Creative Commons 3.0 RSS CSS 2.1 XHTML 1.0
Entrar  
Rexistru
El sótanu del paraísu... 
Escrito por Sumiciu el llunes, 6 avientu de 2010

Nestos caberos díes solmenaron el mundu a nivel informativu unes filtraciones de Wikileaks tocante a unos cables (por si a dalgún-y suena raro, vien de cablegrama, que ye un telegrama unviáu por cables somarinos) rellacionaos coles informaciones de los axentes de política esterior americano (espardíos por dellos medios, ente ellos El País o The Guardian).

La primer reacción nos medios y na xente foi de sorpresa finxida, realmente nun creo que-y esmoleza a naide a estes altures el cinismu que s'emplega en política, sobremanera cuando falamos de les rellaciones ente estaos. Anque munchos personalicen esta manera de facer nos Estaos Xuníos, nun creo que seyan nada especial nesti aspectu; sacante la cuestión de que, al ser la potencia dominante anguaño, tien les rellaciones más estenses y toca los filos más "sensibles". La rempuesta de los estaos ta viniendo cercu a cercu y garrando como rehén dellos derechos alquiríos nos caberos tiempos y potenciaos poles caberes tecnoloxíes.

Estes "filtraciones" suponen práuticamente l'estrenu énte'l gran públicu de la guerra d'información que ta entamando n'Internet. Nun son les primeres (yá esistíen enantes de Wikileaks) nin tampoco ye'l primer destape protagonizáu por esti mediu. Y ye que nun tenemos qu'olvidar que p'enriba too ye eso, un mediu. Cai redundante entós recalcar el peligru que supón que'l mediu seya la noticia, pero nun voi dexar de señalalo de toles formes. Equí Wikileaks funciona como mediu y símbolu al empar; y dalgún tien apuntao la posibilidá de que realmente seya tamién un fin, el tiempu lo dirá.

El símbolu ta personalizáu amás na figura de Julian Assange, oxetivu agora de munchos estaos, héroe pa otros.. quiciás simplemente ye un buen xestor de la información que sabe bién como algamar los datos, espardelos y cómo utilizalos pa la so defensa. Nun hai qu'escaecer tampoco que dellos collaboradores de Wikileaks tienen abandonáu el proyeutu por diferencies personales con Assange. Y ye que una dulda razonable agora mesmo ye'l fondu d'interés que pueda tener nomada organización y la persona que la llidera tres la movilización de datos que vien faciendo. O dicho d'otra forma ¿cuales son les verdaderes intenciones de Wikileaks? Tentar albidralo ye más un exerciciu de imaxinación que razón, pero precisamente una de les principales coses que mos ta enseñando Wikileaks a traviés les sos filtraciones ye a mantener viva siempre una dulda razonable sobre quien tien el poder. Wikileaks entendiolo bien, el poder vien pola información y al poder combatese-y cola información; pero al empar agora ellos mesmos formen parte d'esi poder (si bien d'una forma alternativo-paralela) y la información. Asina ye que, o bien mos enfotamos n'idees mesiániques o aplicamos a Wikileaks la mesma dulda razonable que los llevo a ellos a topar y asoleyar les certeces. Esi ye l'espiritu de la verdá, la dulda que mos lleva a naguar polos fechos (por exemplu ¿quien decide lo que tenemos que saber?, según el País "Únicamente serán publicados aquellos papeles que consideremos que no representan una amenaza para la seguridad de personas o de países." o por qué Ex colaboradores de Assange crearán un nuevo portal como Wikileaks).

Tamién ta viéndose nel desarrollu'l procesu d'escorribanda virtual (y físico simultaneamente) les llendes del so modelu d'espardimientu. La necesidá de crear una marca y un símbolu y de personalizalo nuna persona fízolos al empar un oxetivu tecnolóxicu bastante feble. Nuna sociedá dixital na que ta imponiéndose como tecnoloxía contracultural la de tresmisión ente iguales (esto ye P2P, o peer to peer), el modelu centralizáu ye como una diana en medio d'un campu de tiru. Ello ye que nel procesu d'ataques y contraataques, la tendencia ye siempre la de escoyer un modelu distribuyíu nel que esistan más participantes y difuminen el niciu de l'infomación al estremu de que nun seya trazable na práutica. Si bien el modelu de tener una referencia a quien apurrir les filtraciones puede contribuir a que estes se fagan, esa mesma fonte y referencia único ye un blancu mui fácil de callar.

Y pinta que la guerra dixital va engarriase más tovía. Si yá vienen faciéndose movimientos per partes los estaos empobinaos al control de les comunicaciones bien en forma d'escusa pola seguridá nacional o como beneficiu collateral de collaborar con intermediarios caducos que ven como'l so negociu dexa de tener sentíu nun mundu onde los conteníos nun son compatibles con una situación xeográfico. Equí Wikileaks nun ye otra cosa que un axente más, colos sos intereses que esperemos que tean siempre colos que combaten los poderes actuales y colos que tan cola llibertá; pero ¿quien sabe que rumbu garrarán a cortu o mediu plazu? Hai almitir que como detonante ta siendo amañosu, pero la única manera de escapar del dirixismu ye nun cayer n'otru; esa ye la másima que tenemos que tener delantre. Ello ye que esti lentu gotiar que calistra peles grietes del sistema mos valga de sustentu pa'l nuestru caminar y nun mos arrastre como si fuera una riada.

Bienveníos los que vienen a caminar xunto a nós.