Creative Commons 3.0 RSS CSS 2.1 XHTML 1.0
Entrar  
Rexistru
El sótanu del paraísu... 
Escrito por Sumiciu el xueves, 18 ochobre de 2012

Somos los que nun tienen hestoria. El subproductu d'una xeneración que nun conoció problemes nin guerres cercanes, namás les que veíen na televisión o lleíen nos llibros con palabres cada vez más cuntaes. Los que l'uniciu conflictu que conocieron yera internu: la inercia del ímpetu afaláu del consumu, l'espoxigue d'un individualismu que namás entamaba a conocese a sí mesmu, l'ausencia de problemes qu'emburriaba a esmolecese nos problemes artificiales inventaos de les coses más pequeñes. Un rebañu que namás salía al contautu col esterior pa cubrir les necesidaes más primaries, que non más urxentes; porque yera una xeneración que namás conoció'l conceutu d'urxente a traviés de la simple asociación d'idees.

Xente inocente de toles formes. Quiciás l'únicu delitu consistió en nun talantar qu'había vida acullá la vida, cosa normal cuando concentres los tos sentíos nes percepciones más inminentes namás porque-yos avaga. Yera xente sicasí, que tovía yera quien a mirar p'alantre y pa quienes los llímites taben puestos pa ser superaos, lo mesmo que ficieron los que los precedieron.

Y nós, esi subproductu que s'estrella agora cola vida aventáu por minutos de mareos y sensaciones y rellaciones intenses heriedó d'ellos esa miopía. De la que mos imponen los llímites qu'otros nun tuvieron, caminamos; lo mesmo que guaḥes, ensin gafes afayadices bregamos p'atopar un sitiu dende'l que subise y acolumbrar la llínia del horizonte que separta esti mundu del futuru que conocíemos y mos tienen deprendío. Nesti camín, enriedámonos con palabres que, pretendiento explorar los cinco sentíos más ún nun arrebañen cuatro conceptos siquiera. Tantu tiempu enfocaos en nós y la rellación con nós y les nuestres mesmedaes que namás se mos ocurre describir el paisaxe esterior con garabatos inútiles de realismu simuláu. Metáfores bien sonores pero poco producentes. Dacuando, como esta, inclusive autoconscientes. Marabayos de pensamientu qu'intenten simular una reflexón pero que dexa a ún tal y como taba cuando llegó.

Igual ye la forma d'enfrentar los problemes del mundu. Enantes de dar cada pasu afogámonos nel camientu, reducimos el mundu a la nuestra persona y reducimos el mal del mundu a la llerza consustancial al momentu qu'acompaña. Namás yo, yo y lo difícil que ye esti pasu; yo y lo que toi xugándome. Lo mesmo que si un peón perdiere'l tiempu de la partía creyendo que'l tableru ye namás la casiella que tien enfrenteensin pensar que puede comer al alfil o la torre que lu acecha dende la diagonal. El pesu de la responsabilidá, el pesu del cortoplacismu militante nun mundu per otra parte intemporal.

Asina, concentráu nesti malditu últimu pasu, pierdes la noción del tiempu. Asina, concentráu nesti prósimu metru, pierdes la noción del espaciu. Asina, concentráu nel pesu que lleves al llombu, pierdes la noción de la gravedá. Ello ye: tarde, lloñe, ingrávidu.

Enantes taba too más fácil porque yera más difícil.