Creative Commons 3.0 RSS CSS 2.1 XHTML 1.0
Entrar  
Rexistru
Lo que pasa detrás y delantre la pantalla 
Escrito por Sumiciu el vienres, 12 febreru de 2010

Esto ye al empar una noticia perbuena pa la llingua, el so usu y el so espardimientu pela rede y un regalu pa la xente non asturianofalante que, dacuando, intenta seguir esti blog. Y ye que presentóse'l primer traductor d'asturianu. Nun primer momentu ta disponible la traducción d'español a asturianu y en fase beta la inversa, asina como les traducciones a italianu, francés, inglés, euskera, catalán y gallegu.

Si bien les llingües en Beta apurren una traducción non mui correcta, la traducción del español al asturianu ta bastante llograda (anque nun dexa de tener dellos fallos)


http://www.uniovi.es/eslema

Escrito por Sumiciu el llunes, 25 xineru de 2010

Esa foi la frase que me vieno a la cabeza en lleendo que SourceForge bloqueó l'accesu a determinaos países non allineaos colos Estaos Xuníos d'America nesta noticia. SourceForge ye un sitiu nel que se centraliza'l desarrollu de dellos proyeutos de Software Llibre y que da serviciu a desarrolladores y collaboradores de tol mundu (bueno, meyor dicho, daba). La decisión polo que se puede lleer nun primer momentu vien emburriada pola lexislación de los Estaos Xuníos, sicasí tien fonderu analís y reflexones, y amás en dellos frentes.

Per un llau camiento la necesidá d'una rempuesta contundente de La Comunidá (de Software Llibre). Si bien una filosofía que funde los sos raigaños na rellación del software (y non sólo eso) coles persones en criterios de usu nun contestu de llibertá nun pue pasar por alto un tratu estremáu a nenguna persona na so participación nel procesu de desarrollu de Software Llibre por razones d'ubicación xeográfica. Sobretoo cuando esta discriminación remanez de la posición política d'una potencia económica dominante como son los Estaos Xuníos. Nesi sen vien a cuentu la frase que entitula esta entrada, sacada de la definición de Software Llibre (lo de "Stupid" -babayu- ye añadío mio) de la Free Software Foundation y que vien perfecha nesta situación na que paez que esta filosofía se reduz a l'imaxen.

Per otru llau, vien a representar un problema col que camiento que vamos a topamos bien de veces nel futuru cola venida del Cloud Computing (esto ye l'usu masivu de servicios apurríos por terceros y centralizaos en Internet). Dempués d'un tiempu nel que'l movimientu de Software Llibre trataba d'averar y devolver esti software a les persones, y más concretamente a los desarrolladores y usuarios de los programes "clásicos" nel que tuvo un espoxigue incremental que tovía sigue anguaño; l'usuariu (y en cierta forma que nun voi tocar fondamente agora) vuelve a perder el control sobre los programes (y, peor tovía, sobre los datos) qu'utiliza al quedar estos en manes de terceros propietarios tanto de software como d'infraestructura viéndose'n situaciones como la que narramos agora.
Pero nun falo d'una situación nueva, puede vese d'exemplu'l contenciosu que vien teniendo cuantayá Google col Gobiernu chinu. Escenariu que nun s'estrema muncho d'esti que tamos cuntando agora mesmo. Cola salvedá de que nun falamos del xigante de la Rede nin d'un estáu autoritariu según los cánones occidentales. Agora la guerra ta "en casa" (y a varios niveles).

Anque énte estos problemes, tamién entamamos a tener soluciones. Ensin dir más lloñe: AGPL.

Escrito por Sumiciu el sábadu, 23 xineru de 2010

Gobiernos del Mundu Industrial, vosotros, cansaos xigantes de carne y aceru, vengo del Ciberespaciu, el nuevu llar de la Mente. Nel nome'l futuru, pidovos nel pasáu que mos dexéis en paz. Nun sois bienveníos ente nós. Nun exercéis nenguna soberanía nel sitiu nel que aconceyamos. Nun tenemos escoyíu a dengún gobiernu, nin mos prui tenelu, ello ye que diríxome a vosotros ensin más autoridá que cola que fala siempre la llibertá.
Declaro l'espaciu social global que tamos entamando independiente por natura de les tiraníes que tais buscando imponemos. Nun tenéis nengún derechu moral a gobernamos nin tenéis métodos pa facemos cumplir la vuestra llei que podamos temer verdaderamente.
Los gobiernos deriven los sos xustos poderes del consentimientu de los que son gobernaos. Nun pedísteis nin recibisteis el nuestru. Nun vos invitemos.
Nun mos conocéis, nin conicéis el nuestru mundu. El Ciberespaciu nun ta ente les vuestres llendes. Nun camentéis que sois quien a construílu lo mesmo que un proyeutu públicu de construcción. Nun sois quien. Ye un actu natural que xorrez de les nuestres aiciones coleutives.
Nun vos xuntasteis a la nuestra gran charra coleutiva, nin creasteis la riqueza de los nuestros mercaos. Nun conocéis la nuestra cultura, la nuestra ética, o los códigos non escritos que yá apurren a la nuestra sociedá más orde que'l que pudiera llograse por cualquiera de les vuestres imposiciones.
Afitáis que hai problemes ente nós que tenéis que iguar. Usáis eso como escusa pa invadir los nuestros llímites. Munchos d'esos problemes nun esisten. Onde haya verdaderes amarraces, onde haya errores, identificarémoslos ya iguarémoslos polos nuestros propios medios. Tamos creando'l nuestru Contratu Social. Munchos d'estos problemes nun esisten. Esta autoridá va crease según les condiciones del nuestru mundu, non del vuestru. El nuestru mundu ye estremáu. El Ciberespaciu ta encadarmáu por transacciones, rellaciones y pensamientu en si mesmu, que s'esparde como una fola quieta na telaraña les nuestres comunicaciones. El nuestru mundu ta al mepar en toles partes y en denguna, pero non onde viven los cuerpos.
Tamos entamando un mundu nel que toos puen entrar, ensin privilexos o prexuicios por mode de raza poder económicu, fuercia militar o el llugar de nacimientu. Tamos entamando un mundu onde cualquiera, en cualquier sitiu, puede espresar les sos creencies, ensin importar lo singulares que seyan, ensin mieu a ser coaccionáu al silenciu o al conformismu.
Los vuestros conceutos llegales sobre la propiedá, espresión, identidá, movimientu y contestu nun apliquen a nós. Afítense na materia.
Equí nun hai materia. Les nuestres identidaes nun tienen cuerpu, ello ye que, a diferencia vosotros, nun podemos obtener orde por coacción físico.
Creemos que la nuestra autoridá remanecerá de la moral d'un progresista interés propiu y del bien común. Les nuestres identidaes pueden distribuyise a traviés de munches xurisdicciones. La única llei que toles nuestres cultures reconoceríen sedría la Regla Dorada. Esperamos poder construir les nuestres soluciones particulares sobre esta base. Pero nun podemos aceptar les soluciones que trais tratando d'imponer. Nos Estaos Xuníos güei creasteis una llei, el Acta de Reforma de les Telecomunicaciones, que refuga la vuestra propia Constitución ya insulta los suaños de Jefferson, Washington, Mill, Madison, DeToqueville y Brandeis. Estos suaños tienen que reñacer agora en nós.
Asústenvos los vuestros propios fíos, yá que ellos son nativos nún mundu n'onde vosostros siempre sedréis emigrantes. Como los teméis, mandáis a la vuestra burocracia les responsabilidaes paternes a les que cobardemente nun sois quien a enfrentavos. Nel nuestru mundu, tolos sentimiento y espresiones de la humanidá, de les mas viles a les más anxelicales, son parte d'un tou únicu, la charra global de bits. Nun podemos dixebrar l'aire que asfixa d'aquel sobre'l que baten les esnales.
En China, Alemaña, Francia, Rusia, Singapur, Italia y los Estaos Xuníos, tais intentando refugar el virus de la llibertá llevantando puestos de guardia nes llendes del Ciberespaciu. Puede que impidan el contaxu durante un pequeñu tiempu, pero nun funcionarán nun mundu que pronto tará cubiertu polos medios que tresmiten bits.
Les vuestres industries de la información cada vez más obsoletes perpetuaríense a sí mesmes proponiendo lleis, n'America y en cualquier llau, que reclamen la so posesión de la pallabra per too'l mundu. Estes lleis declararíen que les idegues son otru productu industrial, menos noble que'l fierro ferroñentu. Nel nuestru mundu, seya lo que seya lo que la mente humana pueda crear puede ser repoducío y distribuío infitamente ensin nengún coste. El trasvase global de pensamientu yá nun necesita ser realizáu poles vuestres fábriques. Estes midíes cada vez más hostiles y colonialistes allúguenmos na mesma situación na que tuvieron aquellos amantes de la llibertá y l'autodetermín que tuvieron que lluchar escontra l'autoridá d'un poder alloñáu ya inorante. Faimos falta declarar los nuestros "yos" virtuales inmunes a la vuestra soberaníu, anque sigamos consintiendo el vuestru poder sobre los nuestros cuerpos. Vamos espardemos pol planeta pa que naide pueda encarcelas los nuestros pensamientos.
Crearemos un covilización de la Mente nel Ciberespaciu. Que seya más humana, y hermosa que'l mundu que los vuestros gobiernos crearon enantes.
Davos, Suiza a 8 de febreru de 1996

Versión en castellano
English versión (Orixinal)

Escrito por Sumiciu el xueves, 19 payares de 2009

Según anuncia una entrana nel blog oficial de Google güei mesmo espublizose'l códigu de Chromium OS (que comu'l navegador web, nomarase Chrome na versión propietario de Google que tará basada nel proyeutu abiertu Chromium).

El códigu de fechu yá pue baxase del repositoriu onde ta colgáu el proyeutu.

Tamién tan afayadices una especificaciones técniques que falen en conxuntu de los proyeutos Chromium na estaya Design Documents.

Pa'l que nun sepa que ye Chromium OS (vamos referimos a la versión abierta que pola iniciativa y polo que pue apurrir a la comunidá talántase la más interesante) ye un nuevu sistema operativu construyíu sobre l'idea del cloud computing (la computación na ñube, ello ye, l'usu de servios que esisten realmente na rede) y basáu nel navegador web Chromium que yá innovaba al xestionar les páxines que cargaba tratándoles como verdaderos procesos de aplicaciones web que podíen remanase como talos. Al tar basáu na web y nun navegador web, la principal característica de Chromium ye que les aplicaciones úsense desde Internet (ello ye una ferramienta pa medrar l'usu de preseos en llinea de Google como Gmail, Docs...) .

Pue vese una amuesa d'ello nesti videu oficial:
Ver Comentarios (30) Temes relacionaos: Chrome 

Escrito por Sumiciu el xueves, 22 ochobre de 2009

¿Qué ta pasando en Sietes?


Perguapa campaña que aprovecha'l llanzamientu en Sietes de Windows 7 pa revindicar el software llibre en llingua asturiana. Dos vertientes de la llibertá cultural menazaes pol capitalismu, la globalización y les mentes estreches y que les dos tienen la mesma salvación: l'usu y conocimientu.

Software llibre pa un mundiu llibre.

Escrito por Sumiciu el domingu, 13 setiembre de 2009

El día 11 d'esti mes Apple publicó embaxo la llicencia Apache el códigu de Gran Central Dispatch, ún de los componentes claves del so sistema operativu Mac OS X.

Esti componente encárgase de que seya'l sistema operativu quien xestione los estremaos filos d'execución de les aplicaciones, en vez de facelo elles mesmes. Ello optimiza al másimu l'usu y ocupación eficiente del procesador al empar que facilita a los desarrolladores la xera de construir aplicaciones multifilu, a les que-yos fai falta un control complexu sobre caúna de les víes d'execución que puedan llanzar.

Esta ye una teunoloxía importante nun momentu nel que la capacidá de computación de los PCs nun se mide tanto pola velocidá "punta" que son quien a llograr los sos procesadores sinon pola replicación de componentes (como son estos mesmos procesadores, o los núcleos de los mesmos) que fai necesario que los programes tean fechos pa aprovechar estes característiques d'execución multifilu.

Camiento que esti ye un componente importante que, al ser fechu públicu, puede servir pa integralu n'otres plataformes aprovechando asina esta idega de que seya'l sistema operativu el que garre'l control de los filos d'una aplicación y non dexar "soles" nesa xera a les aplicaciones.

Escrito por Sumiciu el vienres, 11 setiembre de 2009

Tres la compra de SUN Microsystems por Oracle les dubies sobre la direición y el futuru de les estremaes aplicaciones y polítiques llevaes a cabu por SUN entamaron a xorrecer. ¿Cual sedría'l futuru de Java? ¿qué facer con MySQL?¿y Solaris?.

Nel tema de Java paez que Oracle va decir daqué, yá que a estes altures sigue avanzándose col desarrollu de JDK 7 mientres tovía nun se publicó el JSR que col estándar Java 7 que de abellugu a toles especificaciones. Contrariamente a cómo se veníen faciendo les coses nes 6 versiones anteriores, dugamos que esta vez el desarrollu de les ferramientes va per delantre del trabayu de la Java Comunity Proccess encargada de la estandarización del llinguaxe. Esperemos que esto nun se torne no habitual nes versiones postreres y venga dau namás pola coyuntura actual.

Per otru llau, Oracle vien d'asoleyar una nota empobinada a los veceros de SUN Microsystems nel que cuenta dellos de los nuevos planes centraos nes plataformes SPARC y Solaris, según cuenta la nota que trescribo equí:

- Gastar más dinero nel desarrollu de SPARC de lo que venía faciendo SUN
- Gastar más dinero nel desarrollu de Solaris de lo que venía faciendo SUN
- Duplicar la cantidá d'especialistes dedicaos a proveer serviciu y venta de dambes plataformes respecto a lo que venía faciendo SUN
- Incrementando de manera espectacular el desempeñu del hardware de SUN integrando más estrechamente con él el software d'Oracle


L'anuncia fina con una "alvertencia" a IBM señalandolos como'l rival a batir con esta estratexa.
Ver Comentarios (110) Temes relacionaos: Informática 

Ir a página 1 2 3 ... 12 13 14