El presidente de la Unión Independiente de Tresportistes Autónomos (UITA) del Principáu, José Fernández, destacó güei que los tresportistes Autónomos del Principáu van realizar un paru'l próximu llunes del 2 de xunu pa protestar pol escasu marxe de beneficios que tán llogrando nos últimos años.

Fernández, en declaraciones a Europa Press, señaló que l'Alministración llendó la participación a dos persones por asociación, nel conceyu qu'esta mañana caltuvo'l direutor xeneral de Tresporte del Principáu, Julián Bonet, coles patronales asturianes del tresporte y cargadores, polo qu'ellos se negaron a entrar.

"Nós presentamos una plataforma con ocho trabayadores salida d'una asamblea que quieren participar pa defender el sector", apuntó Fernández, que criticó a "dalgunos responsables" en materia de tresporte del Principáu a los que denominó "estómagos agradecíos".

Vinimos a negociar los problemes del tresporte y tuvimos que forzar una fuelga pa que se celebre güei un conceyu al que se mos vetó la entrada", dixo Fernández.

"Defendemos a los trabayadores y non esta mesa de maraña política", apuntó'l resposnable de la UITA que manifestó tar "cansáu" de que dalgunos responsables del sector "anden amazcaraos col visto bonu de l'Alministración". "¿Hasta cuando quieren disfrazar la ruina d'un sector?", entrugó.

El presidente d'UITA señaló qu'un paru "ye ruinosu" pal propiu sector pero continúen cola xornada de fuelga como midida de presión pa que s'adopte les midíes oportunes. "Del conceyu nun va salir nada, son históricos de traicionar al sector", matizó Fernández y añadió que dende UITA "sienten que tovía haya presidentes de cooperatives prestándose a un xuegu suciu p'arruinar al sector".

El dirixente del colectivu señaló que los empresarios del sector tán sufriendo los altos precios del petroleu, que se tán agravando mes a mes. "Tamos trabayando un 30 por cientu perbaxo de los costes porque la subida del petroleu nos últimos cinco meses llegó al 22,5 por cientu", aseguró Fernández.

Los componentes de la plataforma del tresporte y d'UITA esperaron a la conlusión del conceyu pa urriar al direutor xeneral de Tresporte la so falta de "talante" al non permitir que los representantes de la plataforma formaren parte del conceyu.

Pela so parte, Bonet encamentó a que vayan al próximu alcuentru que va celebrase el 6 de xunu y recordó-yos qu'al conceyu de güei diben dos persones por asociación.