Somos una xeneración qu'ensin tener pasao una guerra mundial o una guerra civil yá tenemos sobrevivío dellos finales del mundu. El primeru nel 2000 cuando nos anunciaben l'apocalipsis de les máquines por un error de precisión d'unos pocos díxitos y l'últimu'n 2012 cuando daquién por dalgún motivu dio voz a dellos analfabetos pa que descontextualizar culturalmente llectures d'escritos de fai 2000 años. Valga esti párrafu como intentu d'asemeyar el nuestru tiempu, dominaos mentalmente (nun creo a nengún d'estos eventos se-yos dea la importancia nun futuru de figurar en nengún testu d'historia na vida real) pola tecnoloxía que nós mesmos inventemos y pol desconciertu que produz la nuestra incapacidá d'intentar comprender daqué que salga fuera de la cultura actual occidental ensin occidentalizalo.

A pesar de too ello, equí tamos; supervivientes. Esti títulu, que nun representa nada pero viende -que al final ye lo que tien valor na nuestra sociedá-, nun nos lu quita naide yá.

Como tantu fin del mundu ficticiu cansa a cualquiera y dientro la nuestra proactividá por crear nueves situaciones (Debord me perdone) entamamos pola nuestra un tercer final del mundu, paez qu'al final somos nós los que renegamos de seguir cola vida. Un fin del mundu que si bien nun ye tan apocalípticu como los avezaos nes escritures sagraes, tenémoslu bien profetizáu cuantayá n'otres obres más paganes. Llamémoles distópiques o apócrifes.

Tamos viviendo'l fin del tiempu de toles polítiques reformistes. La frayadura de la tendencia a l'alta de la estafa piramidal que supón el capitalismu (dexémonos de cinismu anque sía per una hora y miremos al hemisferiu sur enantes de respuender a esto, por favor) dexa pocu marxen pa resistir y seguir contentándonos a una buena parte. Llambemos na boca les postreres gotes del estáu del bientar esprimíu hasta les últimes consecuencies pola socialdemocracia, una socialdemocracia que quedó ensin espaciu dientro del mundu lliberal pa seguir presentándose como'l poli buenu. El camín de l'austeridá, como únicu escape del capitalismu, namás almite la llinia recta: "nun podemos facer otra cosa"; polo que d'un manotazu y de secute toles aproximaciones amables dientro del espectru lliberal unifíquense nuna mesma doctrina clásica con un únicu argumentu: sálvese quien pueda y coles manes lo más enllenes que sía quien.

Esti fue'l fin d'un mundu, pero esta vez de verdá. Ye'l fin del mundu de la pasividá recompensada, del mundu qu'ameyora col simple pasu del tiempu, d'un mundu que quixieron trayemos los güelos de la hestoria como telón de fondu del sufrimientu. Pero l'avance de la historia ye imparable y toa avaricia tien un preciu y un cumal cimeru. Cumal qu'empecipiamos a acolumbrar pasu ente pasu. Güei la pasividá arroxa per una tobogán nel que, según caes, más te taraza y menos fuerza dexa pa parar la caída.



Agora, vistíos col traxe de supervivientes y con un enfotu empobináu a los mínimos como aquel que refuga les sos propies necesidaes, salimos a les cais ensin tener desagospiao'l mieu de los nuestros cuerpos y mentes. Caleyamos como zombies que caminen xunto a compañeros a los que se-yos ve la cara porque va enmazcarada d'un etéreu anónimu. Y tovía sobrevivimos p'acolumbrar un 2013 que mete más mieu tovía; vamos camudar d'esta la sangre por llercia.

Digo yo que val yá de ser supervivientes y garrase a uno mínimos que mengüen al cocer, valió yá de profecíes que namás anuncien el final d'un mundu que nun nos dexen nin vivir en paz, o la recuperación económica que nunca llega. La nuestra vida, como'l fin del mundu, ye una cuestión sistémica. El mundu yá acabo fai tiempu, y nós despistaos en ver cuanto-y queda, probinos.

Yá pasemos munchos finales, cubrimos un cupu, va siendo hora de que pensemos n'entamar daqué. Anque sía por hixene mental (individual y coleutiva).