Los Sindicatos Otecas, USO, FSIE, CC.OO y FETE-UXT, representativos de los trabayadores de los centros concertados d'Asturies, mostraron güei al traviés d'un comunicáu la so satisfaición pola aprobación, el pasáu 26 de xunu, de la proposición non de Llei referente a les reivindicaciones de los trabayadores de centros concertados d'Asturies.

Dicha proposición foi presentada pol Grupu Parlamentariu d'Izquierda Xunida, Bloque por Asturies, los Verdes y encamienta al Gobiernu a "puxar pola negociación inmediata" de temes como plantiyes, y reducción de carga llectiva, la xubilación parcial incentivada pol profesoráu, el complementu de maestros de la ESO y el complementu autonómicu pal Personal d'Alministración y Servicios.

Les organizaciones sindicales recordaron que dicha parte de la proposición foi apoyada por tolos Grupos Parlamentarios y consideren qu'esta aprobación supón "un gran apoyu a les sos reivindicaciones".

De la mesma manera, encamentaron al Gobiernu Popular a que realice los trámites necesarios pa dar cumplimientu a la mesma.

Según denunciaba esti día el SUATEA, en vísperes de vacaciones, "la Conseyería de Educación acaba dictar unes instrucciones (dicen que provisionales, pero coles que los Equipos directivos tán trabayando dafechu pa organizar el próximu cursu escolar) de les que'l profesoráu nun tien conocimientu y coles que van atopase cuando s'incorporen a los centros".

Estes instrucciones, nun tan negociaes colos sindicatos, como asocede davezu según el SUATEA y "suponen importantes cambios na xornada llaboral del profesoráu, pasando los istitutos de tener seis periodos llectivos diarios a siete, prolongando la xornada llaboral del alumnáu y del profesoráu de manera gratuita".