Ye por toos sabío que hai xente que s'aprovecha de too y faen necesario que s'apliquen fuertes controles pa que nun se abusen de les llibertaes y de los derechos. Por exemplu, hai xente que garra la baxa pa iguar la so xalé, pa trabayar n'otra cosa... Xente que utiliza la llibertá d'espresión pa atacar a otros, la so dignidá, la so propiedá... Xente que va pela cai faciendo lo que-y peta ensin aparase a pensar nos demás. Y esto nun puede permitise, hai que poner midíes dende yá; llendar esti espaciu del que s'apoderen y afitar un control afayadizu que permita nun esperdiciar los recursos.

Tamién que hai xente que aprovecha les facilidaes que da la llei pa tener a trabayadores contrataos en precario, n'afitar poderes de fechu fuera de tou control arrodiando les decisiones que correspuenden a la voluntá popular, en poner les instituciones del estáu baxo los sos intereses económicos. Hai qu'aprovecha la coxuntura pa facer caxa, recortar derechos alquirios y esprimir a unos sectores en favor d'otros... Pero bueno, tampoco seyamos asina, nun hai que xeneralizar ¿non?

Y ye que hai xente que ye, p'enriba too, cínico dafechu. Porque sinon estes coses nun les entiendo.

Dicen que muertu'l perru acabose la rabia. Mienten. Y la conspiranoya propio nun ayuda a esclariar si ye una mentira interesada o non, anque teniendo'n cuenta que últimamente'l desinterés namás añera onde nun tienen ciertes persones nada que ganar, tiendo a decidime pola primer opción.

Y ye que esti ye un día peramañosu pa pensar nello. Güei fai 35 años que morriera'l perru, por embargu, nun ye dificil topar muestres de que la rabia sigue vivo y mordiendo.

La culpa hai que dir a buscalo a la desinfeición, o meyor dicho a la falta desinfeición, que se-y fizo al cadabre y a l'escena del delitu. Una escena que tuvo infestada de rabia per 40 años tres sufrir un tumor escontra'l que nun se pudo facer nada. En llugar de tomar muestres de la enfermedá, usales como vacuna nes xeneraciones postreres de forma que'l perru se desficiera en cal vivo; esa cal tirose dafechu enriba'l tratamientu dexando que'l texíu necróticu s'espardiera per onde-y petara. Asina, col pasu del tiempu, célules nueves teníen que convivir cola carne muerto y coles coraes revueltes que dexó too esi tiempu de maltratu al organismu.

Asina, anque l'enfermedá tenía cura, pa ello facia falta desaniciar del too amplies zones de carne infeccioso pa que les nueves célules apoderasen esos cachos ensin llegar a infestase tamién. Poro, los güeyos anque quixeron entamar a ver, nun fueron quien a evitar la miopía; les oreyes, al mesmu tiempu que volvíen a oyer tapáronse pa evitar el dolor de cabeza producíu polos glayíos qu'abarrenaben los tímpanos. Y les manes, tovía enllenes de mieu y coles mancadures abiertes tovía supurando metieronse de secute nos bolsiellos buscando apalpar daqué calor y que la sal nun llegare a les postielles mal formaes. El tastu, col sindrome del fumador, nun yera quien a estremar sabores acullá esi tastu nicotinosu que-y tuviera afogaes les papiles per tantu tiempu.

Ello ye qu'ensin sentíu tornó ensin xacíu.

Como toa infestadura que nun s'apara a tiempu, acangrenó y llega un tiempu nel que l'única aición válido ye cortar polo sano. Porque a nós ye lo que mos dexaron, lo que mos queda: la rabia... y la necesidá de usalo como antidotu.

Dicen que morrió'l raposu
camín de la romería,
si morrió que lu entierren
buenes oveyes comía.

Dicen que morrió'l raposu
asina morrieren venti,
cuantos más raposos muerran
más pites come la xente.

(tradicional, cambiao y adautao)

Enfrente la radiografía nun hai rempuesta. Hai tantes tomes que ye dificil distrayese del problema.

Sal el güesu escarniáu cola buena nueva, naide topa la sorpresa no que asoleya: puedes pintame'l cuadru con colores nuevos, que yá sabemos bien que les coses nun van onde les punxemos. Canta esti cantar como si nun lu supiera, nun tardaré en finxir y someteme a la sorpresa. Otra más, otra radiografía d'esta la nuestra realidá. Lo mesmu que una tresparencia.

Yá, selo yo, sabe'l mundiu...que'l diañu ye diañu y anda cada día más curciu, enchipáu y acarriando colo que pueda mientres aparta pa'l so llau hasta lo que-y revienta. Puede ser que, anque de rebote, tú tamién sepas que sobren lluces que allumen y apurran una rempuesta mientres mos apetiguñamos y acorripiamos toos na mesma habitación.

La páxina en blancu d'esta altura nesta hestoria ye pa daquién que seya quién a furar la fola. Que venga y que me cuente lo que hai al otru llau, que esti ta pervistu y nun me presta abondo recordar. Dime ¿qué me puede pasar si m'atrevo? si escaeciera nesti instante tol mieu que llevo dentro, si cruciara, si pasara, corriera ensin relevu...si saltare de cabeza a esi mundu que me prometo.

Toi fartucu de radiografíes d'actualidá, de diagnósticos, d'ensames d'espertos na materia. Agora namás m'importa saber si hai vida al otru llau.

A los estaos nun se-yos puede pedir otra cosa que nun seya un mínimu d'humanidá, el restu pertezmos. Magar que cuenten coles vides de los ciudadanos pa llevar a cabu la so necesidá de facer fluyir el poder (unes vides más conformes que otres, bien cierto ye, a la fin nun ye otra cosa que un arma d'enayenación d'humanos pa humanos), nun se puede permitir menos que una especie de derechu de guerra; sicasí en vez de ser ente estaos, nesti casu estiéndolu a cualquier tipu de sociedá. Al fin y al cabu, como persones, préstemos o non, tócamos rellacionamos con ello.

Asina, lo mesmo que un estáu autolexitímase (o lexitímenlu, tovía nun vi a naide xugar solu) pa apoderase d'un territoriu colonizándolu y exerciendo una doble dominación, ya que esti sometimientu nun remanez de la voluntá coleutivo propio sino ayeno. Qué menos qu'esixir que darréu d'aprovechase d'esa situación salga d'ella, a lo menos con un mínimu de dignidá.

Esti ye'l casu del Saḥara Occidental, colonia española dende 1884 tres el repartu de tarta imperial apautáu na Conferencia de Berlín. Situación que acabó cuando en ochobre de 1975 el rey Hassan II (buen amigu de Juan Carlos I) entama la "Marcha verde", una estratexa nel que los civiles marroquíes usaos como escudu humanu entamaben otra colonización del territoriu. España, pendiente d'un dictador agonizante, consideró que tenía meyores coses de les que preocupase. Asina que la so respuesta fue'l desagospiu del territoriu nel más lliteral "colar por pates". En febreru de 1976, les últimes unidaes españoles abandonaben el territoriu saḥaraui, el Frente Polisariu (una organización pola lliberación nacional saḥaraui) proclama la Republica Árabe Saḥaraui Democrática y Marruecos y Mauritania repártense el Saḥara Occidental. Too al empar y ensir tiempu p'alendar.

El resultáu, ente los enguedeyos de la política y el derechu internacional, ye que España ye tovía por llei potencia colonizadora (yá que en ningún momentu se fexo la descolonización) mientres que de factu la so soberanía ta partía ente'l control marroquí, el mauritanu y el de la República Árabe Saḥaraui Democrática. Y asina tan les coses de fai 35 años: pendientes d'un referendum que nunca llega, con una ocupación violenta de fechu y un llaváu de manes de llei.

Por si fuera poco que dixerir, tovía mos tenemos que topar con actos de soberbia como estos por parte del Reinu de Marruecos y por llavaos de manes como los de los demócrates.

Y eso que nun yos pedimos nada más que respetar los derechos humanos..., por si fuera demasiao.

Puxa'l Saḥara Llibre.