoría tres un pactu con Izquierda Xunida y Xente Yerbato. N'Ibias el PSOE ayudóse del PP pa quita-y l'alcaldía a Nós Ibias. En Santalla d'Ozcos algamó'l mandu l'Agrupación Independiente de Santalla onde participaba Izquierda Xunida ya independientes. Izquierda Xunida, pela so parte, féxose coles alcaldíes de Castrillón, Illas, Grau y Teberga; en manes d'independientes tán tamién Sotu'l Barcu, Noreña (con dos conceyales de Conceyu Abiertu), Sariegu, Llanes (onde Vecinos por Llanes saca al PSOE de l'alcaldía tres trenta años ayudaos por Foro y PP).

Nel restu d'Asturies, el mapa ye esti:

Queden en manes de la FSA Castropol, A Veiga, Taramundi, Vilanova d'Ozcos, Samartín d'Ozcos, Grandas de Salime, El Franco, Bual, Eilao, Pezós, Ayande, Navia, Cangas del Narcea (onde se valió de los votos d'IX y Foro), Valdés, Tinéu, Belmonte, Somiedu, Pravia, Candamo, Yernes y Tameza, Proaza, Quirós, Les Regueres, Santo Adriano, La Ribera, Avilés, Corvera, Carreño, Siero, Llanera (tres pactar con Somos ya IX), Villaviciosa (cola ayuda de Foro quitando-yla al PP), Cabranes, Nava (onde Agora Nava sacó un conceyal), Piloña, Colunga, Parres, Ponga, Onís y Ribadedeva.

En manes del PP tán San Tirso d'Abres, Tapia (gracies a Foro), Cuaña, Villayón, Cuideiru (tres 24 años d'alcaldía socialista apoyaos por Foro y Vecinos por Cudillero), Caravia, Cangues d'Onís, Cabrales y El Valle Baḥu de Peñamellera

Pela parte de Foro Asturias, tendrán el mandu en Salas, Ribeseya (onde pueblu llograron 2 conceyales), Amieva y El Valle Altu de Peñamellera.

Queda pendiente'l plenu del ayuntamientu de Gozón onde'l PSOE, empatáu a 6 conceyales col PP ta pendiente de la impugnación d'unos votos.

Escrito por Sumiciu el sábadu, 25 abril de 2015

Hai una cosa que paez que ta quedando clara de cara a cómo va a ser la composición de la próxima Xunta Xeneral del Principáu: nun va haber mayoríes absolutes. Y non solo eso, sinón que fadrán falta pautos de multitúes (más de dos) porque per un llau ruémpense los bloques tradicionales cola entrada de nuevos invitaos y per otru, si nos fiamos de la tónica dominante nes encuestes, vamos movemos nunes folgures peraxustaes.

Asina ye, mientres qu'hai xente esmolecida pol aciertu de les encuestes (de les que vais permitime que seya mui escépticu, sumando a la so tradicional falta de fiabilidá'l fechu de que movémonos nunes diferencies que son persensibles a los márxenes d'error que manexen), de quien ye'l primeru y quien ye'l segundu, seya esto na práutica irrelevante pensando en cómo se puede influir nel gobiernu saliente.

Nun hai qu'olvidar con estes condiciones, que la importancia final nun la tien la suma d'escaños propia, sinon les posibles combinaciones col restu de fracciones, col curiosu collateral de que a un partíu nun-y interesaría tanto'l so propiu resultáu aisláu como'l mesmu en rellación al restu de fuercies.

Sé qu'hasta agora nun fici equí más qu'un repasu d'obviedaes, pero la práutica pre-electoral da a entener que estes obviedaes nun son tales. Siguen presentándose propuestes y formes de mayoríes que difícilmente pueden tener encaxe nun marcu de negociaciones, lo mesmo que se tan posponiendo la toma de posiciones necesaries de cara a arrancar compromisos y cambios más a llargu plazu que pueden facer que la fuerza de la marea lleve per delantre'l futuru d'esos futuribles castiellos.

Les consecuencies d'esta coxuntura son (sedríen) curioses. Dientro d'una dinámica na que les nueves fuerces refuguen un etiquetáu izquierda-derecha, paez que va a ser la suma d'estos dos bloques y los posibles "tresfuguismos" nesa exa los que definiríen el dominiu parlamentariu. La entruga ye si'l votante va a tener esto claro cuando faiga usu de la papeleta, porque como buena política de bandos y cola concentración de votos que se taría dando, nun se vota tantu a favor como escontra. ¿Y escontra qué votamos? ¿Escontra un bipartidismu asentáu? ¿Escontra un posible gobiernu de dereches (izquierdes)?

Falo de bipartidismu porque, anque n'Asturies esta afirmación pueda ser más cuestionable, la práutica política asturiana ye ayena a Asturies: nun ye más qu'un allargamientu de la práutica política central nun cotu menos onde unos señores xueguen nes tierres que-yos dexa'l rei pal so divertimentu col enfotu d'un cachín de poder y ¿por qué non? ser quien dacuando a allegase un pocu más a la corte que tien como referencia. Y nun nos llevemos a engañu, nun falo equí nin d'independentismu o unionismu sinon a un meru sucursalismu que fai del fechu autonómicu un meru plató secundariu o una trinchera d'una llucha que tien el so campu de batalla a 400 kilómetros y nun ta venceyada a unos supuestos intereses comunes estatales sinon a la capacidá personal de medrar.

Esti fechu de l'alienación política asturiana taría espeyáu nel fechu de que l'electoráu asturianu seya especialmente sensible al marketing políticu estatal convirtiéndose na punta de llanza d'organizaciones como Podemos enantes de ser quien a asoleyar un discursu nel país, que les organizaciones de carácter llocal o asturianu que nun tengan referente con capacidá de salir nos medios acullá'l negrón se vean mermaos, qu'un partíu títere como'l PP asturianu que nin pincha nin corta siga aspirando a tener un resultáu aceptable o que organizaciones con una implantación perprobe como Ciudadanos tean falando de sacar 3 o 4 diputaos.

La cuestión de la crítica a la exa izquierda-derecha ye tamién curiosa. Siendo Asturies un país con una implantación del discursu d'izquierdes tradicionalmente mayoritaria, paecería que l'ataque al poder dende posiciones progresistes nun necesitaría mázcares sinon que tendría muncho más fácil trabayar con un discursu con menos eufemismos y más fondu pa llograr axuntar unos cuadros fuertes y unes bases numberoses. Nun ye'l casu. Si bien la tercer vía de Ciudadanos que trabaya esi discursu cola so aproximación dende la derecha puede ser comprensible y ta llegando a facese un nome de marca blanca pa puxar poles polítiques lliberales ehí onde'l PP yá ta descartáu; puede ser que Podemos tenga topao nella más una fonte de problemes que d'oportunidaes. Sicasí, el desgaste políticu del PSOE como partíu de gobiernu y como partíu con conexón coles realidaes que diz representar sumada a la eterna segunda llinia d'Izquierda Xunida, sigue siendo'l so filón de votos cimeru.

Nun dexa de ser simpático, como vienen siñalando dalgunos, qu'haiga dos acercamientos al discursu "nin izquierda nin derecha" y venga caún precisamente de cada cabu d'esa exa qu'aseguren nun reconocer. La realidá ye necia a pesar del cinismu de cualquier llinguaxe políticu.

¿Y cual ye'l papel que queda a les clases populares nesti contestu? Los movimientos sociales y populares, cada vez más alloñados de la práutica política que se mueve no mediático y nuna dialéctica que dificilmente ye quien a dar un nome y, poro, soluciones a los problemes que se presenten paez qu'observa nuna actitú de posa cuál puede ser el so papel nesti nuevu escenariu una vez que les organizaciones que dicíen capitalizar a nomaos movimientos pasaron a la arena político asumiendo les sos formes y les sos prioridaes, les fuercies tradicionales d'izquierda intenten dixerir tantu movimientu y nun se ve más que'l llombu y la papeleta del restu cada cuatro años.

Quiciás nesti momentu de pautos, de midimientu de fuerces y de balanza de votos, topen una oportunidá los movimientos que viven al marxen del electoralismu pero qu'al empar nun pueden ser ayenos al parlamentarismu pola naturaleza de les sos propies vindicaciones pa facese oyer. Quiciás. O quiciás seya otra vuelta de tuerca que posponga los naguares a nuevos momentos y nueves táctiques que puedan llegar, o non.

Escrito por Sumiciu el vienres, 10 abril de 2015

De xeme'n cuandu presta volver pel chigre porque, vamos ser sinceros, hai coses y estaos de la nación que nun se pueden iguar dende otra parte. Y amás en tiempu preelectoral, qu'axunta a la primavera pa facemos ferver les cabeces y dalgún qu'otru xeniu.

Lo que más me presta del chigre ye la simplicidá que contaxa pa falar de temes que'n cualquier otru parlamentu del país tendríen unes complicaciones descomanaes.

Complicaciones descomanaes por exemplu como'l tema de la oficialidá de la llingua asturiana (entiéndase asociada a ella la del gallegu asturianu), esa reclamación política cola qu'una parte d'asturianos s'enfoten en poner enriba la mesa pates arriba cuando tamos comiendo, perdón, negociando.

La esperiencia diz que nel peor casu el debate sobre la oficialidá nun chigre allárgase tanto como seya necesario desplicar en qué consiste y en que non, y cómo aceptar la necesidá d'implementala tien un primer pasu obviu y pernecesariu en sentase a falar que forma-y damos. Normalmente l'argumentu fina con un "-pues si la quieren ¿por qué nun-yos la dan y yá ta?" nuna esclariadora tercer persona alloñadora qu'escueye paradóxicamente estes lletres pa espresalo y non otres. Pero vamos dexar lo diglósico pa otra ronda.

El casu ye que los argumentos p'afirmar la oficialidá y pasar a esi siguiente pasu nun apaecen pel chigre (sacante pa reclamos identitarios con arume a neftalina y paliu), pero surden de secute dende escaños y persones pensantes. Ye curioso cómo la política torna tantes veces nel arte de crear problemes o d'usar xuegos de pallabres pa defender o tapecer intereses que poco tienen que ver colo común desplaza la suposición de la función de deliveración y solución de problemes que-y asociamos al exerciciu políticu.

"Faime'l favor y echa otru culete que toi poniéndome más intensu de la cuenta y nun ye plan".

Munches veces, lo sensato impón tamién prioridaes. Una cuestión prioritaria ye estudiar cómo gastar 600 millones d'euros (ye increible lo fácil que lo escribimos unos y que lo gasten otros pa la incapacidá que tenemos el 90% de comprender verdaderamente esa cantidá) nun tren d'alta velocidá qu'axunte Avilés, Uviéu y Xixón. Y too ello ensin pensar cómo enllazalu a la via de fuga mesetaria que muerre en La Pola Ḷḷena (de momentu). Supongo que ye una cuestión de priodaes y xacíu común pensar en cómo facer una isla d'alta velocidá d'unos 50km de diámetru que da-y una solución a un conflictu llingüísticu.

Prioritario tamién ye dar inglés de cualquier forma (nun tengo claro que deprendelo lo seya tamién, visto lo visto). Supongo que da valor social el forzar la segregación que xustifique un itinerariu nel que nun existe malpenes preparación por parte del profesoráu, l'alumnáu o la sociedá'n xeneral. ¿Qué ye eso d'iguar l'enseñu de llingües nel que nenos que parten d'un contestu diglósicu puedan superar les torgues que tienen pa la espresión n'asturianu y castellanu? Quiciabes ye por corteza de mires pero tovía nun vi forma de deprender meyor a comprender y utilizar un conocimientu o habilidá que s'enfotare en olvidar o inorar otra habilidá complementaría. Pero ¡que sé yó! que tendrá que ver la clase col enseñu...

Tamién ye imprescindible gastar miles n'euros n'asesoramientu en campañes pa facer marca. Pa diferenciase, porque claro ¿acasu n'Asturies existe dalgún códigu de comunicación que faiga identificable con ella non namás el mensaxe como cola forma? Dalgún espertu topará dalgún ye cuestión de dar con él. Sinon siempre podemos volver al "Paraisu Natural", que oi, lo que funcionó una vez...

Y podría siguir, la verdá ye qu'Asturies ta enllena de prioridaes que se despachen nesti chigre con una velocidá p'ablucar. Asina qu'acabamos rápido con elles y darréu ponémonos colo importante.

Escrito por PindelPandu el xueves, 2 ochobre de 2014

Hai n'Asturies una reacción mediática que salta como resorte cuando los avances na normalización (de normal) de la llingua se materialicen. Como estos avances van pasín ente pasín y a una velocidá que desafía les paciencies, esta reacción mantiense constante faciendo una llabor incansable de desgaste y funciona nun segundu planu hasta que topa una oportunidá de manifestase en dalgún finxu significativu. Con ello llogra con un gastu d'enerxía mui reducíu, exercer una llabor de vixilancia y desgaste al oponente, nesti casu ciertu sector que llucha pola presencia, normalización y oficialidá de la llingua asturiana.

Per un llau, a bordu la constancia, funciona una “resistencia civil” non declarada qu'acapara los medios privaos asturianos casi na so totalidá y ye independiente de cualquier tendencia política, puede topase dende los más conservadores a los más progresistes, obviamente fuera del entornu más militante. Hai, de fechu, una unanimidá silenciosa ente los periodistes asturianos desconcertante na qu'escasamente se oyen voces o acciones discrepante con esa llinia, pero nun soi yo'l que tenga que falar en nome d'ellos.

Quiciabes suene desaxerao presentar esa visión de “resistencia civil”, pero lo cierto ye qu'atopamos nos medios un postura que contraria frontalmente la llei dende'l precisu instante que se nieguen a la utilización, por exemplu, de les formes toponímiques oficiales. A estos medios, que a la llabor informativo tamién s'axunta un llabor d'espardimientu cultural pol meru fechu de la práctica de la comunicación escrito, yá nun cabe ente esto suponer un desconocimientu cuando son alvertíos y peralvertíos dende les oficines correspondientes de los errores que cometen. Contrasta sicasí cuando los mesmos demuestren rapidez y conocimientu cuando se trata d'acudir a les sovenciones nuna postura tan práutica no económico como hipócrita no social. Nun quiero dexar l'exemplu n'anécdota, y ye que nun ye namás la negativa al usu de les formes toponímiques oficiales y tradiciones; ye la traducción constante de campañes, marques o eventos que tengan el nome n'asturianu (respetándose siempre si tan n'inglés), el refugu descaráu de la cobertura a cualquier actu d'apoyu a la llingua asturiana cuando non un tratu de despreciu informativu (nun ye dificil comparar la estensión informativa d'eventos con igual participación social pero con fondu n'otros temes)... Ye tal la variedá d'exemplos que nun hai otra cosa que dir a dalgún y palpalo, prácticamente a diario.

Pero, como se comenta nun principiu, nun se queda esta parte del cuartu poder cola llabor de desgaste sinon que golpea de xeme'n cuando intentando minar los esfuerzos normalizadores (insisto, de normal) dando cobertura pa ello (por nun dicir puxando por elles directamente) a campañes sobredimensionaes respecto al so impactu social na práutica.

Válense pa ello de la so capacidá de difusión, una capacidá de difusión llograda gracies a la resistencia económica respecto a otres alternatives (nun podemos obviar les fonte de financiación que manaren en cada casu pa ello...) que nun ta descuidada de polémicos servicios a los gobiernos de turnu. Nada nuevo n'Asturies d'otramiente, nada nuevo nel Estáu y podría seguir esguilando ámbitos hasta cansar, la nomada crisis del periodismu nun ye un fechu concretu d'Asturies y da pa escribir tomos completos, anque quiciás sí que ye nesti casu daqué que tenga unes manifestaciones y unes aplicaciones sorrayables.

Intento nesti casu nun enfotame n'exemplos concretos col envís de presentar una problemática de fondu acullá lo puntual. Una posición que promueve l'enfrentamientu y la criminalización escontra'l consensu y la integración de toles partes, un fechu que nun perxudica namás a los interesaos nos avances en política llingüística sinon que sembra un clima n'Asturies con un peligru sectariu notable de magar que nun fai sinon contribuir a enquistar un problema. L'interés obviu de la reacción ye que s'enquiste pa torgar cualquier avance por propia definición, el consentimientu que hai hacia ello y l'asimilación d'esi discursu ye quiciás una de les batalles más importantes que ganaron. Y ye que la primer batalla ganáronnosla nes pallabres.

Escrito por PindelPandu el martes, 13 mayu de 2014

Hai vientos d'ellecciones: de secute arrastren los cartelos a los posición avezada y estratéxica a les paredes y traen promeses vieyes y recurrentes d'eses qu'afalaguen de llustru en llustru. Les izquierdes, les dereches, los centros, los que nun son de naide, los que son pero nun quieren ser y los que nun saben lo que son invaden páxines, hores de televisión y temática nes engarradielles chigreres (con perdón de los placeres de la vida). La xente, nun tiempu que nagua por un poquiñín de claridá como un náufragu no ermo, acolumbra la llegada de les tropes ellectorales con una noción de soledá inquietante los unos, ilusión los menos y llamada a files los terceros d'una cuantificación inexacta y dependiente de les circunstancies. Y yo, a la vista ta, póngome lliterariu por aquello de llevar la contraria.

Nesti circu ellectoral, la coreografía más repetida ye la del cambiu. Ye tan popular (con perdón) esta necesidá d'emburriar al movimientu qu'hasta los que afalen a nun cambiar suxeren que caminen hacia dayures. Y nestos quince díes enantes de la urna final, irguímonos toos nel actu cimeru de la política del espectáculu: esa política tan apolítica ya iconoclasta que vien la imaxe (l'iconu) como un mediu y tien l'asientu como un fin. Y ye que, pesie toes estes conxugaciones del verbu cambiar nos discursos, les dinámiques que se desenvuelven mantienen la dirección que se lleva marcando dende va unos años y que, pol aquello del contextu, son les que nos traxeron a onde tamos.

Anguaño la política, dientro lo nuevo político, ye como una peste. El debate abiertu d'argumentos y la puesta en común d'idees refúgase como si por dalguna razón nos escorriera nes pesadielles. Evítase la contraposición d'idees y llega a vese en dalgunes ocasiones como daqué grosero; equí lo afayadizo ye callar y sorreir, crear de les confluencies un dogma más qu'una ferramienta o'l camín inercial que tendría de ser de dase les condiciones. L'enfotu ta n'entamar la casa pel teyáu, la busca naguada del escañu a toa costa, cueste los silencios que cueste, cola fin de ganar una representatividá que dexa nun segundu planu'l qué facer con ella. Lo importante anguaño ye entrar nes instituciones, yá veremos mañana qué queremos facer nelles. Mientres tantu les idees queden tapecides, lo mesmo que los tan necesarios debates sobre les nueves necesidaes coles que nos topamos que quixeron espoxigar tímidamente nestos últimos años.

Acatamos tamién les neollingües, eses que nos faen desmarcanos de los pantasmes que puedan percorrer Europa pero que al empar rompen la continuidá del discursu de la llucha histórica de les clases populares. Agora, nel centru l'Ágora con un espeyu delantre nun somos quien a reconocer nella a los nuestros güelos. De repente situámonos solos en metá de la Tierra y de la Historia y unu, que ye malu pal funambulismu, nun puede evitar una medranosa sensación de vértigu amén de la tan socorrida soledá (que dase nel tiempu lo mesmo que nel espaciu). Asina ye, los discursos antiguos yá nun valen, les frases con connotaciones son demasiao agresives pa esta llamada a la oración conxunta y enterrámosles pa meyor momentu pol nuestru bien.

Ensin fondu nin idees volvemos a la política del espectáculu, asumimos la so reinvención de la xestión de les sociedaes dende un puntu de vista de márketing de cara a la xente y d'inxeniería financiera de cara'l progresu lliberal, repetimos la frase pegadiza que nun envuelve nenguna idea, concentramos toles fuerces a la espera de la tierra prometida y alegramos el nuestru pasu pel desiertu detrás de los portadores de ídolos nuevos. Zarrándo los güeyos, eso sí, y aceptando lo qu'enantes nun yera aceptable tres la revelación. Preparando'l camín pa que la tierra prometida camude en tierra quemada.

Frente a los nuevos ídolos colos sos castiellos de naipes y mercaos de fumu psicotrópicu, los vieyos ídolos y héroes de les lleis vieyes vixilen dende castiellos de piedra inamovible y arrodiaos per un fosu impenetrable. Dende ellos los señores de la realpolitik falen de la plebe, asumen el so nome y son capaces hasta d'atase a la bandera por aquello de nun baxase de la torre de marfil. Torres de marfil de la burocracia del tronu, d'ecu nes mazmorres y silenciu nes audiencies. Los unos defendiendo los sos privilexos de clase como alumnos adelantaos de les reflexones internes de cuarenta años de silenciu, los otros con una amnesia galopante que los fai renegar hasta del so nome y los demás intentando paecese a ellos mientres cuspien a la so imaxe ya intenten componer un discursu ente medies. En fin, ¿qué más contar de los de siempre? Los experimentos con gaseosa, nos recuerden. Y asentimos. Y volvemos a otru trucu, a indignanos, cabreanos y meter la cabeza ente les rodielles. Y pasamos pol aru y pela casiella de salida, amás ensin cobrar... taría bueno.

A metanes d'esti horizonte, ente actu y actu, pamidea falten xornaes de reflexón fuera del horizonte ellectoral.

Ir a página 1 2