Caún vive obsesionáu con dalguna cosa. Nel casu'l que escribe nesti momentu, hai qu'almitir la tremenda obsesión (bien de veces traicionada) d'evitar la repetición; una zuna qu'algama el so cumal cuando falamos de espeyar pensamiento na forma escrito. Quiciás pola cuestión de la mayor persistencia escrita de la espresión de les idegues y por la capacidá de ser recuperada y repetida d'esta miente. Tampoco vamos descartar una deformación amateur pol cultu a la consevación del mediu escritu personal y familiar.

Cuando aporten estes feches, marcaes nos calendarios por santes inventapatries de colonización cultural nacional-católico y col trescursu del tiempu aumenta sobremanera esti problema. Ye perdifícil intentar daqué un 8 de setiembre que "nun tea inventao yá". Ye casi imposible facer una narración orixinal d'unos fechos que repítense ensin apuru dengún y con unes consecuencies que nun van acullá la semeya del momentu.

Van dos párrafos namás y ta entamando a apaecer un cuadru d'esi gris que mata. Esto sí que ye deformación profesional y vezu avezáu. Sé que nun sabemos nada de cómo ye esi sitiu, Nenyure, que nunca sal nos mapes; pero sí que podemos acercamos a acolumbrar de qué color ye'l so paisaxe. L'horizonte en Nenyure ye del mesmu color que'l cielu nos díes nos que la borrina baxa a saludar: buxu.

Nun sé si ye güei ye'l día más afayadizu pa celebrar el sentimientu identitariu. Si lo sedría'l 25 mayu o el día que cayimos de la burra y mos dimos cuenta que col grandonismu que gastamos más que facer celebraciones añales tamos marcando'l pasu d'una cuenta atrás hacia l'escaezu, pero claro, pa poder marcar esi día nun almanaque tendría que llegar primero. A lo meyor lo que mos queda por recordar esti día ye la esperanza de que aporte, tampoco lo sé. Güei ye de xuru un día d'incerteces. No que creo que tamos munchos d'acuerdu ye que nun mos fai falta un día (falar d'Asturies en singular, como si fuere una sola persona paezme dañino; lo mesmo que marcá-y unes llendes nun papel) sinon tol restu de l'añu, que ye'l tiempu que fai falta pa trabayar, que ye lo que mos fai más falta en llugar de celebrar el movimientu d'un cadabre.

Otru añu más y la mesma reflexón.

Hai daquién na televisión alcordándose de la santina, España y lleendes varies. Yo acuerdome de que esti añu siguimos saliendo a pidir un derechu básicu como ye l'oficialidá de la llingüa, el respetu a la cultura, la xusticia y la llibertá en forma de mil lluches obreres y sociales.

Nun van llover fleches del cielu, nun vendrá nengún santu a marcamos el camín nin sedremos el niciu creau postmortem d'un imperiu que nun fai más recordar lo que foe. D'esta xesta namás mos van a salvar los nuestros puños y güei ye tan buen día como otru pa entamar. Quien sabe, quizás al final sí que podamos acabar celebrando daqué. Too sigue igual, igual queda l'arguyu de confirmar que seguimos al pie del cañón añu tres d'añu.

¡Puxa Asturies llibre! ¡Nun te quedes n'estáu!