Creative Commons 3.0 RSS CSS 2.1 XHTML 1.0
Entrar  
Rexistru
El sótanu del paraísu... 
Escrito por Sumiciu el miércoles, 23 febreru de 2011

¿Nun ye simpático? el paraísu al que aspiramos ta ambientáu nes ruines onde dacuando ardió un infiernu. Una postal post-industrial d'ánxeles punk y versos rampuñaos a los poetes. El mesmu suañu d'el que llevamos tiempu intentando esconsoñar ye el que al empar mos atrulla y mos atrae.

Pero nun ye culpa nuestra, naide pidio medrar ente esta distorsión estético; namás tábemos ehí cuando prendíemos el primer fogonazu ente parés pintaes de lladriellos roxos que fueron destiñendo a la calor de la fumarea que mos contaminó un día los corazones. Nós nun fuimos los que pintemos esa chimenea como fondu d'aquel besu nin los que entamábamos aquelles amarraces que mos facíen ablucar y abellugamos nos brazos que siempre quiximos desaniciar.

Lo mesmo qu'esti tastu. Esi regustu a polvu de piedra y povisa de tiempos meyores. O eses pallabres que quedaran enterraes tan fondes como'l nuestru cuerpu algame de baxo.

Pero nun voi dexar que m'escaeza esi respigu qu'esgatuña lo mesmo qu'un acorde de rock and roll. Igual de afiláu. Igual de contundente. Igual d'afayadizu. Al ritmu imparable que mos deprendió la tierra roto.

Soi la esllava depués d'esti banquete narcóticu al que mos sometieron. La calma tres la tormenta. L'eternu naguar. Namás soi un dibuxu sobre l'asfaltu que cobra xacíu en cualquier caleya. L'aire que bailla la herba, el vientu que xiringa la cebá.

Soi fame. Soi sede.
Soi semiente. Soi la tierra.