El llunes pasáu’l Conceyu de Samartín del Rei Aurelio convocó una plaza de técnicu mediu pal Serviciu de Normalización Llingüística. Dende l’Asociación de Trabayadores de la Normalización Llingüística detectaronse delles irregularidaes nes bases de la plaza polo que pidieron al Conceyu de Samartín que vuelva convocar la plaza solucionando eses “llagunes” nes bases.

Ente les irregularidaes que toparon na Asociación tán: "el que nun figure cuála ye la baremación pola que se considera aptos o non aptos a los aspirantes; nun queda claro si se va facer fase d’oposición; nun esiste un temariu; les pruebes selectives, en casu de que les hubiere, nun son les más adecuaes, sobremanera la entrevista personal; y tampoco nun s’indica cuála ye la puntuación de cada prueba".

Dende l’ATNL, entienden que "les places de técnicu/a en normalización llingüística han tar unificaes no tocante a les pruebes selectives. Dende hai años los responsables de los SNL venimos defendiendo que los procesos de selección de los Servicios pasen por una serie de pruebes onde s’evaluen nun solo los conocimientos xenerales propios de la plaza (Estatutu d’Autonomía, llexislación sobre la llingua asturiana, la normalización nel ámbitu de los Conceyos) sinón qu’ha evaluase de manera oxetiva’l conocimientu y la competencia llingüística de los aspirantes con pruebes escrites y orales".

Na opinión de l'Asocaición "tamién ye importante la composición del tribunal calificador, onde tien d’haber persones especialistes en llingua asturiana y en normalización llingüística".

Dende la formación de l’asociación vienen reclamando a la Conseyería de Cultura una implicación mayor nos procesos de creación de SNL y consideren que’l papel de la Conseyería de Cultura "ye más que repartir subvenciones pa la creación de los Servicios, ha vixilar cómo se creen, asegurando la mayor efectividá del mesmu". Per otru llau, dicen seguir esperando la solución a la inestabilidá qu’añu tres añu vienen denunciando y que pasa necesariamente pola firma de convenios ente los Conceyos y la Conseyería de Cultura: "cosa qu’hasta’l momentu la Conseyería de Cultura se negó a firmar y a solucionar".

Va unos díes anuncióse l’apertura de nuevos Servicios de Normalización y dende l’ATNL piden "nun solo a los Conceyos sinón tamién a la Conseyería de Cultura que los procesos selectivos se faigan con seriedá y tresparencia yá que d’ello depende’l posterior trabayu de normalización".