Según lleemos en Les Noticies:
Más de dos mil profesores d'enseñances non universitaries manifestáronse n'Uviéu en contra de l'aplicación del Plan d'Evaluación del Profesoráu previstu pola Conseyería d'Educación. Esta manifestación convocóla la Xunta de Personal Docente non Universitariu d'Asturies baxo'l lema «¡Retirada yá!", y en contra de esta iniciativa que, al so xuiciu, ye «un control absurdu» pa que los directores de los centros educativos pongan nota al profesoráu.


Los sindicatos SUATEA, FETE-UXT, ANPE, CCOO y CSI-CSIF d'Asturies apoyaron esta manifestación que tamién foi celebrada pa protestar pola non convocatoria de la Mesa Sectorial d'Educación.
La presidenta de la Xunta de Personal, Beatriz Quirós, aseguró qu'esta movilización realízase pol «malestar» que ta produciendo nel profesoráu asturianu l'«alarmante incrementu de xeres derivaes de la improvisación, la descoordinación y la falta de consideración de la Conseyería, que ta entorpeciendo'l normal desenvolvimientu de l'actividá educativa».
Fontes del SUATEA comentaron a esta redacción «que la Conseyería d'Educación reconoz, sotto voce, qu'esti Plan d'Evaluación del Profesoráu pue cambiar la relación llaboral del profesoráu cola Alministración; trátase d'una nueva carrera profesional na qu'ún profesor p'avanzar en perres, en derechos, en reconocimientos va tener que contar col preste d'esa evaluación. La Conseyería d'Educación nun tien competencia sobre esto. Ye Alministraciones Públiques, la conseyería d'Ana Rosa Migoya, la que da les órdenes d'evaluar a los profesionales. Educación lo único que fai ye adaptar una serie de cuestiones técniques pa ponenos una putuación determinada. Esto ye esperimental, de momentu, pero ta claro que l'Alministración quier exercer esi control. Los enseñantes yá tenemos evaluaciones efectives: sistemes d'inspección, etc.».
El malestar al que se refier Beatriz Quirós débese, sobre manera, a la coincidencia nel tiempu d'esta evaluación «con otros papeleos burocráticos» a los que se ve sometíu'l profesoráu: la evaluación diagnósticu, evaluacióbn PISA, les evaluaciones de los alumnos y otros papeleos que fixen los centros.«La xente nos centros ta paralizao. Date tiempu a facer too, menos a poner clase», argumenten.


SUATEA, nesti sen, observa con preocupación el vaciamientu de competencies de la Conseyería d'Educación, vaciamientu qu'enriqueció les responsabilidaes d'Alministraciones Públiques. «Cada pasu que da'l Conseyeru Riopedre, tien que pidir permisu: pa la ufierta d'empléu públicu, pa convocar les oposiciones... ta ehí de pelele, efectivamente», afirmen.
Otra manera, reclamen a la Conseyería d'Educación que negocie colos «lexítimos» representantes de los trabayadores los temes referentes al sistema educativu y, nesti sen, esixeron la convocatoria de la Mesa Sectorial d'Educación. «Ta convocándose la Mesa Xeneral de Funcionarios Públicos, na qu'Educación por proporcionalidá nun tien representación. Los médicos son 1.000 funcionarios más que los enseñantes y tán dividíos n'ocho árees sanitaries. Cada área sanitaria tien una Xunta de Personal. Nós namás tenemos una Xunta de Personal. A la hora de la representatividá (nós tenemos 42, los médicos 170) el SUATEA tuvo que dir como asesor d'un Sindicatu de Sanidá. Y asina toos».
Acusen a l'Alministración de nun falar colos representantes sindicales de la enseñanza y de facer «meros paripés».
«Cambiaron les normes depués d'unes elecciones sindicales. Lo que tán faciendo ye quitanos los derechos sindicales a los trabayadores de la enseñanza. Los docentes nun tamos a la hora de negociar», aseveren. La Conseyería d'Educación nun negoció colos representantes educativos dende hai dos años, depués de les últimes elecciones sindicales, nel que SUATEA s'alzó como sindicatu mayoritariu, y la entrada en vigor del Estatutu de la Función Pública.