Según informa Asturies.com:
Los prexubilaos de Naval Xixón acordaron güei n'asamblea abandonar l'enzarru tres permanecer 22 díes nel astilleru. La decisión s'adoptó esti mediudía dempués de que se confirmare l'ingresu per parte de la compañía de 21 millones d'euros de la póliza que va garantizar el cobru de les sos prexubilaciones, según confirmaron fontes sindicales.

Los trabayadores mostraron la so satisfaición pola decisión y aseguraron que l'ingresu s'efeutuó esta mesma mañana. "Esto demuestra que tanto les autoridaes como dalgunos de los sindicatos mos taben engañando cuando mos dicíen que nun teníemos motivos pal enzarru porque too taba asegurao", comentó ún de los prexubilaos.

En total, nel interior del astilleru permanecíen enzarraos unos sesenta trabayadores que van abandonar les instalaciones de magar les 19.00 hores de güei. "Tamos satisfechos pero tamién seguros de que si algamamos garantíes ye porque mos movilizamos y enzarramos", esplicaron.

L'astilleru de Naval Xixón va pesllar definitivamente'l próximu domingu, día 31. La empresa decretó'l zarru patronal unos díes dempués de qu'a los prexubilaos entamaren l'enzarru nes instalaciones onde se desplegó un fuerte cordón policial.

Según informa Europa Press:
Naval Xixón presentó güei ante la Direición Xeneral del Trabayu'l zarru patronal. La decisión s'adoptó 24 hores dempués de qu'un grupu de trabayadores prexubilaos s'enzarraren nes grúes del astilleru.

Los sindicatos calificaron de "chantaxe" la decisión del zarru patronal, dao que l'astilleru nun tien actividá y los sos trabayadores se llenden a facer cursos de formación. Los sindicatos aseguren qu'esta midida ye inxustificada dafechu, dao que l'enzarru nun afeuta en nada a los llabores de formación.

"L'astilleru tien fecha de zarru'l día 31 d'esti mes, y nun se ta construyendo nengún buque, polo qu'esto ye una maniobra pa enfrentar a los prexubilaos colos trabayadores", comentó a Europa Press un dirixente sindical.

Los prexubilaos van caltener l'enzarru hasta que puean algamar dalguna respuesta de la direición de la compañía. Exixe la 'esternalización' de tolos espedientes de regulación d'emplegu y la sustitución per parte de Pymar de toles obligaciones de la empresa Naval Xixón en rellación a la vixencia, costes y regularizaciones de los diversos espedientes.