Lleo vía Esbilla que:

Dellos miembros de la Fundación Caveda y Nava aconceyaron esti vienres con Joaquín Arestegui (PP), pa face-y llegar les sos propuestes al rodiu del tratamientu del asturianu nel futuru Estatutu d'Autonomía. [...]

Lo curioso ye que, como el mesmu autor de la "esbilla" mos alvierte nos comentarios de la noticia, paez que daquién dio marcha atrás na redaición de la noticia...yá que agora mesmo la noticia n'Asturies.com ye esta:

El PP reconoz que la redacción del Estatutu "quedó vieya" tocante a la llingua

04/04/2008 Dellos miembros de la Fundación Caveda y Nava aconceyaron esti vienres col voceru axuntu del Grupu parlamentariu "popular", Joaquín Arestegui, pa face-y llegar les sos propuestes al rodiu del tratamientu del asturianu nel futuru Estatutu d'Autonomía. Asina, dende la Fundación, pidieron-y al representante del grupu "popular" que defenda la oficialidá de la llingua asturiana na reforma estatutaria.

El voceru del PP reconoció de la redaición del actual estatutu no que cinca a la llingua "quedó yá vieya" y añadió que puen incorporase cuestiones como la consideranza del asturianu como llingua propia, lo mesmo que'l castellán.

Pela so parte, la Fundación Caveda y Nava ufiertó facer aportaciones na redaición del Estatutu d'Autonomía, no que cinca al usu de la llingua, agradeciendo Aréstegui esti sofitu y sorrayando que "ye una institución mui seria, qu'encara l'asturianu dende un planu mui moderáu, non como otros coleutivos".

Lo que nun tien muncho que ver colo que s'asoleya nel titular d'Esbilla. Y ún, como ye daqué curiosu, da-y por echar una güeyadina a la caché de Google y topa esta "otra" noticia en Asturies.com:

Les llendes de la propuesta del PP tán na oficialidá"

04/04/2008 Dellos miembros de la Fundación Caveda y Nava aconceyaron esti vienres col voceru axuntu del Grupu parlamentariu "popular", Joaquín Arestegui, pa face-y llegar les sos propuestes al rodiu del tratamientu del asturianu nel futuru Estatutu d'Autonomía. Asina, dende la Fundación, pidieron-y al representante del grupu "popular" que defenda la oficialidá de la llingua asturiana na reforma estatutaria, indicando Aréstegui que "la oficialidá ye una postura que nun paez asumible nesti momentu" siendo amás "totalmente inasumible la obligatoriedá".

El voceru del PP reconoció de la redaición del actual estatutu no que cinca a la llingua "quedó yá vieya" y añadió que puen incorporase cuestiones como la consideranza del asturianu como llingua propia, lo mesmo que'l castellán. Aréstegui afirmó, en declaraciones posteriores a la prensa, que'l PP estudiará les propuestes de la Fundación, anque yá-yos esplicó "que les llendes de la propuesta del PP tán na oficialidá". D'otru llau, el voceru "popular" dixo que, sicasí, la postura del PSOE nesti asuntu yera "mui dura".

Pela so parte, la Fundación Caveda y Nava ufiertó facer aportaciones na redaición del Estatutu d'Autonomía, no que cinca al usu de la llingua, agradeciendo Aréstegui esti sofitu y sorrayando que "ye una institución mui seria, qu'encara l'asturianu dende un planu mui moderáu, non como otros coleutivos".

Y por si yá nun ta disponible na cache, axuntamos una semeya como comprobante:


Polo que se comenta nel mesmu mediu social, también hebo un fechu asemeyáu no tocante a Asturnews.com, por llástima, nun fui quien a llogar pruebes de que ello tamién fora asina.

Paez ser que hebo una equivocación masiva nos diarios web cabezaleros en llingua asturiana (Les Noticies, paez ser fiel agora mesmo a esta cabera versión de lo asocedío).

L'asuntu nun dexa de ser, cuanto menos curiosu. Nun pue ún dexar de sumar inconscientemente l'apaición contina de dellos militantes populares collaborando" nes mesmes páxines que "corrixen" noticies que falen sobre el partíu y el xuegu a dos bandes del Partido Popular col oxetivu d'atraer los votos de la xente sensibilizao cola llingua asturiana al empar que finten con muncho procuru cualquier pronunciamientu claru ya venceyante sobre'l tema. Esti paecía ser el primeru, pero quedó'n fumo...