Esta ye l’habitación,
pantalla de los mios suaños.
Cambiante y enigmática.
Azul y gris

Dacuando hacia la oriella,
rellumos de blancor.
Fuxen fueyes d’esti iviernu
Azul y gris

Esbariadiza y turbia
y clavada al abismu
como un puñal d’angustia,
como un puñal.
Mui lloñe,
na llende del cielu cola mar,
el temblor d’unes ñubes
y una fuga de páxaros.

Marta Mori

Y pa celebralo....

Xaréu nes aules, prietes les files del cuerpu docente. Entamen la lleición.

Rector. Noviciu dirixente de promesa fácil escondíu detrás de parapetu poltronil. Simulacru xeniu cola llámpara que concede deseos gozosos, por pedir, que nun quede naide. Agora, mete les manes en toles agües nes que nun piden moyase.

Democracia. Midida apautada que aparta a golpe de mayoría gobernante. Causa más enritante de lloru y de llamada socorru cuando cimbla la vara autoritaria, dizse d'aquello no que abonda hipocresía namás cuando lo faen otros. Secuestru de la llibertá por parte d'aquel que monopoliza la pallabra.

Decisión académica. Nomatu que recibe el velu tres del que s'inxere por razones polítiques nel derechu educativu, escusa de sin razones. Suel tener sombra de rosa espinada o xugu flecheru.

Violencia. Dizse del mieu na clas dirixente, terremotu qu'asalta el status quo.

Llingua. Moneda de cambiu electoral. Si te vi nun m'alcuerdo.

Vergoña. Sentimientu compartíu por minoríes eternes, escluyíos de toa participación democrática en decisión académica. Corpues de xente que s'arrastra a les aules día tres día mientres contempla la subasta público del so futuru, el despreciu pola cultura y pola educación.

Universidá. Platu de mal tastu que suel presentase fríu o a la boloñesa. Caberu abellugu de linaxes pseudopedagoxicos agarraos a la sucesión d'idegues al calor de grupos oligarques.


Y podría seguir, pero la verdá ye que nunca me prestó da-y lleiciones a naide. El casu ye que a base de sangre yá tenemos deprendía la lleición. Yá sabemos que l'universidá nun ye el ñeru cultural col que suañábemos mientres pasábemos les fueyes de la PAU, yá sabemos que l'esfuerzu mereció la pena namás a medies: na midida na que deprendimos que somos quien a nun fundimos nun mar xeláu ya ermu. Una más pal llombu.

Sigo lleyendo con cara d'asombru la propuesta aprobada. N'otru ratu que tenga llibre siguiré a la gueta de dalguna manifestación científica mientres m'entrugo que, cuando naide mira ¿baxo que razones instaurarán los créditos? En vez de planes d'estudio, bien podíen regalar programes políticos.

Darréu mientres los profesores asoleyen mutuu sofitu baxo escudu democráticu de decisiones politiques que afecten a la vida academica el restu sabemos que nun hai más sofitu que'l que mos prestemos ente nós. Naide firmo nada en defensa de los estudiantes cuando tuvieron en situación asemeyada.

Sí señores, yá sabemos lo que la universidá y la democracia. Venimos sufriéndo dambes de fai tiempu. Fai tiempu que deprendiemos la lleición.

Hai una puerte escondía al doblar l'esquina d'una caleya que namás yo conozco, alló onde l'adoquín se funde col ruxir de les foles y un sabor narcóticu. Ye un marcu de fumo ente lluces que se crucen nel biés d'un cristal semiapagáu qu'escuende un mundu que siempre me costo comprender. Más tovía, cuéstame estremalu del otru físicu de necesidá y de conceutos concretos y afilaos, de navayes voladores que raspien la piel y báñenla de sangre. Con esi mancar inocuu que cicatriza mal y llueu.

En pasando la puerte, la sensación ye lo más paecío a la gravedá cero, un conxuntu movimientos torpes que nun lleven pa dengún llau pero carente peligru en mediu'l flotar. Ye l'escenariu perfeutu onde un pue amosar la so incapacidá, l'impotencia d'ún que se ve restorcer como una culiebra engardiandose con sigo mesma enriba un suelu que nun esiste.

De sópitu, notes que les palabres cambien de sentíu y de función...amaguen, engañen, tracamúndiense a sí mesmes. Fainse irreconocibles pa cualquier oreya y garren un tonu grave que revienta el pechu cuando sonen. Tomen forma empatía y coreografía non verbal, dacuando allúguense nun círculu de fuegu, dacuando enriba una ñube, dacuando....tolo contrario.

Son pallabres carentes significáu, trazos que fuxen de significaos inútiles y que escueyen un camín de comunicación direuta. Causen reacción, tresmiten sentimientu refugando les vueltes absurdes de l'esplicación, acción direuta sonora non verbalizada. Disparadores de rempuesta impulsiva ensin razón aparente...el fondu a través de la forma, la ferramienta tornada fin y parte.

Pólvora moyada hasta que se deprenden a texer. Foguéu fuera'l so universu.

Y nel momentu menos oportuno, tópeste en medio, sintiendo en cada mano l'alendar de cada mundu y la barrera de fumo densu que lo separta furándote con un sentimientu incandescente. Y, dún llau, les voces cortantes lláncense al vacíu, garren carrera escontra l'infinitu pasando despercibíes dafechu. Del otru enfrentense al golpes de ciegu con cada partícula d'aire esmuciéndose nel intentu.

Yo, como un llocu, buscando un monolitu cerca que me respuenda. O dalguna señal alieníxena que m'ayude a asitiar cada cosa onde-y correspón.

Titular del ente (non porque seya daque raro, sinon porque aisna se fai nomar) públicu de telecomunicaciones d'esta, la nuesa comunidá:

Los asturianos respaldan de forma masiva la existencia y la programación de TPA
Al 71% de los asturianos que ven la TPA les gusta bastante o mucho la programación de la cadena, que tiene un "nivel de audiencia de la televisión pública autonómica francamente satisfactorio". Son dos de las principales conclusiones de la encuesta sobre la Televisión Pública del Principado de Asturias que ha realizado la Unión de Consumidores de Asturias (UCE).

Lo chocante nesta noticia ye...¿el 29% de los telespectadores son masoquistas o simplemente usen la televisión como música d'ambiente?
Claro que la noticia pue redactase d'otra forma, suxeta a menos interpretaciones pretencioses:

El 71% de los televidentes dicen que la programación de la TPA présta-yos "bastante o muncho", según una encuesta

Ye proclama universal, titular recurrente y segunda parte de la película más vendida de los últimos tiempos (darréu'l lladrillazu correspondiente, por supuesto). L'enésimu avenimientu la crisis apaez énte un telón bañáu pola fumarea de fuelgues y un arume de dèja vu que fai que dalgún entovía ande mirando de regüeyu al calendariu nun seya que volviéremos a principios de los 90, nun hai más que percorrer titulares que falen de Barros y Navales.

Ye la crisis, la guaxa que mos visita de xeme'n cuando pa recordamos la nuestra mortalidá cuando despegamos demasiao los pies del suelu. Ye esi acabóse cantáu polos profestes que nunca llega pero siempre anda per ende.

Pero non, l'hestoria nun s'acaba. Esti capítulu nun ye más que una riestra fueyes necesaries pa mantener l'argumentu principal de la novela, en dellos aspeutos pa da-y sentíu a los personaxes secundarios y que se crean nun momentu dau con un amagu protagonismu, y n'otros pa garrar impulsu pa'l siguiente pasu. Ello anda asina, pasín ente pasín, bonanza ente xostrada na boca.

Asina que nun puedo evitar pensar cuando toos, o a lo menos la mayoría (que al entender de demócrates de parlamentu a doble cara y demás caudillos de la llibertá supón la totalidá de facto) falen de que vamos mal, yo entienda que vamos p'alantre...a lo menos pel camín que mos empeñemos en percorrer.

Por muncho que repita la broma cola perconocida rima fácil de versu castellanu, nun acaba faceme gracia.

En Bruseles, cuartel de mandu internacional de esa gran Unión Temporal d'Empreses Europea, con un güeyu puestu nos trabayadores, otru nel esprimidor y otru nel vasu vacíu pal zumo, xestose esta gran moción mientres el vulgo s'abelluga na idea de la refuga por parte'l parlamentu corporativu. Nun ye plan d'echamos a llorar. A lo menos tovía.

Ún nun pue facer otra cosa que correr temprano al kiosku y escuender tolos periódicos que topara nun seya que mio güelu (o cualquier compañeru de quinta) fuera quién güei a lleer una llínea nes tiraes. Too seya por nun asoleyar públicamente la vergoña xeneracional que embarga al que ve como se tira per un furacu escuru lo que se tardó años y sangre en llograr. Malditu boomerang traicioneru aquello que llamen progresu. Por mio pa nun hai por qué s'esmolecer, lleva viéndoles venir dende muncho tiempu enantes de yo fuera capaz de delletrear "ierrepefe" y sumá-y cuatrocientos euros (deprendiendo al empar que les perres "regalaes" tienen forma porcentaxe pantasma). Y ye que cualquier perra de baldre val por 0.

Hai que reconoce-yoslo. Ensin cimblar, serenos, con ritmu sele, ensin da-y mayor importancia. Ehí los tienes, nun minutu, con namás llevantar una mano. Pa facer el camín contrariu, cuenten que tardaron sieglos.

Daquién se moverá si llega a fechu, esi ye'l fechu que consta na esperanza comunal. H.odiérannos, namás faltaba que tuviéremos que movemos nós mesmos. Daquién dará la cara por nosotros nel momentu afayadizu, que nun llegó pero ta siempre a l'espera.

Y España, la valiente, fa-yse a un llau y dexa pasu. Como siempre engalanada de pallabres guapes, prestoses y ensin nueces.

Cuéntenlo como si fora un chiste, pero "apaga y vámonos...antes de ayer ya nos la clavaron otra vez...
Ya me dirás cómo te sientes".

Acabante lleer la entrada ¿Hai vida acullá les sovenciones? nel blog el trAsgU d´aRecEs y recordando esti post en Habitacion101 entrome l'intriga de saber que ye de dellos proyeutos sovencionaos en llingua asturiana na rede a partir de l'información publicada nel BOPA y esto ye colo que me tope...

- El conocíu casu de Acullá [mas.lne.es/aculla] yá apuntáu, de mano de La Nueva España con 2000 euros de sovención y n'estáu d'ivernación dende xineru.

- Quiciás haya que suma-y tamién la seición "Alcuentros Dixitales" que cuerre la mesma suerte

- Otru casu que se menciona nos comentarios ye el de Asturblog [asturblog.com]

- La Cartelera de La Nueva España [lanuevaespana.es/cine], recibe 2000 euros por ser billingüe. Ún debe ser bastante torpe porque tovía nun topo cómo ponela n'asturianu...

Y nun nos pongamos a mirar los espacios en medios físicos o en TV, ensin escaecer que hebo peticiones que quedaron fuera axudicación. Esta vez nun voi parame a recapacitar sobre cómo se conceden les sovenciones y amiguismos porque yá lo fice nel so momentu. la cuestión que me planteo agora si ye realmente beneficien a la llingua eses polítiques, reduciendo'l so usu a un meru mercadéu de palabres vacíes con preciu puestu de fábrica. Ye cierto que estes sovenciones son l'escudu ideal que tien l'Alministración autonómica pa dicir que "fai daque por promocionar la llingua", pero quiciás una ferramienta de comunicación necesite muncho más que pan y circo pa alitala.

Tamién ye verdá que nun va ser la llingua asturiana la única que se llibre del modelu económicu-social de sanixueles a la gueta favores, sovenciones ya "¡daimos más!" que impera n'Asturies. Lo que más h.ode ye que con ello se ten llucrando los que trabayen en contra la so supervivencia.


nota: nun enllace directamente les páxines dado que'l pocu serviciu que faen faime pensar que nun ye afayadizo da-yos nenguna promoción, como l'enllazáu, que pueda favorece-yos cara a los motores de búsqueda.