Nenyure http://blog.eldelweb.com/00/vf-2-0-0.html Dalgunes reflexones tres el #23F Sun, 24 Feb 2013 12:40:40 -0600
Güei mirando les noticies ya intentando buscar semeyes, noticies y valoraciones sobre la manifestación d'Uviéu, veo que los medios xeneralistes tendieron a da-y'l llombu, mientres sí que-y dedicaben daqué más d'espaciu a lo ocurrío'n Madrid (dexando dellau los incidentes fuera de les reivindicaciones en sí). Ello faite date cuenta qu'una forma de desinformar y enfriar lo que pasa na cai ye allonxándolo del ciudadanu. Por ello, anque seya la capital del Estáu, de les manifestaciones que más xente lleve (ehm, ¿o Barcelona quiciás?) mover el focu informativu de les movilizaciones más cercanes a Madrid consigue coses como estes:

- Que'l llamamientu llegue a menos xente de la que puede acudir: agora mesmo vivimos nun momentu de sobreinformación y qu'una noticia exista nun ye sinónimu, como fai unos años, de que llegue a la xente (a lo menos en condiciones mínimes pa ser asimilada). Agora mesmo les noticies que efectivamente lleguen son les que más se repiten y más ecu tienen (los TT de Twitter son un exemplu d'ello). Ye más, pa muncha xente ye la esclusiva de lo que llega magar que los medios de comunicación de mases ye lo qu'acaben recoyendo; y agora mesmo vivimos nun sistema de comunicación de mases híbridu nel que conviven los medios d'autocomunicación de mases (les redes sociales) y los medios de mases unidireccionales tradicionales. Amás cada ún d'esos medios ye referente pa un sector de la población (por exemplu, la mocedá ye más sensible a lo que se diz nes redes sociales, mientres que los más mayores siguen formandose una opinión tirándo de TV y periódicos, simplificando munchísmo).

- Que los medios de mases namás den cobertura a les movilizaciones llonxanes, perpetuando esi sentimientu de rabia contenío y de que otru se mueva por mi, reduciendo'l descontestu social a la sucesión d'imaxenes ensin dotar a la población d'esi tresfondu social ya ideolóxicu. O lo que ye lo mesmo, reducimos los debates y les quexes que se quieren asoleyar en debates y quexes de chigre.

- Desvenceyar a les persones individualmente de les demandes que se faen en clave colectivo: ye verdá qu'agora mesmo hai problemes como'l paru, la vivienda y la represión que son comunes a les persones de tol Estáu y toa la UE. Pero nun tienen nin el mesmu niciu nin la mesma componente de crisis. Por exemplu, la problemática del paru en Madrid, Catalunya, Asturies, Andalucia y Euskadi ye cuantitativa y cualitativamente estremada, remanez de polítiques qu'apliquen la mesma ideoloxía pero de forma más o menos amable y en función de realidaes sociales estremaes (democristianos españoles, socialdemócrates españoles, democristianos vascos, democrocristianos y lliberales catalanes), pa unos el principal problema ye l'acumulación de tierres y'l temporalismu, pa otros el desmantelamientu industrial, pa otros les desllocalizaciones, pa otros l'amiguismos... en combinaciones que se dan en proporciones diferentes en cada sitiu o que nun se dan. Esto llogra desfigurar el marcu d'acción y por estensión l'acción, perdiendo delles reivindicaciones pel camín, malinterpretando otres y marafundiando esfuerzos en cuestiones que tan ampliamente superaes.

Les redes sociales y similares pueden valir pa compartir ya equiparar lemes y eslóganes y baltar barreres de distancia, pero les movilizaciones tienen que faceles aquellos que son quien a vese cara a cara y que cuando acaba la manifestación siguen teniendo llazos de vencindá y cooperación (nel Estáu tovía nun se consiguió superar la fase de les redes existentes enantes de la crisis y les familiares, el 15M fue un intentu fracasáu d'ello).

Otra cosa distinta ye l'internacionalismu, que ello si s'espande a aquellos que "nun ves" o formen partes de realidaes o marcos distintos y nun niego esti aspectu pa nada, pero pocu músculu internacionalista se puede tener si nun existe un corazón social llocal nel que trabayar y axuntar esfuerzos. L'acción internacionalista ye una cosa qu'hai d'entender en clave colectivo y non individual.

Como presten más les coses n'inglés, esto que digo equí, ye lo mesmo que decir "think globally, act locally". Porque ente la destrucción del Estáu y tol texíu social que colgaba dependendente del estáu y por estensión anguaño del capital, hai de recuperar y reconstruir esi texíu social que ye, munches veces, más importante qu'un puñáu d'escaños (a los que tampoco renuncio, coloco una trinchera en toos y caún de los frentes, pero como yá comprobemos n'Asturies concretamente, llegar a los parlamentos ensin base que tenga por esa representación ye una ilusión).

Pa resumir, ideolóxicamente quiciás pueda resumir esto que me pruye tresmitir con un par de cuestiones:

- La identidá como toma de conciencia d'un mesmu y del os marcu de llucha escontra la globalización.
- El proyectu común y comunitariu d'alternativa social escontra'l capitalismu que se desarrolla nesi marcu de llucha siempre naguando espardelu per dayuri.


p.d.: Igual a dalgún esti mini discursín-y estraña por delles referencies cruzaes ente ideoloxíes. Que se pegue con ello y colos dogmes propios.

p.d. 2: esto tenía que ser redundante, pero tola solidaridá colos deteníos y agredíos ayeri seya onde seya. Esa yá ye una cuestión estremada: la de como organizar la rempuesta a la represión en función de los marcos represivos.]]>
http://blog.eldelweb.com/vp-2-1942-0/Dalgunes-reflexones-tres-el-23F.html
Güei ye'l tiempu Fri, 25 Jan 2013 20:33:19 -0600
Pero llueu afondes y ves que la xente que glaya pel ecoloxismu marcha a vivir a les ciudaes, y ye que claro, una cosa ye quexase por Lada-Velilla, pol galipote, polos llobos, pel fracking y otra dexase llevar pel carambelín de la ciudá, onde dexes atrás el monte ensin asfaltu y la mar ensin hormigón a cambiu de la comodidá de la cercanía d'otres coses.

Y los mesmo te paez una escentricidá ver a xente puxar pela cultura del país, tan inútil n'ingresos y tan probe n'intereses pero nun te paez una migayina estraño llanzar de contino esnobismos ingleses (cuido que nun ye lo mesmo que falar esa llingua, otra riqueza más) que tienen un reconocimientu social más selectivu. Impresiona más lo "amazing" que lo ablucante. Lo mesmo que'l que quier que la so llingua y la so cultura llegue a toos pero nun sale del so corru.

Darréu quéxeste pol trabayu, pola precariedá, pola inxusticia social; pero sigues faciendo hores estres que naide te paga por mieu a quedar mal col xefe. Actu de presencia nun par de manifestaciones al añu y deber cumplíu. Quexase pol trabayu d'otros, con más o menos aciertu, ensin intentar aportar una alternativa pela to parte. Destruir.

Dices que llibertá nun se compra nin se viende pero, tando nun nivel de vida afayadizu, sacrifiques les hores pol dineru.

Munches veces pienso que aspiramos a un mundu que namás existe nos nuestros suaños, non por utópicu, sinon porque lu relegamos a ellos; nun sé si por falta de fe o por falta de voluntá. Nin siquiera sé cuala de les dos ye la falta más grave. A lo meyor ye que tamos tan saturaos de vocaciones que nun sabemos per onde entamar, la verdá ye que de xeme'n cuandu el futuru pesa tantu que paez que quier cayenos enriba.

Per otru llau tampoco val de nada'l via crucis. Bien ta reconocer los errores, fai falta y ye necesario, pero la flaxelación de contino nun val más que pa fuxir del tiempu que nos interesa, que ye'l de reaccionar a los errores diagnosticaos. Güei ye'l tiempu, mañana ye tarde.

Vaiga per delantre que nun ye intención dar llecciones a naide sinon reflexonar, de magar que nengún tamos llibres d'ello.]]>
http://blog.eldelweb.com/vp-2-1939-0/Gei-yel-tiempu.html
Supervivientes del final del mundu Mon, 31 Dec 2012 20:38:51 -0600

Somos una xeneración qu'ensin tener pasao una guerra mundial o una guerra civil yá tenemos sobrevivío dellos finales del mundu. El primeru nel 2000 cuando nos anunciaben l'apocalipsis de les máquines por un error de precisión d'unos pocos díxitos y l'últimu'n 2012 cuando daquién por dalgún motivu dio voz a dellos analfabetos pa que descontextualizar culturalmente llectures d'escritos de fai 2000 años. Valga esti párrafu como intentu d'asemeyar el nuestru tiempu, dominaos mentalmente (nun creo a nengún d'estos eventos se-yos dea la importancia nun futuru de figurar en nengún testu d'historia na vida real) pola tecnoloxía que nós mesmos inventemos y pol desconciertu que produz la nuestra incapacidá d'intentar comprender daqué que salga fuera de la cultura actual occidental ensin occidentalizalo.

A pesar de too ello, equí tamos; supervivientes. Esti títulu, que nun representa nada pero viende -que al final ye lo que tien valor na nuestra sociedá-, nun nos lu quita naide yá.

Como tantu fin del mundu ficticiu cansa a cualquiera y dientro la nuestra proactividá por crear nueves situaciones (Debord me perdone) entamamos pola nuestra un tercer final del mundu, paez qu'al final somos nós los que renegamos de seguir cola vida. Un fin del mundu que si bien nun ye tan apocalípticu como los avezaos nes escritures sagraes, tenémoslu bien profetizáu cuantayá n'otres obres más paganes. Llamémoles distópiques o apócrifes.

Tamos viviendo'l fin del tiempu de toles polítiques reformistes. La frayadura de la tendencia a l'alta de la estafa piramidal que supón el capitalismu (dexémonos de cinismu anque sía per una hora y miremos al hemisferiu sur enantes de respuender a esto, por favor) dexa pocu marxen pa resistir y seguir contentándonos a una buena parte. Llambemos na boca les postreres gotes del estáu del bientar esprimíu hasta les últimes consecuencies pola socialdemocracia, una socialdemocracia que quedó ensin espaciu dientro del mundu lliberal pa seguir presentándose como'l poli buenu. El camín de l'austeridá, como únicu escape del capitalismu, namás almite la llinia recta: "nun podemos facer otra cosa"; polo que d'un manotazu y de secute toles aproximaciones amables dientro del espectru lliberal unifíquense nuna mesma doctrina clásica con un únicu argumentu: sálvese quien pueda y coles manes lo más enllenes que sía quien.

Esti fue'l fin d'un mundu, pero esta vez de verdá. Ye'l fin del mundu de la pasividá recompensada, del mundu qu'ameyora col simple pasu del tiempu, d'un mundu que quixieron trayemos los güelos de la hestoria como telón de fondu del sufrimientu. Pero l'avance de la historia ye imparable y toa avaricia tien un preciu y un cumal cimeru. Cumal qu'empecipiamos a acolumbrar pasu ente pasu. Güei la pasividá arroxa per una tobogán nel que, según caes, más te taraza y menos fuerza dexa pa parar la caída.



Agora, vistíos col traxe de supervivientes y con un enfotu empobináu a los mínimos como aquel que refuga les sos propies necesidaes, salimos a les cais ensin tener desagospiao'l mieu de los nuestros cuerpos y mentes. Caleyamos como zombies que caminen xunto a compañeros a los que se-yos ve la cara porque va enmazcarada d'un etéreu anónimu. Y tovía sobrevivimos p'acolumbrar un 2013 que mete más mieu tovía; vamos camudar d'esta la sangre por llercia.

Digo yo que val yá de ser supervivientes y garrase a uno mínimos que mengüen al cocer, valió yá de profecíes que namás anuncien el final d'un mundu que nun nos dexen nin vivir en paz, o la recuperación económica que nunca llega. La nuestra vida, como'l fin del mundu, ye una cuestión sistémica. El mundu yá acabo fai tiempu, y nós despistaos en ver cuanto-y queda, probinos.

Yá pasemos munchos finales, cubrimos un cupu, va siendo hora de que pensemos n'entamar daqué. Anque sía por hixene mental (individual y coleutiva).]]>
http://blog.eldelweb.com/vp-2-1935-0/Supervivientes-del-final-del-mundu.html
Ingrávidos Thu, 18 Oct 2012 22:41:40 -0500
Xente inocente de toles formes. Quiciás l'únicu delitu consistió en nun talantar qu'había vida acullá la vida, cosa normal cuando concentres los tos sentíos nes percepciones más inminentes namás porque-yos avaga. Yera xente sicasí, que tovía yera quien a mirar p'alantre y pa quienes los llímites taben puestos pa ser superaos, lo mesmo que ficieron los que los precedieron.

Y nós, esi subproductu que s'estrella agora cola vida aventáu por minutos de mareos y sensaciones y rellaciones intenses heriedó d'ellos esa miopía. De la que mos imponen los llímites qu'otros nun tuvieron, caminamos; lo mesmo que guaḥes, ensin gafes afayadices bregamos p'atopar un sitiu dende'l que subise y acolumbrar la llínia del horizonte que separta esti mundu del futuru que conocíemos y mos tienen deprendío. Nesti camín, enriedámonos con palabres que, pretendiento explorar los cinco sentíos más ún nun arrebañen cuatro conceptos siquiera. Tantu tiempu enfocaos en nós y la rellación con nós y les nuestres mesmedaes que namás se mos ocurre describir el paisaxe esterior con garabatos inútiles de realismu simuláu. Metáfores bien sonores pero poco producentes. Dacuando, como esta, inclusive autoconscientes. Marabayos de pensamientu qu'intenten simular una reflexón pero que dexa a ún tal y como taba cuando llegó.

Igual ye la forma d'enfrentar los problemes del mundu. Enantes de dar cada pasu afogámonos nel camientu, reducimos el mundu a la nuestra persona y reducimos el mal del mundu a la llerza consustancial al momentu qu'acompaña. Namás yo, yo y lo difícil que ye esti pasu; yo y lo que toi xugándome. Lo mesmo que si un peón perdiere'l tiempu de la partía creyendo que'l tableru ye namás la casiella que tien enfrenteensin pensar que puede comer al alfil o la torre que lu acecha dende la diagonal. El pesu de la responsabilidá, el pesu del cortoplacismu militante nun mundu per otra parte intemporal.

Asina, concentráu nesti malditu últimu pasu, pierdes la noción del tiempu. Asina, concentráu nesti prósimu metru, pierdes la noción del espaciu. Asina, concentráu nel pesu que lleves al llombu, pierdes la noción de la gravedá. Ello ye: tarde, lloñe, ingrávidu.

Enantes taba too más fácil porque yera más difícil.]]>
http://blog.eldelweb.com/vp-2-1932-0/Ingravidos.html
Llevántate neña Sat, 08 Sep 2012 15:38:26 -0500
El casu ye que agora, tres de l'alucinación braniega na que paez que se para'l mundu, olvidamos la rutina y del soníu de les cadenes qu'arrastren los pies oblíguenmos a paramos y echar una güeyada alredor. Amás a traición, como si hubiera'n qué creyer. El casu ye que caún respuende como sabe o como bien puede: dalgún marcha a confesase, otros a pecar, hailu que-y quita'l polvu a la bandera y otros tomando un culete'n solitariu a dellos años-lluz. Hai que pasalo como bien se seya quien.

La oración ye'l vezu de los más, y una reciella d'ellos axúntense mirando al cielu y esperando al mesíes. Porque siempre tien que ser otru'l que venga a llibramos del mal y los nuestros pecaos p'asina de pasu lliberamos nós un pocu de cualquier cargu conciencia y d'esi maltar xeneral que provoca'l saber que tú yes l'únicu responsable de les coses que tean por venir. Llástima que naide escuche les nuestres peglaries, dalgúnos sienten l'eco que devuelve'l vacíu mientres otra parte namás s'enfota'n rogar más fuerte.

Tres sentir l'ecu el vacíu ye irrenellenable y esmolecedor, polo que hailu que s'entrega'l pecáu. Que ye la otra cara de la moneda de la plegaria, evadir la concencia non por delegación a un ser supuestamente superior sinon por cenciella anulación. Magar que naide va a venir a salvate, sálvese quien pueda.

Darréu ves la bandera arrequexada nun rincón garrando polvu, recordando que siempre hebo díes meyores o, a lo menos, con más ganes de ser meyores que'l que te percorre agora. Nun alarde d'esperanza y coloríu llancen al aire'l polvu con un xiringu y cambien, per un momentu, el color del corredor pa recordar qu'un día existió una idea detrás d'esi trapu que resiste'l pasu del tiempu a mou de cargu concencia.

El mesmu, baxa depués a l'antoxana, echa un culín y mira pa él mientres tovía espalma camentando sobre'l fechu curiosu de que nun llugar del mundu haya xente que considera qu'un vasu que nun tien más d'una tercera parte de llíquidu se considere llenu. Y bebe'l vasu enteru d'un tragu. Pero nesi vasu tan grande entra un mundu enteru que güei nun se manifiesta. La solitú sabe a esi regustu resacosu de sidra como'l que lleves mientres te lleva'l Negrón, personaxe mitolóxicu mezcla de guaxa y sumiciu del tiempu modernu.

Pero la neña sigue dormida, ensin da-y vida a esta casa que garra d'ella'l so nome. Subes pa la habitación ensin facer ruíu y otra vez más siénteste al llau d'ella, que descansa col so xestu pigarzón. Y anque la to voz ye una vocina, qu'apenines cerca sona, xuxúries-y como si nun lo tuvieras fecho yá: llevántate neña del dulce soñar, la lluz de l'alborada yá entama a aportar...]]>
http://blog.eldelweb.com/vp-2-1927-0/Llevantate-nena.html
El to putu momentu Fri, 14 Oct 2011 19:53:04 -0500 (En castellano en el primer comentario)

Imaxina que camines en medio una reciella de xente, quiciás una manifestación. Tas arrodiáu dafechu y esfuérceste por seguir al personal intentando mantener el mesmu ritmu qu'ellos. Si te pones a pensalo, anque conoces xeograficamente'l destín, nun sabes mui bien la razón o'l fin concretu que te mueve escontra. Namás sabes que tas ehí y quies seguir caminando. Una recta, otra recta y otra más; darréu en cada curva torna la mesma entruga nun bucle que paez que, a lo menos, mantiente serenu, constante y consciente.

Nun dexa de ser una buena metáfora pa una rayada de 14 d'ochobre (víespora de 15). Nun dexa de ser al empar cierta cuestión personal que rara vez vien a cuentu.

Cada segundu de la nuestra vida ye únicu ya inigualable, ello ye que nun ye estraño que-y deamos un valor p'enriba de lo que lu tasaría cualquier supuestu ser oxetivu. Culpemos d'ello a Heisenberg y al Principiu d'Incertidume por exemplu. Una muestra ye esa sensación individual o coleutiva de que, con enfotu abondu, cualquier determinación nuestra ye determinante na Hestoria. Porque parte d'esi problema entama pola dificultá de diferenciar la Hestoria de la hestoria.

Lo que mos cuntaría un estraterrestre que tuviere observándomos dende fuera, posiblemente fuera (faigo notar el mio niciu terrestre) la d'intentar desplicamos que tola nuestra vida ye un intentu más de facer lo qu'otros intentaron durante'l continu del tiempu en contestos diferentes y con resultaos desemeyaos. Tovía asina préstamos vemos como singulares, disonantes y protagonistes universales d'un puntu nel tiempu. Un puntu discretu nel que dexamos de valorar tolo que mos precede y damos a pensar que xamás hebo nada como nós.

Gran error. Realmente somos el productu de tol continu antecedente y, salvo agradable o desagradable accidente, meru granu de sable. Nun ye que nel pasáu nun pasara nada hasta güei; ye que, sacante que faiga aición esa singularidá espaciu-temporal, anguaño nun pasará nada hasta'l futuru.

¿Quier decir esto que tamos determinaos? ¿que da igual lo que fagamos porque yá pasó y volverá a pasar ([1] y [2])? ¿que si naide lo consiguió hasta agora nun va conseguise yá? Non, de nenguna manera. Anque por llástima nun esiste un plan que determine en qué momentu quién sedrá quién y asoleye el verdaderu xacíu de la vida menos pa dalgunes fes y nun podamos estrayer más que della simpleza na aleatoriedá, namás ye esa continuidá la que provoca que les coses pasen. Namás la constancia conduz a la singularidá. Namás tar onde crees que tienes que tar nun momentu y nun tiempu ye la forma de llegar a onde coño quiera que haya que dir.

Namás nun hai qu olvidase de los que cayeron o fueron acallaos pel camín, porque tenemos buena probabilidá de sumamos a ellos. Quiciás un bon camín seya la continuidá y el movimientu, quiciás non. Los errores son parte del secretu del ésitu (secretu porque los dexamos podrecer no fondero les coraes) y los errores, el movimientu y la continuidá aplicaos a un momentu concretu nun son más qu'un irguise bien pa llevantase del suelu bien insurrectu dafechu.

Al final, pa llevar a cabu too esto nun hai un día siñaláu nel calendariu, tamién ye cierto que nun lu hai pa dexar de facelo.]]>
http://blog.eldelweb.com/vp-2-1914-0/El-to-putu-momentu.html
Lletres d'usar y tirar Sun, 18 Sep 2011 13:24:07 -0500
Val lo mesmo qu'un cantar desplicáu ensin base armónica nin tiempu pa entonalu y ye amañoso tamién como estensión d'él. Cantares, columnes, brevedá. Y ye que la resaca dura tan poco que lo que vien detrás ye namás rutina. Y ye que'l to tastu dura tan poco que malapenes enllena dos estrofes.

Darréu namás hai repetición, orquestación, coreografía y dalgún qu'otru actu de fe despistáu. Esllava estético y placebu artísticu, eso ye. Anque con ello dellos vengamos curando los males. Unos males que realmente nunca curen, namás ye que son tan efímeros como la lletra que rellena esos instantes, lo que lo convierte nel pasatiempu más afayadizu.

Porque al final ye un error buscar un llugar na hestoria con grandes despliegues. Bueno, más qu'un error ye una cuestión de dioptríes, porque habelu hailu, tan cenciellu como equí y agora. Anque los versos d'una nueche de branu pierdan tan rápido'l so sabor nesti momentu y acariciar l'aire ayude tan poco. Y eso que ta enlleno d'estres qu'acompañen a los protagonistes na sombra hasta que llega un momentu que la so crónica ye la única que fai comprensible'l mundu alredor. Pero la esperanza ye una adicción tan mala que, dacuando, fai descartar lo qu'entra polos sentíos tresformándote nun pésimu narrador y un mal aspirante a protagonista.

Neños, nun intentéis esto en casa porque esa hestoria ye bien desagradecía. Pero nun faigamos d'esto un drama.]]>
http://blog.eldelweb.com/vp-2-1913-0/Lletres-dusar-y-tirar.html