Creative Commons 3.0 RSS CSS 2.1 XHTML 1.0
Entrar  
Rexistru
El sótanu del paraísu... 
Escrito por Sumiciu el domingu, 31 xineru de 2010

Yeren regueros d'agua
los que s'arrastraben pel asfaltu escarnáu.
Gotes solitaries baxaben pela ventana
fecha lluna nel so reflexu.
Yeren pallabres muertes
de lo que remanecía'l camín,
les güelgues n'onde xorrecíen los escayos.
Pa nun volver sobre ellos
desaniciaba'l retrovisor
fitando la mirada na prósima estación.

--

Eran regueros de agua
los que se arrastraban por el asfalto descarnado.
Gotas solitarias bajaban por la ventana
hecha luna en su reflejo.
Eran palabras muertas
los que producía el camino,
las huellas en las que crecían las espinas.
Para no volver sobre ellas
hacía desaparecer el retrovisor
fijando la mirada en la próxima estación.

Escrito por Sumiciu el xueves, 21 xineru de 2010

Lluís y Nel miraben como veceros pasmaos l'escaparate'l kiosku nel que s'asoleyaben dellos diarios y revistes. Les sobremeses de los llunes yeren eternes y pegañoses, faciendo d'esi momentu l'instante precisu pa que la rayada de davezu llantara na cabeza d'ún. La revisión diaria de prensa y noticies yera una actividá qu'ayudaba a consumir dello tiempu al empar qu'afalagaba'l día acurtiando la tarde, una tarde erma de xeres y d'emociones.

Los llunes yeren especiales nesi sen, non sólo podíen restolar ente los titulares avezaos sinon que tamién teníen la compañía (que apaecía más de ralo en ralo) d'una buena riestra revistes especializaes. Asina, mientres-yos recordaben lo muncho que cobraben, lo caro que yera la vida si te tocó ñacer nel infiernu o el caberu intentu de fichaxe frustráu del Sporting; tamién podíen sentise parte d'un mundu en movimientu en mil dimensiones y multiversos ente anuncies de nueves utopíes científiques y maxa teunolóxico.

- ¿Visti lo que fixeron estos?
- Sí, ta curioso, quién mos lo diba decir va unos años.
- Yá...ye p'ablucar. Quien pudiera ser tan finu como ellos y poder escapar d'una vegada d'esta esfueya, llástima que seyan cuatro contaos.
- ¿Paezte?
- Si ho, ¿o conoces tú a daquién que sepa tantu como esta xente?
- Bue...pámique a dalgún nun dexaremos de conocer, el mundu nun ye tan grande tampoco. Lo mesmo que concentra les desgracies tampoco pue esparder abondo l'intelixencia. Alcuerdome d'una concretamente que taba p'enriba toos ellos.
- ¿De xuru? ¿yera quien a pensar como piensen estos? ¿a camentar esos enguedeyos de los que escriben con toes eses pallabres tan rares? ¿a inventar coses nes que naide reparare enantes?
- Nun sé como son esos que dices realmente, pero esta sabía muncho, dígotelo yo. Yera intelixente como ella sola, sabía lo uno, lo otro y lo de acullá. Ye más, sabía tanto que yera quien a dase cuenta de cuando taba enquivocá pa rectificase darréu.
- Sí que sabía entós...
- Dígotelo yo, que too ta estrao de xente como estos de les revistes, pues topalos en toles esquines. Xente que sepa muncho sobra, xente consciente lo que desconoz (incluso naquello no que siempre-y paeció saber) poco vas topar. Ye lo que tien la intelixencia, que pierde mas persones nos cielos que la que alcuentra na tierra...
- Yá te digo nin, muncho bilordiu y poca idega...como nós mesmos....
- Ye lo que hai...

Escrito por Sumiciu el vienres, 15 xineru de 2010

Anguaño, fai diez años que vivimos nel futuru imaxináu por tou un mileniu. Güei, sigo intentando esconsonar del mio propiu suañu.

Miro pela ventana y, ente'l xelu y al ñeve que fai cola pa recibimos nes aceres, que mos amarra'n casa apurriéndomos una segunda oportunidá nun topo naves espaciales, nin monolitos, ni nengún reflexu del futuru nel que se supón qu'entremos cuantayá. Arranco, nin curtiu nin colmáu, la cabera fueya nel calendariu namás pa dame'l presto de velu ensin elles como si fuera un árbol cualquiera nesti iviernu que atormenta. Pongo'l nuevu darréu mientres lu emplego como máquina del tiempu pa desplazame polos meses y les selmanes que se punxeron de colchón pa evitamos la caída'n secu. Nesi instante, la llerza (tan zorra ella como tien avezao) gárrame pela espalda y apodérame nunos segundos eternos. Lo mesmo que cuando ún s'arima a un escayu más de lo que debiera.

La ñeve, el xelu y l'ivernada concásense pa enfrentase a esa reciella de propósitos que asalten a ún cuando los caprichos matemáticos colos que remanamos el tiempu resuelven a presentase dalgunes veces. El propósitu ardiendo val pa calecer nun entamu xeláu y pa aselar una mente que sábelos fugaces, que conoz que cada día que se alloña del entamu difumínense más y más na conciencia y nel tiempu.

Y en mediu d'esi vaciu pallabres. Col espectáculu del enfrentamientu personal escontra elles.

De sópitu, una atención fugaz mos recuerda que güei, nel futuru nada ye estremao. Apretes los puños mientres acolumbres na pantalla una visión llaceriosa de polvu y ruines, mieu y enerxía pa afrontalo nes cares afectaes. Llárimes caribeñes contemplaes con tristeza dende foses atlántiques. Mala suerte dirán dalgunos, quiciás simplemente'l pasau mos visite dacuando en forma de presente pa recordamos que él tamién vive nel futuru. Y que nun ye cuestión de escaecer y llorar, sinon de facer por correxir los bandazos que mos dexa mientres, cuando mos sentimos solos, busquemos el filu conductor que mos une na alcordanza.

Que la memoria nun valga namás pa recordar. Que la celda nun valga pa más que pa apreciar la llibertá. Que lo que hai neses foses seya realmente semiente que xorreza y non güesos enterraos. Que'l Caribe despierte d'una vez d'esti mal suañu y el restu del nuesu cinismu y topemos la rempuesta a tantos por qués na nuesa mesma imaxe nel espeyu.