Si nun tuvieres nel llugar equivocáu,
si nun vivieres nel momentu equivocáu,
si nun te sintieras afectáu pola situación,
si lo dexares pasar,
si nun lo sientieras como una necesidá,
si nun te diera que pensar,
si nun sacares eses conclusiones,
si mirares pa otru llau
si nun fueres coherente con elles,
si nun te metieras nesta engarradiella,
si nun lo llevares hasta les últimes consecuencies,
si al final te valiera pa dalgo.

Si cumplieres, si te quedares nes llendes; nada d'esto taría pasandote. Sabes que la culpa ye tuya y que pudiste evitalo bien de veces. Si nun fuere asina, esto sería caos dafechu. Ello ye que nun te quexes agora, nun reclames, siempre supusite lo que teníes que facer pa nun llegar a estos estremos.

P2P, peer to peer o pa que mos entendamos "de igual a igual". Términu perconocíu por toos: pirates, artistes, empresarios y xente de buena reputación y amantes de les modes.

Defendíu por aquellos que aprovechen les nueves oportunidaes que-yos apurre: comunicase ensin intermediarios, ensin control, ensin más oferta que la so demanda. Tan amañosu, priváu ya incontrolable: ye bien fácil controlar lo que tien un sólu cauce, pero imposible aquello que s'entama xuntando célules pequeñes pa dar nun texíu mayor que puede funcionar dafechu namás con una parte de los sos miembros...ensin centru, ensin control.

Escorriu por aquellos que nagüen pol control y la autoridá. Paradigma virtual del gran hermanu: monitorización, xestión, esbilla de tráficu...poder sobre los servicios y direccionamientu del consumu. Too nes redes, pero ensin les redes; too polos internautes, pero con oveyines.

Y los primeros, salen ¿a la cai?. Pero nun sal naide. ¿Quien convoca? ¿quien manda? ¿ye que nun deprendimos nada? "De igual a igual", tanto pa les máquines como pa les persones quier decir coordinación, non dirixismu. De igual a igual ye a decisión de toos, nun fai falta más anonimatu. De igual a igual yes tú, soi yo y les mios acciones coles tuyes.

De igual a igual ¿ye que nun deprendimos na d'esa topoloxía que tantu defendemos? y ellos mirando...de les grandes tecnoloxíes de montaxe'n cadena deprendimos como esclavizar persones alienándoles nuna ocupación tola so vida. ¿Nun mos podría enseñar daqué esta tecnoloxía que tantu decimos defender? Quiciás al final ye que nun inventemos realmente nada, namás lleguemos a la consciencia del so valir a traviés de necesidaes superficiales que dacuando son quien a calar no más fondo.

Nun da igual. Namás, de igual a igual.

Lo más importante pa una idea, ye'l fechu mesmu de ser. Pero esta natura vese violada cuando entra n'amarraza, l'engarradiella d'idees... Una idea nun gana o pierde, ye o nun ye. Y cuando desapaez l'ultimu portador, ye cuando realmente ta derrotada...o lo que ye lo mesmo: muerta. Namás hai idees vives ya idees muertes, a les segundes llamamosles recuerdos y son parte l'alcordanza; les primeres son partes del futuru y conocémoles como oportunidaes. Tamién hai zombies nestin mundu, pero nun pertenecen a él, namás son pantasmes que ocupen el vacíu, un pasatiempu murniu como otru cualquiera.

¿Y el presente? el presente ye l'engarradiella de les idees, el cristal mancháu dende'l que acolumbramos l'alcordanza y el futuru. Y nel presente hai últimos guerreros enforma, ellos son el reflexu d'una idea invicta. Pero cuidao...qu'una idea nun tien preciu, anque sí un coste. Y los probes que nun pueden pagalu tienen que conformase coles zombies. Probes, probinos...