Creative Commons 3.0 RSS CSS 2.1 XHTML 1.0
Entrar  
Rexistru
El sótanu del paraísu... 
Escrito por Sumiciu el miércoles, 9 marzu de 2011

Nun soi quien a soportar la culpa al pensar que'l mio camín entamó onde acabó'l tuyu. Ye mui pesada la carga de que ensin too aquello bien de veces nun podría garrar impulsu.

Nunca supe bien per onde empecipiar a contar la mio hestoria, y la verdá ye que tovía güei nun acabo d'entender que daquién-y importe, pero si tien qu'entamar por dalgún llau esa hestoria que m'atribuín ye por tí.

Agora desplica-y al razonamientu esi ñudu qu'apaez nel estómagu al reconstruir esi camín que va de la to hestoria a la mía. Como la to muerte tornó na mio vida y como'l to país se fexo la mio casa, la casa gris que siempre busqué alló la mar y la señardá d'esti pais estranxeru. Al empar, culpo a la mio vida por carroñera: prestaríame que vivieras pa compartila, pero taríemos bien lloñe si tuvieras. Una carroñera atemporal, porque ye curioso como dos trazos espardíos pel tiempu son quien a topase nun momentu íntimu pa contruyir una hestoria universal capaz de xuntar les dos orielles d'esti océanu tan fríu.

Darréu, ponte a argumentar que les mios pallabres vienen de xuntar los significaos d'una llingua imposible de lleer o falar y cola que nun comparto otra cosa que nun seya l'entendimientu. Palabres ayenes que dan son a la mio infancia, añaes en voces foriates qu'esnalen pola mio alcordanza moza. Ello ye, esi recuerdu que nunca tuvi pero que me prui guardar y compartir pa siempre.

El ser tú y el ser yo dio un "somos", esi calecer solidariu del "nós", esi compartir camín, esi relevu, esa omnipresencia...en total esa resistencia dafechu na que mos apañó el restu de xente que diba debuxando'l camín.

Que'l fueu que tu prendisti allume esa escura soledá qu'anguaño mos ataca, hai camín y siempre ye p'alantre. Nun fai falta decilo, el nuestru día llegará, el día que la sorrisa los nuestro fíos seya esa vengana que tanto naguamos. Eso sí, nun dexes de cuntame estes hestories, necesito seguir sintiendome insignificante y arrodíau de la fuerza d'eses fazañes.