Toi acabante de lleer esti artículu (en castellán) que me llamo muncho l'atención. Anque nun pudi lleer l'articulu orixinal de Nature, y probablemente nun seya'l únicu resultáu tocante a esti tema. Sicasí paezme bien representativu de la dirección na que apunta'l nuevu conocimientu que tamos garrando en campos como la neurociencia que tien implicaciones fonderes en cuestiones morales y filosófiques. Ello ye que nel artículu afírmase que:

Investigadores del Institutu de Tecnoloxía de California (Estaos Xuníos) y del Trinity College de Dublín (Irlanda) toparon la primer prueba fisiolóxica de que'l celebru respuende énte la desigualdá como un auténticu Robin Hood.

Los resultaos de la investigación, publicaos na revista Nature, asoleyen que los centros venceyaos a la recompensa nel cerlebru humanu respuenden con más fuerza cuando una persona "probe" recibe una recompensa económica que cuando lo fai una persona "rico". Incluso si'l celebru que s'observa ye'l de la persona "rica".

Esto nun creo que seya interpretable nel totalitarismu de si'l ser humanu ye buenu o malu por natura, realmente nun me parez cosa d'otru mundu pensar qu'un animal tan social como ye'l ser humanu tenga desarrollao capacidaes pa empatizar con otros "collacios" de forma tala que "condergue" les desigualdaes daes nun grupu cola fin de da-y fuerza al bientar coleutivu que-y apurra'l meyor abellugu a él mesmu dientro d'esi grupu. Ye una posibilidá, ye almito que ye una posibilidá tan guapa que curre ún el peligru de dexase arrastrar per ella...esperemos que nun seya asina.

Dalgún directivu d'opinión (nun sé si decir que de dalgún mediu de mases o de dalgún gobiernu porque tovía nun fui quien a marcar la llínia...) garró la palanca y tiró a andar la maquinaria masiva d'etiquetaxe, darréu llegó una productora y dixo "fágase la lluz". Dios (l'interín o el que ocupe'l so puestu en funciones) mos garre confesaos.

Too foi uno y entós la vergoña coló lo mesmo que les agues del Mar Negru Moisés mediante y féxose l'etiqueta: "xeneración nin-nin" (nin estudien nin trabayen, anque na tradución asturiana se-y dea amás una connotación infantil pol doble significáu de "nin" nel contestu). Xusto cuando creyíemos que pa detrás de la X y la Y debiera aportar la Z, pero vese que ya tenemos sacáu tol xugu posible al abecedariu. Y como nesti mundu nada ye daqué hasta que nun s'asoleya'n pantalla, féxose surdir un reality-show o reality coach, como-y dieron a poner los espertos en metaetiquetaxe y espionaxe televisivu. Nesti casu, nun se dexen a los especímenes humanos interactuar llibremente ente sí sinon que se-yos pon a una persona que dirixa les situaciones y seya quien a conducilos per la sienda correcha. Y cargámonos tola bandada páxaros d'ún tiru.

Yá pasó la dómina na que "la culpable yera la sociedá", na que l'analís la situación coleutiva de tolos individuos que componíen un grupu yera l'elementu principal y, n'estensión, les soluciones a aplicase pa iguar los pilancos que se toparen nesi grupu pidíen soluciones que corrixeren sistemáticamente el funcionamientu d'esi coleutivu. O como lo dirién naquella, pa iguar problemes sociales la solución sedría apurrir soluciones de cambiu social...pero vaya, en buen bardial mos metimos... Colo fácil que ye garrar y aislar a les persones, ampliar al común denominador el casu especial y, sinon, exorcizar la sicoloxía l'individuu faciendo de catalizador del desvertebramientu social.

En resume, la problemática de les Xeneraciones X ya Y afitábase'n que por dellos motivos concretos que se daben nel escenariu social nel que venía a incorporase a la vida adulta dello xente, estos carecíen de dellos problemes específicos que-yos apurría al empar etiqueta y la diferencia tocante a les xeneraciones anteriores. Agora'l problema quier presentase como individual y manifiéstase de delles formes. Per un llau asúmese que ye una problemática l'individuu al pretender correxilo de forma individual con un "tutor", per otru la propia apaición de términu que lleva implícitamente una carga de culpa sobre'l suxetu (que nun digo yo que toos seyamos completamente inocentes y na mesma midía, pero creo que hai ciertes culpes que -al menos como coleutivu- mos vienen impuestes).

Pero claro, ¿como se defende eso énte les cámares? Dexando la probable teatralización d'estes escenes aparte, gárrense unos exemplos de persones a les que "supuestamente" nun-yos importa otra cosa que nun seya'l salir y a poder ser drogase (la representación nun puede ser la mesma ensin elementos illegales que concurran en condena moral y lexislativa nel actu). Lo primero que-y vien a la cabeza a ún nun ye un secretu ¿realmente esta xente ye representativo d'esti espaciu xeneracional?. Por llástima o aciertu, la misión d'esti testu nun ye la d'apurrir rempuestes; inda asina, nun se camienta mui dificil mirar alredor y comprobar esti fechu colos güeyos, la máquina más afayadiza pa contrastar esa máquina d'invertar realidaes y etiquetar que engrana énte nós.