Les primeres palabres llevaben la dirección de la marcha atrás, nun ver más que la nueche a mala gana, l'esquinazu como recompensa polos servicios prestaos, el maldecir, el desdecir y el escuendese nún requexu a la gueta d'un minutu de calma. Y cola peligrosa cercanía añal de proponese repasar les cuentes. Asina ye que nun yera estraño el que-y pruyera a ún el dar media vuelta y colar, vivir de decisiones en caliente y el retrocesu de turnu.




Y claro, lo que tenía que ser, esmurcióseme el cientu esnalando qu'abellugaba ente les manes y, agora, a poneme a atropalu otra vuelta. Pero h.oder, hai veces nes que ye h.odío nun topar palabres, saber que van ser presa d'arrepentimientu al minutu siguiente...sentir el pesu que nun tienen, sinon que caún yos quier dar: tónicu perfechu reconstituyente del egu de turno. Asimilación en primera persona del neutru reflexu por mor del sentise debuxáu en pantalles ayenes. Yo, mientres tanto, en plan fatu, güeyando pal espeyu.



Cada vez que lo lleo paezme más bobá', por embargu, sigo ensin resistime a esa sensación tan prestosa de sacu vaciu, porque pa cargar con ello, yá tengo bastante.



Nestos díes alpenes garro un segundu pa emporcar dalguna fueya, y siempre xurándome que mañana tendré más tiempu. Como siempre, engañándomos colos mesmos trucos fáciles de siempre pa los díes duros davezu. Y yo, pa neciu, nun m'arrepiento...La parte bona ye que voi ganando aliaes y, de pasu, más cuerdes nes que colgame.



Lo más gracioso ye que, al final, tampoco ye too tan dificil, namás ye querer...y tener dalgún minutu pa nun facer nada. Too sea porque nenyure pueda remocicar la cara.