Na columna d'espublización abierta de Glayíu lléese esta entrada:





L'intención d'esa entrada ye claramente sorrayar cómo ciertos representantes de seiciones polítiques asturianes con un discursu centráu na crítica a les poltrones y les sovenciones garren tamién del sacu que-yos apurre'l gobiernu. Nun sé si tamién querrá dar a entender de forma collateral que la persona na que que cinca a lo llargo l'intervención anda metíu en actividaes económiques variaes...



Pero la parte que más me llamó l'atención (a estes altures de la vida nun-y sorprende a ún que inclusu el más críticu con elles ponga la mano per detrás pa apañer les perres que-y apurra'l gobiernu de turnu por mui "malu" que seya dientro'l so discursu) ye que al echar una güeyada a la riestra d'entidáes sovencionaes na páxina 42 tópase ún con entidaes como "Editorial Prensa Asturiana" (nesti casu como empresa qu'espubliza'l diariu La Nueva España) llévase una cantidá considerable qu'en suma por dellos proyeutos pasa de los 50.000 euros y otres como La Voz de Asturias sitúense tamién nesa cifra. Nun dexa de ser curiosa tamien qu'inicatives de los primeros como "L'oreya verde", que nun suel ocupar más qu'una páxina selmanal lleve 12.000 euros. P'enriba cuando tamos falando d'un mediu de difusión que suel axuntar a les voces más crítiques cola llingua y sede periodística de l'escuela gustavobueniense con tolo qu'ello connota nestos temes.





Sería simpático si nun diera noxu el ver como entidaes nes que la llingua asturiana ye poco más que marxinal aparecen abanderaes de proyeutos asgaya, n'ocasiones d'una páxina como mediu pa garrar sovenciones. Más grave ye'l contemplar como medios que se dediquen a la difusión n'asturianu dafechu lleguen, como muncho a igualalos...



Pa min, el puntu cimeru llega cuando lleo "Artículos de opinión en distintas secciones del periodico" y al llau la cifra de 7.000 euros...nesti tema tengo sentimientos encontraos, per un llau nun pueblo más qu'ablucar como se-y puen conceder ayudes a un mediu por dar cabida a opiniones d'otros que una de dos...o tan dirixíes pol propiu periodícu pa que s'escriban n'asturianu y asina completar la cuota necesaria, o simplemente s'aprovechen de que dellos utilicen la llingua asturianu como idioma vehicular nos sos escritos pa cobrar por ello. Desconozo si les firmes nesi diariu funcionen como negros al serviciu la direición del periódicu o simplemente se tan aprovechando d'otra xente pa embolsase perres...sería curioso ver que diríen delles entidaes sobre los derechos de l'autor nestos temes. Por otru llau casi que entamaba a tirame de los pelos al ver l'oportunidá perdía pa pagame les vacaciones y ye que mira que me costaba bien poco fundar Habitacion101 S. L. y mandalo pa allá, pero siempre tien que haber dalgún tontu qu'escriba n'asturianu por amor al arte...Quiciás habrá que pensar en sovenciones, pero a ver que me dicen darréu los que dicen que l'asturianu nun val pa nada...




Por cierto, la diferencia n'apuesta no tocante al material en papel en comparanza a los proyeutos web paezme qu'asoleya bastante l'escasu apueste polo medios n'Internet cuando, na práutica, son los que más llegada tienen a los llectores.



Y si creen que lo abultaos de les cantidaes ye por mor a l escasu concursu, pues non, na parte final pue vese que delles entidaes quedaren fuera por nun haber fondos bastantes.



¿Y si me diera por relacionar les perres concedíes colos canales de televisión terrestre concedíos y me diera cuenta que l'entidá más benefiada n'ambos ye la mesma? Tampoco vayamos a falar d'amiguismos, dios me llibre...