Esta decisión foi ratificada el 29 d’Abril nuna asamblea multitudinaria onde los trabayadores votaron masivamente la convocatoria de los sindicatos CCOO y UXT a raíz de les negociaciones pol Conveniu Coleutivu.
La patronal quier firmar un conveniu a 5 años con una suba inferior o igual al IPC y amás quitar un de los tres díes de llibre disposición col que cunten los trabayadores.
Los sindicatos planteguen una suba del 8% pa esti añu y del 6% pal que vien; el aumentu de xornada a los que trabayen a tiempu parcial; incrementu de lo que perciben durante les baxes por enfermedá, el cómputu del desplazamientu ente los distintos tayos como tiempu efectivu de trabayu, etc.
Los trabayadores de llimpieza son un de los seutores más esplotaos de la clas obrera con baxos salarios, alta temporalidá, condiciones d’insalubridá, etc. Los salarios oscilen ente 600 y 700 euros.
Les empreses abusen de los sos trabayadores teniendo-yos a xornada parcial y con contratos a meses, selmanes ya incluso a hores pa’aforrase’l plus de antigüedá.
Nel casu de llimpieza en centros comerciales tratase na so mayoría de muyeres trabayadores que tán a xornada parcial y polo tanto vense obligaes a guetar otros trabayos pa llograr un salariu que-yos ayude a llegar a fin de mes. Por exemplu se utiliza a les llimpiadores pa cubrir puestos por unes hores pa nun contratar más personal.
Pel llau de la patronal les coses son en forma estremaes. Los negocios van per bien. Por exemplu, EULEN (una de les empreses más importantes del seutor y que tá subcontratada nel nuesu centru) factura más de 800 millones d’euros al añu y aumentó los sos beneficios un 30%.
Con estos simples datos nun mos debe sorprender que los trabayadores decidan dir a la fuelga. Ye la única forma que tienen pa facer frente a estos ataques brutales por parte d’estos señores que quieren seguir forrándose a costa del mugor de los que trabayen.
Nuna fuelga los trabayadores retrucamos como unu solo frente a la patronal que tien inmensos recursos económicos. La prensa yá se fizo ecu de los lladríos de los patrones que dicen que “ven mala fe na fuelga”.
¿Nun ye mala fe precarizar a los tos trabayadores pa sacar más beneficios? ¡Non! ¡Son negocios!, retrucarán los empresarios.
¿Ye mala fe qu’esos mesmos trabayadores se pongan en fuelga pa torgalo? ¡Non! ¡Llucharemos polo que ye de nós porque nun podemos seguir asina!, retrucarán los nuesos compañeros.
El restu de trabayadores d’esti centru debemos sofitar a los que van a la fuelga y asina debe ser en tolos demás centros de trabayu. Nun podemos tolerar que empeoren los que trabayen al nuesu llau porque mañana nos tocará a nós. La solidaridá ente trabayadores nun ye un actu d’altruismu sinon UNA NECESIDÁ.
Queremos aportar el nuesu granín de sable: pensamos que los compañeros que van a la fuelga indefinía deben preparar una Caxa de Resistencia pa recabar sofitu económicu. Esto serviría amás pa facer cartelos y panfletos. A medida que pasen los díes entamarán los ataques dende la prensa sobre la “irresponsabilidá de los trabayadores qu’empuerquen los centros cola fuelga”. Pa torgar esto debemos dirixinos a la población pa qu’atalante les demandes y sofite la llucha. Una movilización nes cais ayudaría a ganar más confianza y permitir qu’otros compañeros se xunten a la llucha.
Los qu’escribimos y distribuimos esti panfletu tamos convencíos que la llucha ye’l únicu camín pa poder meyorar les nueses condiciones de trabayu. Naide nos regala ná.
¡Solidaridá cola fuelga indefinía en llimpieza!
¡Sofitu total a les reivindicaciones de los trabayadores!
¡Por unes condiciones dignes de trabayu pa toos!
Escontra les mentires de la patronal: ¡UNIDÁ Y LLUCHA!
Trabayadores d’Hipercor-El Corte Inglés (Salesas)