Non, nun voi enllename d'esa gayola fervescente qu'esguila llombu a traviés nes fiestes de prau y poneme a cantar con una mano nel corazón y otra nel cacharru. El que busque esi tipu de folixa que siga a la gueta d'ello n'otra campera. El títulu d'esta entrada namás asemeya a esi complexu o certeza d'incapacidá qu'abellugamos munchos de los que sufrimos n'Asturies cuando pensamos nel presente, nel futuru y nes idees qu'axunten y formen dambos conceptos.

Falar de política anguaño ye, según se mire, un actu de valor o d'infinito insensatez. Nun tiempu nel que tolo rellacionao cola política despide un arume mierdosu espardíu dacuando pola propia podredume del actu, dacuando pola mierda qu s'arroxa nello nun actu populista col únicu envís de desacreditalo (a ello y a toles persones que n'ello se mueven) ponese a escribir sobre política ye como invocar al diañu en tiempu inquisitorial. Pero hebo una vez na que la política nun yera más que'l nome común pa referise a les interacciones de poder ente les persones y les acciones encaminaes a modificar eses rellaciones, más que la profesionalización d'un trabayu que (con bien d'escepciones) busque un puestu de poder o remuneración como mediu de facilitación de vida. La política ye más qu'eso y ta'n caún de los que participamos nuna sociedá.

Precisamente puede tener xacíu nesta combulsión retomar el debate d'idees, dexar de falar d'abstracciones nel púlpitu parlamentariu y escomencipiar a atacar los problemes y necesidaes de frente.

Otra moda frecuente d'esti tiempu ye la de apartase del conceptu d'izquierdes y dereches, falando como si tuviéremos nuna fase d'abolición de les clases na que nun tuviera xacíu falar d'elles y de los intereses de les persones que les componen. Ye esa abstracción descomanada la que dibuxa una llinea que dixebra les palabres que se pronuncien nos parlamentos y les palabres que berren por necesidá na cai. Nun nos reconocemos nes idees, poro, deducimos que tan superaes; pero nun nos aparemos a ver si esa irreconocencia ye a la vez un productu d'otres idees. Tampoco nos esmolecimos por revisar y actualizar eses idees supuestamente superaes.

Dende equí ye inevitable tomar una óptica de clas. De clas obrera, de proletarios que quieren dexar de selo y garrar el rumbu de les sos propies vides. De reconocese na Historia y nun ablayar proyectándola hacia'l futuru, d'escribir esa Historia como los protagonistes de la mesma (y nun toi pensando equí'n nengún nome propiu). D'enfoques radicales, que non necesariamente estremistes, que apunten y finquen nel raigañu mesmu de los problemes. De denuncia de l'apoloxía de lo cosmético no social.

Y dende esti llugar del mundu, dende nenguna parte. Dende un llugar abandonáu nel mundu de la globalización, como lo son por defeutu tolos llugares que componen esi globu. Esi mundu y esa globalización qu'olvida bien frecuentemente que los conxuntos tan formaos por individuos y qu'estos al empar tienen les sos propies necesidaes. Pa nun perdemos vamos aceptar el marcu natural nel que nos tocó movemos: Asturies. Nun vamos gachar la cabeza cuando nos digan que nun ye'l más guapu nin el más grande; que probablemente seya verdá, pero que nun nos mueve la valoración estética del mesmu sinón la forma d'articulalu socialmente. Vamos intentar pensar global y actuar llocal, llocal namás como se tien qu'actual en plenu sieglu XXI, refugando idealismos que quedaron no decimonónico. Ello too ensin perder la identidá que situemos dientro d'esti globu, porque una vez perdida esta namás podemos perdemos en palabres que lloren al debalu y que nun son a calmar de nenguna forma.

Y asina, nin más llarga nin mas corta que cualquiera, poner les cartes sobre la mesa ya intentar facer el xuegu. Que nun lu xueguen otros por nós nin nos digan con qué cartes xugalu. Estes son les nuestres cartes y estes son les nuestres decisiones.

Vamos a volver a la realidá, vamos a reconocer los problemes, vamos a volver a les idees. Anque, de toles formes, son namás palabres: un post, un artículu d'opinión, una envalentonada nun chigre... nada nuevo.