Escrito por ObservatoriuLlaboral el martes, 6 payares de 2007
Vía Europa Press:
Más:
El númberu de desemplegaos inscritos nos servicios públicos d'emplegu del Principáu subió en 2.161 persones nel mes d'ochobre, lo que supón un incrementu del 4,60 por cientu con respecto a setiembre, según los datos espardíos güei pol Ministeriu de Trabayu y Asuntos Sociales.
Sicasí, con respecto al mes d'ochobre del 2006 el Principáu foi una de les cinco comunidaes nes que baxó'l desemplegu, con un recorte del 4,49% y 2.310 paraos menos.
Igual que'l Principáu, na tasa interanual rexistraron descensos del desemplegu Galicia (-3,41%), País Vascu (-3,26%), Cantabria (-0,49%) y Castiella y Llinón (-0,34%).
Con tou ello, a finales d'ochobre la cifra de paraos inscritos nes oficines públiques d'emplegu na rexón asitióse en 49.133, de los cuales, 30.637 yeren muyeres y 18.495 homes. Por edades, el colectivu de menores de 25 años aporta 5.655 persones al desemplegu, frente a los 43.478 mayores de 25 años.
N'ochobre'l paru medró nel Principáu en tolos sectores, anque de manera más acusada nos servicios, onde se rexistraron 1.671 desmplegaos más. Síguenlu la industria y la construcción, con 283 nuevos paraos, y 107 en cada casu, y per detrás l'agricultura, que suma 69 desemplegaos n'ochobre, y el colectivu ensin emplegu anterior, con 31 nuevos inscritos.
Dempués d'estos ascensos, n'ochobre'l sector servicios sigue concentrando'l mayor númberu de desemplegaos na rexón, con un total de 33.182 paraos. Síguenlu la industria (5.760), la construcción (4.372 paraos a finales d'ochobre), el colectivu ensin emplegu anterior (5.250) y l'agricultura (609 paraos).
De los más de 49.100 paraos rexistraos na rexón, 2.037 son estranxeros.
CONTRATACIÓN.
No que cinca a la contratación n'ochobre soscribiéronse nel Principáu 31.342 nuevos contratos, 4.951 más que nel mes de setiembre, lo cual supón un ascensu del 18,76%, llixeramente inferior al incrementu mediu rexistráu nel conxuntu nacional onde la subida de la contratación n'ochobre foi del 19,77%.
En términos internuales la contratación subió un 1,56% na rexón, con 480 contratos más de los soscritos n'ochobre del 2006, cifra inferior al aumentu de la contratación del 5,07 por cientu nel restu del país.
Más:
12 Comentarios