El día 11 d'esti mes Apple publicó embaxo la llicencia Apache el códigu de Gran Central Dispatch, ún de los componentes claves del so sistema operativu Mac OS X.

Esti componente encárgase de que seya'l sistema operativu quien xestione los estremaos filos d'execución de les aplicaciones, en vez de facelo elles mesmes. Ello optimiza al másimu l'usu y ocupación eficiente del procesador al empar que facilita a los desarrolladores la xera de construir aplicaciones multifilu, a les que-yos fai falta un control complexu sobre caúna de les víes d'execución que puedan llanzar.

Esta ye una teunoloxía importante nun momentu nel que la capacidá de computación de los PCs nun se mide tanto pola velocidá "punta" que son quien a llograr los sos procesadores sinon pola replicación de componentes (como son estos mesmos procesadores, o los núcleos de los mesmos) que fai necesario que los programes tean fechos pa aprovechar estes característiques d'execución multifilu.

Camiento que esti ye un componente importante que, al ser fechu públicu, puede servir pa integralu n'otres plataformes aprovechando asina esta idega de que seya'l sistema operativu el que garre'l control de los filos d'una aplicación y non dexar "soles" nesa xera a les aplicaciones.

Tres la compra de SUN Microsystems por Oracle les dubies sobre la direición y el futuru de les estremaes aplicaciones y polítiques llevaes a cabu por SUN entamaron a xorrecer. ¿Cual sedría'l futuru de Java? ¿qué facer con MySQL?¿y Solaris?.

Nel tema de Java paez que Oracle va decir daqué, yá que a estes altures sigue avanzándose col desarrollu de JDK 7 mientres tovía nun se publicó el JSR que col estándar Java 7 que de abellugu a toles especificaciones. Contrariamente a cómo se veníen faciendo les coses nes 6 versiones anteriores, dugamos que esta vez el desarrollu de les ferramientes va per delantre del trabayu de la Java Comunity Proccess encargada de la estandarización del llinguaxe. Esperemos que esto nun se torne no habitual nes versiones postreres y venga dau namás pola coyuntura actual.

Per otru llau, Oracle vien d'asoleyar una nota empobinada a los veceros de SUN Microsystems nel que cuenta dellos de los nuevos planes centraos nes plataformes SPARC y Solaris, según cuenta la nota que trescribo equí:

- Gastar más dinero nel desarrollu de SPARC de lo que venía faciendo SUN
- Gastar más dinero nel desarrollu de Solaris de lo que venía faciendo SUN
- Duplicar la cantidá d'especialistes dedicaos a proveer serviciu y venta de dambes plataformes respecto a lo que venía faciendo SUN
- Incrementando de manera espectacular el desempeñu del hardware de SUN integrando más estrechamente con él el software d'Oracle

L'anuncia fina con una "alvertencia" a IBM señalandolos como'l rival a batir con esta estratexa.

De xuru que los llectores avezaos (si que ye que queda dalgún vivu a estes altures) yá tuvieron que notar dalgún cambiu no estético na páxina nos meses caberos.

El casu ye que Habitacion101 vuelve con un formatu nuevu y non sólo pola estética sinon que, como se puede comprobar tamién na forma de crear los sos conteníos. Habitacion101 quier ser un sitiu orixinal, daqué que creo que nun se llograra tiempu atrás anque dellos de los sos conteníos sí que foron perusaos; polo que creo que nel fondu sí que se llegó a facer una aportacióna la comunidá. Pero agora, esti blog quier dir más allá. Non sólo va falase de temes relacionaos col desarrollu y la sociedá de l'información sinon que va aportase un granín d'arena más nel usu normalizáu de la llingua asturiana. Asoleyando que tamién se puede crear conteníu técnicu y non sólo líricu o lliterariu na Llingua. Ello nun quiero que se entienda como un dar l'espalda al restu de falantes d'otres llingües, sinon que prestaríame que ellos mesmos tamién collabolares y nun habría dengún problema en nengún momentu n'acerca-yos los conteníos a otres llingües. Magar que l'oxetivu de habitación101 nun ye zarrase, sinon abrise, pero abrise dende un mundu que sigue vivu y que tien munches coses que dicir nesta sociedá de l'información tan globalizada.

Como siempre abiertu a cualquier suxerencia o crítica, equí entama Habitacion101 2.0