Escrito por ObservatoriuLlaboral el miércoles, 21 mayu de 2008
Según informa Europa Press:
Los precios de la lleche n'orixe cayeron hasta un 13% demientres los cuatro primeros meses del añu, colo que s'asitien perbaxo de los costes de producción, que tán ente 0,41 y 0,43 euros por llitru, según la Federación Española d'Empresarios Productores de Lleche (Prolec).
Nun comunicáu, Prolec pidió "un preciu xustu" qu'asitie a los productores n'igualdá de condiciones que la industria tresformadora de lleche y la distribución.
La Federación asociada a la Europea Milk Board (EMB), recordó que la política llechera de la Comisión Europea se dirixe hacia l'abolición del sistema de cuotes nel 2015, si bien la propuesta de 'chequéu médicu' de la Política Agrícola Común (PAC) recueye un incrementu añal de la cuota llechera del 1% hasta esi añu, lo que va suponer 7,5 millones de tonelaes adicionales.
"Cualquier incrementu de la cuota llechera na UE va llevar los precios n'orixe a la baxa, poniendo en graves dificultaes la continuidá de los productores nel sector", sostuvo Prolec, que reclamó a la comisión un "cambiu de les regles del xuegu" que permita trabayar n'igualdá de condiciones a ganaderos, industries y distribución "pa tener una producción sostenible pa Europa".
En concreto, Prolec y EMB defienden la necesidá de sustituyir l'actual sistema por un instrumentu flexible qu'igual la ufierta y la demanda, "sobre la base de les perspectives de venta nos mercaos y non de la tendencia de los mesmos".
Tres asegurar que la cuota se devaluó un 68% pola intervención del Estáu español, Prolec demandó que se compense económicamente la cuota mercada polos productores, como establez el Tribunal de Cuentes de la UE.