Escrito por ObservatoriuLlaboral el sábadu, 4 ochobre de 2008
Según lleemos en Asturies.com:
El Sindicatu Mélicu Profesional d'Asturies (Simpa) afirmó güei que la Mesa Xeneral celebrada esta mañana, "nun valió pa nada" y caltién "firme y vixente" la so convocatoria de fuelga que se va desarrollar ente los díes 14 y 17 d'ochobre.
"Los únicos que protestamos y discutimos el conteníu del documentu fuimos nós", señalaron fontes del sindicatu a Europa Press, al tiempu qu'esplicaron que'l restu de representantes sindicales acordaron volver analizar la propuesta de l'Alministración sobre la reforma sanitaria'l próximu miércoles día 8 d'ochobre nuna nueva xunta de la Mesa Xeneral, tres presentar güei una serie d'alegaciones a la propuesta del Serviciu de Salú (Sespa) que quieren que s'incluyan.
Sicasí, dende'l simpa caltienen que'l restu de sindicatos "nun entraron a criticar el documentu". Poro, l'escritu del Sespa nun foi refugáu de manera definitiva sinón que va volver discutise la próxima selmana.
"El Sespa nun alegó nada, dixo que'l documentu ye'l qu'hai. El miércoles van presentar dalguna modificación coles alegaciones que se propunxeron, pero nós nun pensamos que vaya modificase sustancialmente no importante, que son les condiciones de trabayu", argumenta'l Simpa, qu'alvierte poro que "sinón nun van poder desconvocase la fuelga".
El Simpa afirmó que lo único que quedó claro na Mesa de güei ye que'l Sespa "nun va pagar los 22 euros por hora de guardia que se pautó nel preacuerdu hasta qu'Atención Primara nun acepte modificar les sos condiciones de trabayu". "Eso nun lo vamos aceptar", remarcó'l sindicatu.
Sicasí, el Sindicatu Mélicu Profesional d'Asturies va asistir a la próxima xunta de la Mesa --na que ta representáu xunto al sindicatu d'enfermería Satse pola coalición Cemsatse--, porque "como'l conseyeru" Ramón Quirós, tienen "los brazos abiertos pa negociar a cualquier hora y en cualquier sitiu, pero claro, seriamente, non en base a imposiciones", dixeron responsables sindicales.
La convocatoria de fuelga mélica inclúi a los facultativos estatutarios, llaborales, funcionarios, profesores rellacionaos, y MIR, tanto d'Atención Primaria como d'Especialidá y d'equipos del SAC, el SUAP y el SAMU:
La decisión de paru básase nel "incumplimientu" del preacuerdu algamáu el 30 d'abril ente l'Alministración del Principáu y representantes sindicales, nel que destaca l'incrementu del preciu de la hora de guardia y meyores de les condiciones organizatives y salariales pa los mélicos que faen sustituciones y guardies nos hospitales, asina como nos equipos especializaos del Serviciu d'Atención Continuada (SAC), el Serviciu d'Urxencia d'Atención Primaria (SUAP) y del Serviciu d'Atención Mélica Urxente (SAMU).
25 Comentarios
Temes relacionaos:
Movilizaciones
sanidá