Según informa Infoasturies:
El centru de Candás vivió ayeri al mediu día una manifestación de los y les trabayadores de la fábrica d'Albo, a la que se xunieron unos 300 vecinos y vecines en solidaridá según recueye asturiasverde.com.

La empresa de conserves ye la última que queda en Candás, llocalidá que na primer mitá del sieglu XX foi la capital de la industria conservera d' Asturies. Los y les trabayadores anunciaron que van lluchar pa que nun se pieslle una industria que nun sólo xenera un bon númeru de puestos de trabayu sino que tamién ye parte de la hestoria y la esencia de Candás.

Vía Glayíu:
El martes dia 30, a les 10,30 de la mañana tendrá llugar una concentración d'apoyu a las Güeles de la Fabada Litoral, despedíess pola multinacional Nestlé.

La concentración llevaráse a cabu nos Xulgaos de lo Social de XiXón (Cai Prendes Pando) coincidiendo col xuiciu por despidu de dos de les tres Abuelas despedíes.

Según informa Infoasturies:
Güei día 26 de xunu los y les trabayadores "des- Konecta-dos" por Telefónica van facer una espicha vindicativa elantre de la entrada de Konecta n'Avilés.

La hora de quedada son le 17:00 hores frente la Oficina del INEM n'Avilés. Van acompangar a los y les trabayadores el monologuista Carlos Alba "Cellero".

Según informa Infoasturies:
Felguera Construcciones Mecánicas fizo ayeri, 24 de xunu, un paru de dos hores en cada turnu en protesta pol incumplimientu nel conveniu colectivu tocantenes al cobru de primes de producción.

El paru, que se va repetir otra vez el prósimu vienres 26, vien motiváu pol impagu de gran parte de la prima de produición a los trabayadores, "estes irregularidaes se lleven produciendo na filial de Duro Felguera dende va más de dos años, polo que les cantidaes que nos sustrayeron son bastante importantes" aseguren fontes del comité d’empresa de FCM.

Según informa Europa Press:
Los representantes sindicales de los trabayadores de la planta de Conserves Alto en Candás van pidir la mediación de la Conseyería d'Industria del Principáu pa tratar d'evitar el zarru de la instalación, anunciáu pola empresa la selmana pasada pal próximu 31 de xunetu.

Asina lo esplicó en declaraciones a Europa Press Marisa Gómez, responsable del Serviciu d'Agroalimentación d'UXT, encargada por esta central de llevar la representación de la plantiya afeutada. Esta tarde, personal y sindicatos caltuvieron una asamblea pa tratar la nueva situación surdida tres l'anunciu de la empresa.

El principal acuerdu de la sesión de güei foi'l d'acudir a la Conseyería d'Industria pa pidir la so intervención, tratando d'evitar la clausura de la planta. Trátase d'una posibilidá "que yá vimos los dos sindicatos (en referencia a UXT y Comisiones)", afirmó Gómez, qu'esplicó amás que'l Ayuntamientu de Carreño "yá ta faciendo les sos xestiones", motivu pol que tovía confíen en dalguna posibilidá de torgar el final de l'actividá.

La representante sindical esplicó que nel conceyu calteníu colos servicios xurídicos de la empresa'l pasáu vienres, éstos argumentaron la falta d'apoyu de les instituciones ente les razones del zarru. Tamién col envís d'informase al respeuto d'esta cuestión, pretenden dirixise a la Conseyería d'Industria.

CONCENTRACIÓN

Tamién se convocó una movilización. Va ser el próximu llunes, de magar les 13.00 hores, ante la planta candasina. L'aición reivindicativa va tener llugar dempués de la próxima xunta que los sindicatos van caltener colos representantes d'Albo, de magar les 10.00 nel despachu de la cai Santalucía. D'esti alcuentru, la plantiya espera algamar datos concretos que, según Gómez, demuestren les otres razone daes pola firma conservera pa la clausura: el 16% de baxada de producción y la reducción de gastos gracies al treslláu de l'actividá a les instalaciones de Vigo.

La responsable d'UXT descartó pel momentu la convocatoria d'una fuelga, pues "los emplegaos nun tienen por qué pagar esta situación cola perda de díes de trabayu".

Martes día 23, a les 7 de la tarde partirá del llocal de CSI en Xixón un gayoleru al empar que reivindicativu pasucais n'apoyu les Güeles de la fabada Litoral despedíes por Nestlé.

El pasucais discurrirá poles cais peatonales del centru Xixón, acompañáu por una charanga que pondrá música y ritmu a la denuncia d'una inxusticia manifiesta cometida pola mayor multinacional de l'alimentación.

Acude: si yá nun respeten nin a les Güeles, llegó'l momentu de decir basta!!

Según informa Infoasturies:
Los trabayadores de Vesuvius intensifiquen les movilizaciones en defensa de la continuidá de la fábrica en Riañu y fain frente a un casu claru de desllocalización que trai 100 emplegos directos ya otros munchos indirectos na Cuanca del Nalón. Si esti martes cortaron toles salides d’Asturies per carretera güei pela mañana marcharon dende Riañu a Uviéu xunta dellos cientos de persones.


Cientos de persones sofitaron a la plantiya de Vesuvius nuna marcha vindicativa dende la fábrica de la multinacional en Llangréu fasta les puertes de la Xunta Xeneral. La marcha salió de Riañu pasaes les 8:30 hores y finó pasaes les 13:00 hores delantre la Xunta Xeneral. Ellí un bon garrapiellu xente recibió a los trabajadores y los solidarios y solidaries.

Pel camín, munches foron les persones que dieron puxu y salidarizáronse al pasu de los manifestantes dende los sos vehiculos o dende les sos cases. L'españíu de petardos intensificóse a la enmtrada d'Uviéu pela Tenderina y tamién foron más los que dende les sos cases animaben dende les cases. La marcha taba convocada pol comité d’empresa (CCOO mayoritariamente y UGT) y sofitáronla vecinos de Llangréu, trabayadores de Diasa, xente de CSI, Andecha Astur o PCPE ente otros.

La concentración delantre de la Xunta Xeneral caltúvose demientres una hora, lo que duró un conceyu que dellos voceros de los trabajadores caltuvieron nel interior, y a ella sumáronse abondos uvieinos y uvieines que querían solidarizase colos trabajadores en llucha. L’árbitru internacional llangreanu Manuel Mejuto González tampoco nun perdió la ocasión de solidarizáse colos sos vecinos y tuvo presente na concentración.



Les movilizaciones van siguir mentanto nun se garantice la continuidá d'una fábrica que rentable y el cientu de puestos de trabayu que tán en xuegu.



Cada vuelta son más les movilizaciones obreres n'Asturies énte la fola de despidos, regulaciones d'emplegu o cierre d'empreses. Na cuyuntura socio-económica d'anguañu too indica que tamos énte un momentu de repunte de la conflictividá social.