Según informa Europa Press:
La direición de Saint Gobain refugó güei les dos propuestes presentaes polos representantes de los trabayadores como alternatives al Espediente de Regulación d'Emplegu, ERE, propuestu pola multinacional pa 70 de los emplegaos, nesti casu de la llinia de Glass nes instalaciones avilesines.

Nun conceyu celebráu güei los sindicatos presentaron a la direición les posibilidaes o bien d'adelantar al mes d'agostu la campaña de 'vidrio diamant' prevista pal mes de setiembre, o bien concentrar les vacaciones del personal de la llinia afeutáu pola baxada de producción del vidriu al mes d'agostu.

Pero según informó a Europa Press el representante de CC.OO nel comité d'empresa, José María Lombardía, la direición "nun aceptó nenguna d'eses propuestes y sigue alantre cola so propuesta del ERE.

Lombardía esplicó que'l comité refuga l'ERE por dos razones fundamentales. La primer d'elles son les causes que lu motiven, qu'a xuiciu de los sindicatos nun son otres que la derivación de parte de la producción a otres instalaciones, y la segunda porque consideren qu'hai propuesta y alternatives factibles pa evitalu.

Dambes partes quedaron convidaes a un nuevu conceyu'l próximu miércoles, día nel qu'acaba'l plazu d'alegaciones.

Según informa Europa Press:
Los sindicatos CC.OO, CSIF, Suatea y ANPE anunciaron güei la convocatoria d'una nueva fuelga de profesores la última selmana d'abril pa exixir al Principáu la convocatoria de la mesa sectorial y la retirada del plan d'evaluación. Los sindicatos dieron ayeri un ultimátum a l'Alministración rexonal pa reabrir la negociación. Ante la falta de respuesta del Gobiernu asturianu y la so "política provocadora" los sindicatos decidieron siguir alantre con una nueva convocatoria de fuelga, tres el paru del pasáu 1 de febreru.

Los sindicatos tienen previsto presentar mañana xueves el preavisu de fuelga pa últimos d'esti mesmu mes. Esta fuelga, a la que tán covocaos más de 11.000 profesores que trabayen na enseñanza pública non universitaria asturiana van dir acompañada d'una serie de movilizaciones, según informaron nuna nota prensa.

Los sindicatos Suatea, CC.OO, ANPE y CSIF llamenten que la respuesta del gobiernu a la propuesta de diálogu que los cuatro sindicatos ficieron pública ayeri seya la de "confirmase nes declaraciones realizaes y n'alegar que'l diálogu sigue abiertu".

Los representantes sindicales dicen que "la negociación sigue sin existir" y consideren que per parte del Gobiernu "nun se fizo xestu dalgún pa convocar a los llexítimos representantes del profesoráu, incumpliendo asina lo aprobao nel Parlamentu Asturianu col apoyu de los grupos del PSOE y d'IU-BA-LV".

Consideren que "el gobiernu tien qu'esplicar a la opinión pública qué ye lo que torga que'l profesoráu tenga nel Principáu menos derechos qu'en cualquier otra autonomía del Estáu y que se vea priváu de negociar les sos condiciones llaborales".

Sobre la reivindicación d'exixencia de paralización del procedimientu d'evaluación, aseguren que nos centros educativos asturianos ta procediéndose a una evaluación del profesoráu que "nun se negoció como manda la llei".

"Lo curioso del casu ye que'l propiu gobiernu considera que ye un procedimientu que ta mal fechu y que debía modificase", informaron los sindicatos, que s'entruguen "por qué se sigue calteniendo y non iguando una política que sólo contribúi a incrementar la burocracia nos centros y incrementar el malestar docente, y por qué esti empeñu acompañáu d'acusaciones de ser unos privilexaos en tiempos de crisis".

Los sindicatos entendieron que les demandes de "los docentes siguen intactes" y espresaron la so intención de "mostrar firmeza ante la política provocadora d'esti gobiernu".

Según informa Europa Press:
Ganaderos urriaron güei a los miembros del Conseyu de Gobiernu d'Asturies, cuando éstos salíen del so conceyu, celebráu nel Ayuntamientu de Salas. Integraos na asociación de Ganaderos Uníos, fueron dándose cita nel esterior de la Casa Conceyu mientres se desarrollaba la xunta, y entamaron a xiblar en cuantes los conseyeros fueron saliendo.

Enseñaron tamién dos pancartes. Núna d'elles podía lleese 'Millones para los banqueros, sudor, impuestos y miseria para los ganaderos', y n'otra trayía 'Consumo carne y leche de fuera sin ningún control". En vista de la situación, el conseyeru de Mediu Rura y Pesca del Principáu, Aurelio martín, decidió averase a los manifestantes, y caltuvo una conversación colos mesmos de más de media hora. El dirixente rexonal recoyó asina de primer mano les quexes de los ganaderos.

CAMPAÑA DE SANIAMIENTU



Na xunta'l Conseyu de Gobiernu aprobóse una partida de 4.074.987 euros pa la execución de la Campaña de Saniamientu Ganaderu del añu 2009. Según informó en rueda prensa la conseyera d'Alministraciones Públiques y Vocera del Gobiernu, Ana Rosa Migoya, la execución de la campaña de saniamientu va correr a cargu de la empresa Tragsega, filial de Tragsa.

Según informa Europa Press:
La compañia Daorje, auxiliar d'ArcelorMittal, va retirar l'Espediente de Regulación d'Emplegu, ERE, que contemplaba la estinción de 103 puestos de trabayu a cambiu de negociar col comité d'empresa un ERE temporal que diba afeutar a la totalidá de la plantiya, que supera los 500 trabayadores y que se va aplicar el 1 de mayu al 31 d'avientu.

Según esplicó a Europa Press el secretariu de política Industrial de CC.OO d'Asturies, Nicomedes Sánchez, Daorje yá tien en marcha un ERE temporal pa 161 trabayadores nel que, la vez que más trabayadores tuvieron regulares fueron 34. Dende l'entamu de la so aplicación, nel mes de xineru.

La compañía tomó esta decisión tres cerca d'ocho hores de negociación colos sindicatos y el comité d'empresa nel Serviciu Asturianu de Solución Estraxudicial de Conflictos, Sasec, lo qu'evita la fuelga indefinida que convocaren los trabayadores de magar esta madrugada.

La decisión llegó tres una negociación "mui dura", na que los mediadores del Sasec y el propiu director xeneral de Trabayu del Principáu, Antonio González, foi fundamental. "Entamamos el conceyu a les diez de la mañana y a les 13.00 hores nun había nengún tipu d'acordies", dixo Sánchez.

Sánchez afirmó que los sindicatos esperen que, nun siendo que la situación "empeore muncho cola parada d'un de los fornos altos de Veriña per parte d'ArcelorMittal", la empresa aplique l'ERE con asemeyaos criterios colos que tán aplicando l'actual, unviando a los emplegaos a casa sólo en momentos nos nun haya trabayu. Dixo amás qu'existe una comisión de siguimientu que "vino funcionando bien" y que va siguir faciéndolo.

Según datos del Inem sobre movilidá xeográfico en 2008, un total de 31.179 trabayadores asturianos abandonaron Asturies pa trabayar n'otros llugares de L'estáu, mientres 19.282 trabayadores de L'estáu vinieron a trabayar a Asturies con un saldu negativu de 11.897 persones.

Anque'l saldu negativu ye un 14% menos que'n 2007 los datos siguen colocando a Asturies como ún de los llugares con mayor tasa negativa.

Ver documentu

Un trabayador d'ArcelorMittal mancose ayeri de forma leve al raspiar la llocomotora que conducía con unos vagones que taben aparcaos cerca d'ella alredor de l'una de la mañana.

Según informa Europa Press:
La multinacional ArcelorMittal anunció güei a los sindicatos la so decisión de parar la producción d'ún de los altos fornos de les instalaciones de Veriña, en Xixón. Asina lo comunicó nel conceyu del Comité restrinxíu que se celebró güei en Luxemburgo.

ArcelorMittal yá anunciare a los sindicatos qu'esta parada podía tener llugar nel segundu semestre del añu si la demanda nun evolucionaba de manera positiva. Agora, la direición confirmó qu'esta parada va facese sobre'l 14 o'l 15 de mayu, según confirmó a Europa Press el coordinador de los sindicatos d'ArcelorMittal n'Europa y diputáu socialista nel Parlamentu asturianu, Luis Ángel Colunga.

La multinacional plantega la parada del Fornu Altu B de Veriña, Xixón "demientres unos meses" y caltener amás paralizada la llinia de Galvanizáu II y la llinia de pintura. "De primeres planteguen parar el fornu hasta setiembre, pero va depender siempre de la evolución de la demanda", dixo Colunga.

Colunga esplicó que la direición presentó güei los planes pa Planos y Llargos de toa Europa, qu'atraviesen una situación "realmente complexa", dao que de los cerca de 25 fornos altos sólo permencen en funcionamientu "unos diez o once".

Asina, ente esos planes tán tamién la "suspensión temporal" de dos fábriques, la de Liexa en Bélxica y la de Florence en Francia, que cuenten "con instalaciones mui asemeyaes a les asturianes, anque con menos plantiya", según Colunga, qu'añadió que se planteguen amás "un altu númberu de paraes y suspensiones d'actividá de munches otres instalaciones del grupu".

CONSECUENCIES N'ASTURIES

Les consecuencies d'esa parada del formu altu n'Asturies tán tovía por determinar. Los sindicatos esperen que de magar la próxima selmana se puea concretar dalgo más sobre lo que va suponer la mesma. Asina, de mommentu, les organizaciones sindicales desconocen si van suponer o non l'aplicación d'un Espediente de Regulación d'Emplegu, ERE.

"Esto ya va ser una cuestión que deberán discutir los comités d'empresa de les diferentes instalaciones cola direición de la compañía", dixo Colunga, qu'indicó que "hai instalaciones como la de Liexa que tán nuna situación realmente dramática".