Escrito por ObservatoriuLlaboral el martes, 22 xunetu de 2008
Según informa Europa Press:
Los tres sindicatos --UXT, CC.OO y CSI-- refugaron güei de planu la propuesta presentada por Naval Xixón al comité d'empresa que supón el zarru del astilleru con un plan de prexubilaciones pa 55 de los trabayadores y la recolocación en Factorías Juliana pal restu de la plantiya, 44 emplegaos.
La propuesta de Naval Xixón, trata de "garantizar la estabilidá llaboral y profesional de la totalidá de los trabayadores", según informó la propia compañía, qu'esplicó que pa dambos grupos d'emplegaos la salida diba producise en tres fases. El primer grupu, a la firma del acuerdu col Comité d'Empresa de Naval Xixón; el segundu grupu, a la entrega del buque 703, prevista pa finales d'ochobre y el tercer grupu, tres la finalización de l'actividá del astilleru.
Pero la propuesta, que ya fuera avanzada nel mes de xunu, cuenta col refugu "total" de los sindicatos. Nesti sen, el representante de CC.OO, Santiago Escosura, manifestó en declaraciones a Europa Press, qu'entienden que'l "saniamientu financieru y la busca d'un empresariu son complicaos y puen retrasase, pero nun pasa lo mesmo cola contratación de carga de trabayu".
"En resume, la empresa confirma la so idea de zarru en cuantes s'entregue'l buque nel que trabayamos", dixo Escosura, qu'añadió que "nin entienden nin comparten esi posicionamientu del pieslle porque lo que tien de facer Pymar ye cumplir lo firmao".
Asina indicó qu'alcontrar carga de trabayu ye "fácil na situación actual y ye dafechu viable nel mercáu actual, onde tolos astilleros tán a rebosar", polo que nun llogra entender por qué s'opta pol zarru pa dexar "un únicu astilleru na ciudá".
Nel conceyu d'esta mañana la Direición de Naval Xixón entregó al Comité d'Empresa la llista de los trabayadores que s'enmarquen tanto nes prexubilaciones como na recolocación. De magar el mes de setiembre, Naval Xixón va presentar el detalle de les condiciones individuales de dambos.
111 Comentarios
Temes relacionaos:
Desmantelamientu