(En castellano en el segundo comentario)

Daqué que la xente escaez munches veces ye que la evolución nun mos diseñó pa ser felices, sinon pa persiguir la felicidá. [...]. La evolución nun quier... bueno, nun ye que la evolución seya una persona nin tenga conciencia, pero si evolucionara una criatura que topare la felicidá y quedare ehí quieto, ¡a esa criatura nun-y diba dir mui bien! Nun medraría en comparanza con criatures que tan lluchando pa llograr l'ésitu de contino. Lo que pasa cola felicidá ye que tratase d'una especie de cinta d'andar: cuerres y cuerres na cinta, pero nunca llegues nenyuri. Parte del trucu del que fales ye deprender a cuerrer nesa cinta, y non obsesionate col oxetivu al final d'ella.
Gary Marcus (1)

L'esencia del ser humanu ye la gueta de la meyora constante y l'esmolecimientu pol so fracasu nel presente (cuando digo presente, nun quiero decir anguaño, sinon cualquier presente en cualquier tiempu). Ye una ferramienta amañoso pa tar siempre preparáu y adautase a cualquier eventualidá y un fastidiu nel sen de que cuando llogramos daqué el llogru nun mos produz la recompensa necesario como pa quedamos agusto n'onde tamos.

Énte esti panorama, namás mos queden dos caminos: o refugar dafechu esa posibilidá de tentar ser feliz y vivir del intentu (llogrando metes intermedies que se tapecen pola prioridá de lo inmediato en cuantes esta inmediatez toma forma fracasu provocándomos frustración) o la busca contino de la felicidá. En casu d'escoyer la segunda opción, preséntasemos entós la dificultá de caltener l'equilibriu percomplicáu ente'l camín infinitu a la felicidá y la necesidá de cubrir les necesidaes del presente urxente. Que, falando de seres humanos, munches veces vese reflexao na contraposición de lo racional (futuru) escontra lo emocional (presente).

Esti pensamientu tréxome otru a la cabeza, rellacionáu cola cuestión de les ideoloxíes. Munches veces paez haber dos formes de pensar, una enfotada na utopía y otra que lo refuga de pleno baxo l'argumentu de ser imposible de llograr. La cuestión de qué coses son llogrables y cuales non (lo que correspuende a lo que podemos nomar "utópico") son otru tema aparte.

Lo que de verdá me paez importante ye l'esistencia de la utopía. De fechu ser feliz dafechu y nun necesitar nada más pa un humanu según lo comentao, pue calificase como utópico. Pero necesitamos persiguir la utopía por una cuestión de supervivencia, adautación y de placer nesa busca, lo mesmo que cola felicidá.

Dientro de les ideoloxíes, la hestoria demuéstramos que tou sistema que tenga por base l'autosostenimientu, el caltenese ello mesmo p'enriba la continuación del progresu que va a dexalo ensin ser quien a apurrir satisfaición conviértese nel so propiu canibal. El futuru basáu esclusivamente na defensa del presente dexa al primeru ensin conteníu. Dicho d'otra forma, una actitú reaccionario ye socialmente autodestructivo. Y, dende ciertu puntu de vista, atreveríame a decir que hasta personalmente; pero bueno, esto ye quiciabes tovía más relativo.

Y vuelve a apaecer la dulda: ¿zarrar los güeyos caminando hacia'l suañu o llendase al presente reduciéndose a soluciones concretes a problemes concretos ensin mayor perspectiva del camín pel que vamos? (ye curioso como nesta comparanza paecen intercambiase les etiquetes de racional y emocional respeuto l'anterior - y sí, l'usu de la palabra suañu foi nesti casu interesáu...). La rempuesta pue ser, como siempre personal y transferible, l'equilibriu basáu na perspectiva.

Pue ser entós que la llucha pola utopía seya, non deseable, sinon necesario dafechu. Non por idealismu sinon pol fechu d'afayar el placer nel procesu de busca de la felicidá. Ello ye: una vida persiguiendo la utopía y una revolución pola felicidá.

[traducción al castellano en el primer comentario]

Les circunstancies fixeron que tuviera que vivir mirándovos constantemente a los güeyos,
ser el blancu de les sensaciones que remanecen de les vuestres pupiles.
Ello faime decatame del mal que vos come per dientru,
d'esa enfermedá curable na que vivís de contino.
Y surde en min un rasgu d'humanidá
que llega a faceme esmolecer
pola vuestra tristura.

Y llanzo al aire una alvertencia. Tresparente, sincera, ensin mayor intención.

D'humanu a humanu, daivos cuenta: sois capaces de finar un suañu por una firma nún papel, reducir la vida al tiempu que pasáis temerosos vixilando la vuestra llende, garraos a los vuestros recuerdos tanxibles o apropiándovos de lo inmaterial. ¡Vos!, que mos ficísteis esconsoñar d'esti suañu, desagospiando la fábrica de suaños pa baltiar l'idega n'escombru y desaniciar la vida que flota nel aire tornándola en peste, en noxu, n'inaición. Obligando a los vuestros a vivir na inanición dafechu. Darréu, otra vuelta sabréis autorrecompensavos. Xirar sobre vosotros y saber masturbavos al ver que la xusticia de la llei se sobrepón.

Y nós, probinos. Otra vez a volver a equivocamos, a esguilar poles les vuestres llendes ya muries y volver a topamos con esi desaniciu nel que finca la vuestra llei. Sabréis entos miramos arremellaos, tomar xeitu paternu y facer que reñamos mientres debuxáis de nuevu la llinea que trazásteis mal día ente'l bien ya'l mal. Quiciás teis no cierto, pero ye muncho más sabrosa esta mentira que me fai más real la mio vida.

Namás quiero, anque seya per un momentu robáu a un parpaguiar, poder facevos sentir lo que siente la piel cuando ta en caldia; cuando la mente ta enceso y hasta'l mieu s'espanta. Cuando s'arramen sorrises, nervios, señaldá. Esa victoria de sentise ún dueñu del so propiu presente, d'engañase y creyer que por querer yá puedes, de vivir y ser llibre mientres llees nes parés que'l futuru ye un cuadru sobre'l que garabatiar.

Deprender, qu'esta mierda de vida dacuandu apurremos xugu. Nel que podemos bañamos, del que podemos beber, nel que podemos morrer faciendo alcordanza d'un instante. Y entrugase ¿qué más da si m'equivoco? si sé conformame con facer de cada minutu un cuentu de fades nel que nun importa que haya un final. Que lu hai, pero la meta ye güei y non mañana.

Sigo tendiendo la mano y sé que daquién me la cortará si la sigo estirando. Que responderé a la hostia y voi siguir alendando (o non) porque lo que llate ye la mio presencia entá más que'l mio propiu corazón.

Echo cuentes, y sé que calcular nun ye la mio virtú más cercano, y por munches perres que xorrezan d'esi perru ensin amu, d'esi escombru al que un día vos quixisteis agarrar...decíme ¿cuantu tiempu produciendo tendréis que alienalo? ¿cuantos años d'euros podrán llegar a algamar tolo que en vida, sensaciones ellí fui yo quien a ganar? Creo que eones, tiempu que nun veréis nin en presente nin en pasáu, tantu que nun sedréis quien nin siquiera a imaxinalo mientres yo guardo los mios frutos que guañaron de segundos semaos de llibertá.


Dedicáu a la peña que fizo posible too esti tiempu la ReFLEXón (la lliteralidá) y a la que durante estes llinies sintió, a lo menos, un principiu d'empatía (la metáfora).
Gracies y seguíi suañando anque el marcu lu pinten mañana otres parés.
Llarga vida a la fábrica de suaños.