8 Setiembre, tamos de folixa. Ye lo que hai. Santina, sidra y bandera. Ye lo que hai. Nun damos pa más. Sigui too ensin novedá.

Na basílica dello de xente rezando y dando-y gracies a la santina, nel gobiernín muncho menos xente, pidiendo y dando-y gracies a los santinos. Caún nel so sitíu, caún a lo de so; que asina foe siempre y asina nos va.

Y asina, seliquino, que nun ta la cosa pa esmolecese muncho; a primeros de setiembre vamos restando-y un añu a la cuenta atrás. Sentaos con murnia esperando a que llegue a 0, pa acabar de llimpiar la concencia y tou esmolecimientu, darréu perdelo nun hai res polo que se esmolecer. Aselecer, aselecer...

Pinta-yos false sorrises a los fartones, falses promeses y falsu futuro (pero ¿ye que nun ves que tan matandote? ¿ye que nun ves que tan matandonos?). Vendéi esperances de sacu rotu, pa nós mercales darréu en sin decatamos que nun hai más esperanza que l'aición direuta.

Güei yera buen día pa alcordase del trabayu, de la nuesa cultura, de la xente que aporta equí ensin na ente les manes y lluchar polo nueso (naide lo va facer que nun seyamos nós).

Asturies, nun te quedes n'estáu, nin te quedes en nada. Porque somorguiaos na borrina de la murnia, anguaño nun hai nada que celebrar, mas que un tiempu que se nos escapa ente los deos de les manes.

Puxa Asturies Llibre (de fartones).

Vamos dexar de vivir
de gaita sidra y tambor,
de la Santina na cueva
y de castros baxo’l sol. Óyense voces falando
de pueblos y llibertá,
de roses llorando espines,
de palombes y un riscar.

Andrés Solar