El Conseyu Executivu del sindicatu mélicu Simpa decidió convocar una fuelga de xornada completa ente los próximos díes 14 y 17 d'ochobre qu'inclúi a los facultativos estatutarios, llaborales, funcionarios, profesores rellacionaos y MIR, tanto d'Atención Primaria como d'Especializada y d'equipos del SAC, el SUAP y el SAMU.

L'órganu decisoriu del Simpa tomó güei esta decisión tres analizar el "incumplimientu" del acuerdu algamáu el 30 d'abril ente l'Alministración del Principáu y representantes sindicales, nel que destaca l'incrementu del preciu de la hora de guardia de 14,85 a 22 euros, tovía perbaxo d'una decena de comunidaes autónomes.

Según calcularon dende'l Simpa, el Principáu debe ente 6.000 y 12.000 euros a los facultativos en conceutu de retrasos, al tener l'acuerdu efeutu retroactivu dende'l 1 de xineru del 2008.

Ésti foi'l principal motivu que llevó al sindicatu a entamar les movilizaciones y xeneralizar el paru de magar la segunda quincena del mes que vien, anque esperen que nun seya necesario prollongar la fuelga "porque l'Alministración entre en razón, reflexone y cumpla lo pautao", apuntaron fontes del Simpa a Europa Press.

"De momentu, acordamos una fuelga de cuatro díes, como muestra una vez más de la nuesa responsabilidá y interés n'algamar un acuerdu y amenorgar el perxuiciu a los ciudadanos", añadieron".

De la mesma manera, mostráronse espectantes anque poco esperanzaos en que'l Sespa se ponga en contautu pa paralizar el paru y cumplir "lo qu'él mesmu firmó". "Nun pue confiase nuna Alministración que nun cumple los sos propios acuerdos, los mélicos tamos desencantaos", aseguraron dende'l Simpa.

Pero'l "incumplimientu" del acuerdu "molesta especialmente" al sindicatu mélicu porque nun sólo afeuta al aumentu del pagu pola hora de guardia, sinón que tamién afeuta a lo pautao sobre les meyores de les condiciones organizatives y salariales pa los mélicos que faen sustituciones y guardies nos hospitales y tamién de los equipos especializaos del Serviciu d'Atención Continuada (SAC), del Serviciu d'Urxencia d'Atención Primaria (SUAP), y del Serviciu d'Anteción Mélica Urxente (SAMU). "Tienen un trabayu mui duru y responsable, y tien de ser asina reconocíu", caltién'l Simpa.

Sicasí, na convocatoria de fuelga nun s'inclúi nenguna alusión a la paralización de les negociaciones sobre los turnos de tarde que'l Principáu pretende crear n'Atención Primaria.

Pel momentu, el Simpa yá elixó a seis representantes del Comité de Fuelga y espera nomar a más en próximos díes, hasta algamar una cifra sobre diez o doce, que van ser los encargaos de valorar si xunto al paru xeneralizáu van desarrollase otres actuaciones reivindicatives.

"Nun mos podemos fiar del nuesu mediador", llamenten en referencia a la xerente del Sespa, Elena Arias, y comenten que ye la Conseyería de Salú y Servicios Sanitarios la que los "emburrió a convocar una fuelga ante la so falta d'interés por dialogar y la so habilidá pa contradicise y meter la pata".

"Tamos cansaos de que digan que somos privilexaos y que cada reivindación mos la echen p'atrás exixéndomos más, puesto que sólo pidimos igualamos colos mélicos d'otres comunidaes y que se reconoza'l nuesu esfuerzu con una llarga preparación académica, turnos mui llargos, de nueche y en festivos", calquen dende'l Simpa.

De la mesma manera, el sindicatu apuntó que demientres la xestión del Insalud n'Asturies produxéronse dos fuelgues, y en cambio dende les tresferencies de salú nel 2002 yá se celebraron seis "pa reclamar "les mesmes condiciones que n'otres partes d'España".