El miércoles 5 de payares costituyóse el Conceyu por Otra Función Pública n´Asturies (COFPA), como asociación abierta a tolos trabayadores pertenecientes a les estremaes Alministraciones Publiques asitiáes n´Asturies, cualquiera que seya la rellación de emplegu que tengan con les mesmes.
El Conceyu xurde nun momentu nel qu´el Gobiernu de Álvarez Areces pretende consolidar y ampliar dafechu el sistema de función pública clientelista güei istauráu, sofitáu na confianza personal y nel control políticu del personal, mediante una nueva Llei de la Función Pública Asturiana, de la que ya se conoz el anteproyeutu, na que se incorporen tolos preseos afayadizos pa degradar darréu los principios de igualdá, méritu y capacidá nel accesu y na promoción profesional, y les condiciones de imparcialidá y oxetividá imprescindibles para cumplir cola obligación de servir exclusivamente a los intereses xenerales de los ciudadanos y ciudadanes.

Poro, el Conceyu por Otra Función Pública n´Asturies (COFPA) naz pa defender un sistema de Función Pública trasparente y democráticu y pa sofitar y difundir un modelu de servicios públicos universal y solidariu, que nun seya obxetu de negocios privaos.
El Conceyu por Otra Función Pública n´Asturies (COFPA) ye, por tanto una asociación al serviciu del interés xeneral y non un grupu corporativu, nin una central sindical, que tien estatutariamente los siguientes obxetivos:
-Defender el cumplimientu escrupulosu de los principios costitucionales d´igualdá, méritu y capacidá nos procedimientos d´acesu al emplegu públicu y na promoción profesional o carrera alministrativa de los trabayadores de l´Alministración Pública, d´acuerdu colo que dispón l´artículu 23.2 de la Constitución española.
- Defender, promocionar y sofitar un sistema d´organización y furrulamientu de la Función Pública qu´arresponda a los principios d´oxetividá, imparcialidá, eficacia y llegalidá, conformes col artículu 103 de la Constitución española.
-Perseguir y denunciar toles práutiques, decisiones, polítiques y actuaciones concretes de los poderes públicos, que frayen los principios costitucionales reguladores de la Función Pública, con especial enfotu nes polítiques clientelares de xestión del emplegu públicu, exerciendo, nel so casu, les aiciones llegales afayadizes previstes nel Ordenamientu Xurídicu d´aplicación; asina como les actuaciones y campañes de grupos de presión, económicos, mediáticos o de cualquier otru tipu, empobináes a desprestixar y argayar el sistema costitucional de Función Pública.
- Defender, sofitar y esparder un sistema de servicios públicos qu´afite y garantice la cohesión social, la solidaridá y la igualdá d´acesu de tolos ciudadanos, con independencia del so nivel de renta.
- Denunciar los procesos de fuga del Drechu Alministrativu hacia fórmules y sistemas de xestión de los servicios públicos propies del Drechu priváu realizáes col oxetivu, pente otros, d´escurrir los procedimientos d´acesu al emplegu públicu conformes a los principios de publicidá, igualdá, méritu y capacidá.
Pa contautar con el Conceyu y aconceyáse pue facése na direición de corréu electrónicu [email protected] o al traviés del blog www.otrafuncionpublica.blogspot.com.

Po la Xunta Xestora
Xabiel Álvarez Villa