El comité d'empresa de Felguera Construcciones Mecánicas (FCM) anunció ayeri la convocatoria d'una xornada de fuelga pa'l prósimu día 26 col oxetivu de esixir el cumplimientu del ERE (Espediente de Regulación d'Emplegu) firmáu en 2006 y denunciar dellos casos d'"acosu llaboral".

Según José María Díaz, presidente del comité del tamién conocíu como taller de Barros, nel últimu mes impuxéronse por parte la dirección de Duro Felguera cuatro "castigos desorbitaos ya inxustificaos", el más duru d'ellos de trenta díes de suspensión d'emplegu y sueldu a un emplegáu.

Los incumplimientos del ERE por parte de la dirección de la empresa son "constantes", según los sindicalistes, que indicaron que nun se modernizaron les instalaciones y los equipamientos del taller cuando yá se lleva la mitá del perióu de vixencia apautáu. Por embargu, lo que sí se aplicó inmediatamente n'esi ERE de 2006 foe la reducción de emplegu.